نجمة بنت الملجأ بقلم منال كريم

في قصر كبير في الصعيد

كانت قاعدة كنزي بتعيط و هما يبلغوها أنها هتجوز

قالت بدموع: حرام عليك يا ابويا ،انا مش عايزة اتجوز و عايزة اكمل تعليمي

نصار: انا اتفقت مع عيلة القناوي أن شرط لازم تكملي تعليمك بعد الجواز

كنزي: خالص يا ابويا ،اللي تشوفه.
و قام نصار و هي قالت: و اخيرا هيتحقق الحلم و اتجوز شهاب زينة شباب البلد
////////////////
في قصر تاني ،كان وصل شهاب من القاهرة، سلم على أهله و سال: خير يا ابويا انا شايف انك كويس الحمد ،اومال اخويا بلغني أنك تعبان ليه..

عبدالرحيم: انت فرحك الخميس الجاي

اتوتر شهاب و سال: فرح ايه يا ابويا

عبدالرحيم: انت نسيت ان أنت و بنت نصار مكتوبين لبعض من وانتوا صغار

شهاب: انت بتقول بنفسك صغار يعني اطفال

عبدالرحيم: انا مش عايز كلام كتير و ده أمر نهائي، لازم الجوزة تمت علشان مصلحة العائلتين

شهاب: سامحني يا ابويا انا مش هقدر اعمل كده

اتعصب عبدالرحيم و قال: كلامي هيتنفذ و مفيش نقاش.

سناء: اسمع كلام ابوك يا ولادي هو عارف المصلحة فين.

شهاب: انا مش عيل صغير علشان اتجوز بالغصب

قام عبدالرحيم و قال: اخر كلام جهز نفسك الفرح الخميس الجاي

نفخ شهاب بضيق و قال: ينفع كده يا امه

سناء: انت عارف الكلمة كلمة ابوك

قبل ما شهاب يرد عليها، تليفونه رد،بص على الرقم بتوتر و قال: عن اذنك هطلع ارتاح في اوضتي

و طلع بسرعة الاوضة، و اول ما قفل الباب ،فتح الخط و قال: وحشتني وحشتني يا نجمة.

نجمة بزعل: متضحكش عليا بكلمتين انا زعلانة منك.

شهاب: اخس عليا انا وحش ،حقك عليا يا نجمة قلبي.

نجمة: سيبك من الكلام ده، هترجع امت انت وحشتني اوي

شهاب بحزن: للاسف لسه شوية ابويا تعبان..

نجمة بحزن: ازاي قلبك يطوعك تسبني و أنا حامل

نجمة بتكون مرات شهاب متجوزين من سنتين و كمان هي حامل في شهر، و شهاب مش قايل لحد من اهله.

شهاب: معلش يا نجمة قلبي يومين و ارجع على طول

نجمة: تمام

شهاب: خلصتي شغل

نجمة: أيوة قفلت المحل و رجعها البيت

شهاب: توصلي بالسلامه ، اول ما توصلي البيت عرفني

نجمة: حاضر

قفل شهاب و كلم نفسه: و انا اعمل ايه في المصيبة دي ازاي اقول لأبوي اني متجوز و مراتي حامل.
//////
أما عند نجمة كانت بتقفل محل فستانين الافراح بتاعها اللي في مول كبير

سالت امل صاحبتها: شهاب هيرجع امت

نجمة: بيقول بعد يومين

امل: انتي مش ملاحظة حاجة غريبة

نجمة: ايه الحاجة الغربية

امل: اقصد لما أتجوزتي شهاب مكنش حد من اهله موجود و لمدة سنتين مظهرش حد من اهله،حتي لما سافر البلد مفكرش يقولك تعالي معي، انا حاسة أن شهاب عايز يخليكي في السر بعيد عن أهله.

مشيت نجمة مع امل و قالت: حتي انا مستغربة لما سالت وقت الجواز قال انه مقاطع أهله بس الطار و عاش في القاهرة بعيد عن الكل،تفتكري شهاب خايف يقول لأهله أنه متجوز من القاهرة

امل خافت تقول لنجمة اه فقالت : لا طبعا سيبك من اهله المهم هو كويس معاكي.

نجمة بحب: شهاب كويس معي جدا

امل: يبقي ربنا يسعدكم.
///////////
عدى يومين و كان الكل يقنع شهاب اللي كان ممكن ينهي الموضوع و يقول أنه متجوز ،بس هو خبي الموضوع و اخيرا وافق على الجواز
(((((((((
يوم الخميس

كان فرح كبير
الستات في البيت و الرجالة برة
و بعد ما الفرح خلص

في اوضة شهاب

دخل الاوضة كانت كنزي قاعدة على السرير، قال بهدوء: السلام عليكم

ردت بخجل : و عليكم السلام

شهاب: مبروك يا عروسة

كنزي: يبارك فيك يا سي شهاب

استغرب و قال: ايه سي شهاب دي ،قولي شهاب بس

قامت من مكانها و مسكت ايده و قعدته على السرير، و قعدت على الأرض و قلعته الجزمة و هي بتقول: ازاي اقول اسمك حاف، انت جوزي و سيدي و تاج راسي

عجبه كلامها و أنها تقدم فروض الطاعة من أول يوم على عكس نجمة اللي كانت لها شروط صعبة علشان الجواز.

فاق من سرحانه لما قالت: سرحان في ايه يا سي شهاب.

شهاب: مفيش حاجه

كنزي: طيب اسمحلي اغير هدومي.

شهاب: ماشي

دخلت كنزي الحمام و هو يبص عليها بإعجاب.

في الحمام

كات واقفة قدم المرايا، و كلمت نفسها: و اخيرا اتجوزتك يا شهاب، ياه سنين و انا مستنية اللحظة دي، فتحت عيني و بيقولوا اني خطبيتك، و لما كنت تجي زيارة البلد كنت هتجنن أن أهلك و اهلي ساكتين و محدش اتكلم عن الجواز، و اتري هما مستنين اكمل ١٨ سنة ، و اخيرا الحلم اتحقق.

كان قميص شهاب متعلق في الحمام ، حضنته و هي تشم ريحته و قع منه صورة، بصت على الصورة بصدمة ،كانت صورة فرحه هو نجمة.

نزلت دموعها بحزن و قالت: معني كده انك متجوز في مصر

بصت على ظهر الصورة كان مكتوب التاريخ ، قالت بحزن: متجوز من سنتين ،طيب ليه ساكت و معرفش حد أنه متجوز و كمان مرفضش الجواز مني، يبقي عايز يتجوزني و انا هعمل اي حاجه و كل حاجه علشان يكون ليا.

غيرت هدومها و جهزت نفسها على أكمل وجهه و خرجت، كان هو قاعد يشرب سيجارة، جريت عليا شدت السيجارة منه و قالت: لمواخذة يا تاج راسي ، بس مينفعش تشرب سجائر قبل الاكل، تعال علشان تاكل الاول

قعد هو و هي فضلت وافقة، قال: اقعدي

كنزي بصدمة: يا دي العيبة اقعد اكل معك، لا طبعا لازم انت تاكل و تشبع و بعدين انا.

و فقت على رأسه و بقت تأكله في بوقه، و هو مبسوط على الاخر
////////////
عند نجمة مش عارفة تنام و عاملة تلف في الشقة بلا هدف..

كلمت نفسها::في ايه انا مش عارفة انام ليه؟ و قلبي مقبوض ،يارب أستر و يكون شهاب بخير

رنت علي شهاب بس طبعا شهاب مش فاضي يرد عليها.

نفخت بضيق و قالت: أكيد نايم الوقت متاخر جدا ، يلا أنا أحاول أنام شوي.

دخلت اوضتها و حاولت تنام و بعد وقت عرفت تنام

/////////
تاني يوم

صحي شهاب من النوم على صوت كنزي و هي بتقول: يا سي شهاب، اقوم أنا حضرت الفطار

فتح عينه و سأل بتعجب: حضرتي الفطار و انتي عروسة

ضحكت كنزي و قالت: و ماله و انا عندي اغلي منك يا تاج راسي

شهاب: تسلم ايدك ،ادخل اخد حمام و اجي.

دخل شهاب الحمام و تلفيونه رن، شافت كنزي لقت مكتوب نجمة قلبي،عرفت أنها مراته ،عملت التلفيون صامت علشان شهاب ميسمعش و حذفت الاشعار علشان ميعرفش أنها اتصلت.

///////
عند نجمة اتكلمت بعصبية: أنا مش عارفة انت مش بترد ليه.

دخلت نجمة علشان تجهز و تروح المحل…
///////////////
في قصر عبدالرحيم القناوي

في المطبخ

كانت سناء و معها بنتها سارة و مرات ابنها الصغير ياسمين بيحضروا الفطار ، دخلت كنزي و قالت: صباح الخير

بصوا عليها باستغراب و سالت سناء: بتعملي ايه هنا؟

كنزي: هساعدكم في شغل البيت يا مرات عمي

سناء: شغل ايه أنتي لسه عروسة

كنزي: و ايه يعني عروسة

و رحت على الحوض و غسلت الاطباق و الكل انبسط منها و هي كان هدفها تكسب الكل في صفها.

على السفرة كان قاعد عبدالرحيم و شهاب و قاسم

قاسم: مبروك يا اخوي

شهاب: الله يبارك فيك.

عبدالرحيم سال و هو شايف السعادة على وش شهاب: قولي مبسوط

شهاب بسعادة: اوي يا ابويا ،كنزي بنت أصول.

عبدالرحيم: علشان تعرف ابوك مش بيختار لك اي حاجه.

و خرج الاكل و كلوا مع بعض بس طبعا كنزي فضلت واقفة لخدمة شهاب

///////////
في محل نجمة

أمل بصوت عالي:نجمة، نجمة

فاقت على نفسها و سالت : نعم يا امل

امل: مالك سرحانة في ايه

نجمة بقلق : قلقانة اوي يا أمل، برن على شهاب من امبارح مش بيرد و قلبي مقبوض

أمل: خير ان شاء الله يمكن مشغول

نجمة: ربنا يستر، بقولك خلي بالك انتي من المحل انا هرجع البيت

أمل بخوف: انتي كويسة و لا نروح للدكتور..

نجمة: انا كويسة

و رجعت نجمة البيت و هي حاسة بالخوف على شهاب، و رجعت فلاش باك و افتكرت أول علاقتهم
/////(((((////////(/
فلاش باك

نجمة قفلت المحل و كانت ماشية خارجة من المول ، رحت جراح العربيات و لقت في عربية قافلة على عربيتها، نفخت بضيق و قالت: كل الجراح الكبير ده و الغبي قافل على عربيتي

جاه صوت من وراها و قال: متشكرين يا ستي

بصت وراء و سالت : انت مين؟

ضحك و قال: انا الغبي، اقصد شهاب ،شهاب عبدالرحيم القناوي من الصعيد

نجمة بعصبية: بس ،بس انا مش عايزة اعرف تاريخ حياتك، حرك عربيتك من هنا.

ابتسم و قال: حاضر، بس مش هنتعرف..

نفخت بضيق من غير رد…

حرك شهاب العربية و نجمة مشيت بسرعة

////////////
بعد يومين
كانت في المحل

دخل شهاب و قال: السلام عليكم

بصت باستغراب و قالت: انت بتعمل ايه هنا

شهاب: زبون

ضحكت باستهزاء و قالت: و عايز ايه يا زبون

شهاب: عايز اشتري حاجات.

نجمة بسخرية : تمام يلا اختار فستان .

اتحرج و قال: مش ليا طبعا ،فرح اخويا قرب و عايز اصور بعض الفساتين و ابعت الصور لمراته تختار منهم.

نجمة: و مرات اخوك متجيش تختار ليه

شهاب: مش أنا قولتك انا من الصعيد و هيبقي صعب عليها تجي هنا.

نجمة: بقولك ايه الفساتين قدمك ،شوف أنت عايز ايه..

و قعدت نجمة على المكتب و هو بدا يصور الفساتين ل ياسمين و سارة لحد ما اختاروا الفستان، دفع تمنها و خدوا و مشي..
////////////
و بتعدي الايام و شهاب يوميا يروح المحل عند نجمة باي حجة و يحاول يفتح معها كلام بس هي مش معبره..

امل: ايه رايك في شهاب

نجمة: و انا اقول راي فيه ليه

أمل: الود يلف وراكي من هنا لهنا ، شكله واقع..

نجمة: ده شكله عايز يتسلي.

امل: فكري يا نجمة في الموضوع

سكتت نجمة بس هي فعلا بدأت تفكر في شهاب .

////////
بعد شهرين

كانت ماشية نجمة مع امل و رايحين على المحل

و كانت المفاجأة أن شهاب وقف قدم المحل و معه بوكية ورد و اول ما شافها قعد على رجله و قال: نجمة تقبلي تجوزني

اتصدمت نجمة و قالت: ايه الكلام ده جواز بسرعة كده.

شهاب: تقدري تقولي حب من اول نظرة..

نجمة خدت نفس و قالت: لو سمحت يا شهاب قوم و بلاش اللي انت بتعمله ده..

شهاب: مش هتحرك من مكاني غير لما توفقي

دخلت نجمة المحل من غير ما ترد عليه ،و هو قام و دخل وراءها ،سال بحزن: عرفني الصراحة في حد في حياتك

نجمة: السؤال ده مش من حقك بس تمام ارد عليك مفيش حد في حياتي و مش هيبقي في و يلا من غير مطرود.

انجرح من كلامها و مشي من غير رد

سالت امل: انا شايفة في عينك نظرة سعادة بللي عمله شهاب

نجمة بحزن: من غير ما تسالي ارد انا، انا معجبة ب شهاب

أمل باستغراب : و ليه رفضتي

نجمة بحزن: تفتكري لما يعرف اني معرفش مين اهلي و تربية ملجا هيقبل يتجوزني

امل: دي حاجة ملكيش ذنب فيها و رغم ظروفك دي قدرتي انك تنجحي من غير ما تحتاجي حد

كان شهاب لسه واقف قدم المحل و سمع كل كلامهم و فكر يعمل حاجة تانية علشان نجمة توفق عليه، هو بالفعل حبها جدا..
////////
بعد ما نجمة خلصت شغلها رجعت البيت و كان شهاب وافق مستنية بنفس بوكية الورد

مقدرتش تنكر أنها مبسوطة بس سالت بحدة : انت بتعمل ايه هنا ؟

شهاب بهدوء: انتي عارفة ،بس و ماله اقول تاني بحبك و عايز اتجوزك.

نفخت بضيق و قالت: انا مش موافقة،فلو سمحت يا استاذ شهاب ابعد عني.

شهاب : لا يا نجمة مش هبعد

نجمة فقدت أعصابها و قالت: انت متعرفش عني حاجة

شهاب: مش هيفرق معي

نجمة: في كافية على اول الشارع تعال نتكلم هناك.

ضحك شهاب و قال : حاضر.

مشي شهاب و نجمة لحد الكافية

في الكافية

شهاب: اتكلمي يا نجمة

نجمة بحزن: احنا مش هينفع نتجوز علشان انا معرفش مين ابويا و أمي انا فتحت عيني ،لقيتني في ملجأ كل حاجه اكون عايزها لازم اتعب على ما اوصل لها، و زي ما يقولوا حفرت في الصخر علشان اوصل اتعلمت و فتحت مشروعي الخاص و عندي شقة في مكان كويس، انا راضية بحياتي بس مش اي حد يقبل بيا

اتكلم شهاب بكل هدوء و قال: انا اقبل علشان بحبك و علشان كلامك ده يدعي للفخر و اكون فخور لانك مراتي

و شاف أن دي فرصة و يعرفها أن محدش من اهله هيكون موجود معه،علشان اهله مش هيوفقوا يتجوز غير كنزي اللي مكتوبها على اسمه من زمان اخترع كذبة و قال: انا بقي عندي عيلة كبيرة في الصعيد، بس هما قطعوا معي علشان حبت اتعمل في الجامعة و ابعد عن الطار

نجمة: معقول و هو لسه في طار

شهاب: اه، سيبك بقي من الكلام ده و عايز اسمع كلمة واحدة أنك موافقة على الجواز

ابتسمت بخجل من غير رد ،و بعد شهر اتجوز شهاب من نجمة.
///////
بعد. شهر من الجواز

نجمة: انا نازلة

شهاب: على فين

نجمة: المحل

شهاب::لا مفيش خروج من البيت

نجمة: يعني ايه

شهاب: يعني انا مراتي تقعد في البيت من غير شغل

نجمة باستغراب: و انت فاكر بقي اقولك حاضر يا سي السيد،لا يا حبيبي انت متجوزني و انا شغالة و المحل ده تعب سنين و حلم حياتي ،لو فاكر اسمع كلامك يبقي بتحلم..

مشي شهاب و قفل الباب بالمفتاح و قال : و انا قولت مفيش خروج

ضحكت نجمة و مشيت ناحيته و قالت بتهديد: بلاش نبدا حياتنا كده يا شهاب انا بحبك بس بحب شغلي و لا يمكن انفذ كلامك يبقي الاحسن ليك تفتح الباب بالذوق

شهاب: لو قولت لا هتعملي ايه

ضحكت نجمة و قالت: اصوت و الم عليك الناس ،افتح يا شهاب

و فتح شهاب الباب و عرف أن نجمة مش سهلة

و رغم أنه كان عايز يتحكم فيها بس كان يحبه و مبسوط معها.

و عدي عليهم سنتين و الاتنين فهموا بعض و عايشين في سعادة
/////(
في يوم

دخل شهاب و هو خايف و قال: نجمة لازم اسافر البلد حالا

سالت نجمة بخوف: خير ان شاء

شهاب: اخويا كلمني و قال ابويا تعبان

نجمة: الف سلامه عليه طيب انا عايزة اسافر معك.

اتوتر شهاب و قال: معلش يا حبيبتي مرة تانية

و سافر شهاب و بيطلع ده خدعة من ابو شهاب علشان يرجع و يتجوز كنزي
/////
عودة

قالت نجمة: انا مش هسكت لازم اشوف اي حاجه اعرف عنوان البلد بتاعته و اسافر و اشوف في ايه
////////
في اوضة شهاب

مسك التلفيون و لسه هيكلم نجمة، شدت كنزي التلفيون منه و قالت: سيبك من التلفيون دلوقتي ،و كل طبق الفاكهة ده علشان تتغذى

بص عليها و كلم نفسه: نجمة عمرها ما عملت كده ، انا عجبني اشوف الضعف في عيون كنزي مش نجمة اللي عامل راسها براسي.

كنزي بدلال : بتفكر في ايه يا سي الناس.

ضحك و قال: فيك يا جميل..

ابتسمت كنزي و قالت: يخليك ليا يا سي شهاب.
///////
أما نجمة كانت لقت وسط اوراق شهاب عنوانه و بلغت امل أنها هتسافر بكرة بنفسها علشان تعرف شهاب ليه اتاخر كده.
///////////////////
تاني اليوم

في قصر القناوي

كانت عزومة كبيرة لاهل كنزي و الكل مجتمع و فرحان

دخل الغفير و قال: يا جناب العمدة في بنت برة عايزة شهاب بيه

عبدالرحيم: دخلها نشوف مين دي.

كان شهاب قاعد و سرحان مع كنزي اللي تأكله بايدها، حتي مسمعش اسم نجمة

دخلت نجمة و بقت تبص في وش الموجودين لحد ما وقعت عيناها على شهاب، بصت بحزن و استغرب و قالت بصوت عالي: شهاب

انتفض من مكانه و قال : نجمة.

مشيت ناحيته و قالت: أيوة نجمة ،انت مش بترد عليا ليه

مشي ناحيتها و سال: انتي بتعملي ايه هنا

نجمة: جاية أشوفك ليه مش بترد عليا.

شهاب : تعالي نتكلم برة

و مسك ايديها و قبل ما يخرجوا قال عبدالرحيم: استني يا شهاب ، مين دي

سكت شهاب و مش عارف يقول ايه ، أما كنزي كانت عايزة تولع في نجمة

لما نجمة ملقتش رد من شهاب ، قالت هي: انا نجمة مرات شهاب

الكل أتصدم و زعق عبدالرحيم و قال: الكلام ده صح يا شهاب

شهاب غرقان في شبر مياة و مش عارف يقول ايه.

بصت نجمة عليه و قالت باستغراب: انت ساكت ليه يا شهاب  ،رد و قول اني مراتك.

شهاب معندوش رد فضل ساكت و يبص على الارض، مشيت كنزي بهدوء ناحية نجمة و قالت: و زي ما عرفتيني عن نفسك خليني انا كمان اعرفك انا مين؟

و بصت على شهاب و قالت: انا كنزي مرات شهاب الجديدة، الظاهر مكنش مبسوط معاكي فحب يغير.

فتحت نجمة عيونها بصدمة و قالت: انتي كاذبة، شهاب ميقدرش يعمل فيا كده، علشان هو حبيبي

نصار( ابو كنزي) انت هتفضل ساكت لحد امت، انطق يا شهاب

الكل كان مستني شهاب يتكلم نجمة اللي نفسها يطلع كلام كنزي غلط، و الباقي اللي عايز كلام نجمة يطلع غلط.

و شهاب مرعوب حرفيا من كل اللي بيحصل

عبدالرحيم فهم و قال: الموضوع بيان من شكلك، رحبوا بمرات شهاب الاولى

نصار بعصبية: انا مش موافق بنتي تكون لها ضرة

عبدالرحيم: نتكلم بالعقل يا نصار

نصار: عقل ايه انا قولت اللي عندي ،بنتي هتمشي معي.

كنزي بهدوء: اسفة يا ابويا بس انا مش هسيب بيت جوزي

نصار بغضب: لو فضلتي هنا ،انا اعتبرك ميتة

مشيت كنزي جنب شهاب و مسكت في أيده و هو لسه ساكت

مشي نصار مع باقي أفراد عائلته.

قعد عبدالرحيم و قال: دلوقتي نقعد و نتكلم

نجمة: انا مش عايزة اتكلم لو فعلا شهاب اتجوز يبقي طلقني حالا و خلينا ارجع مكان ما جيت

كنزي بسعادة و هي حاسة ان الموضوع سهل، قالت: طلقها يا شهاب

و اخيرا شهاب قرر يتكلم ، شد أيده من كنزي و مسك ايد نجمة و قال: خلينا نتكلم لوحدنا

عبدالرحيم: لا يا شهاب هنتكلم كلنا و نشوف الموضوع ده

سناء: انت ازاي تجوز و احنا مش عارفين.

شهاب: انا كنت ناوي اقولكم

نجمة بعصبية: رد عليا أنا يا شهاب ،انت اتجوزت عليا

سكت مردتش عليه ،رفعت صوتها اكتر و صرخت: اتجوزت عليا أنا بعد ما نزلت على ركبتك و طلبت مني الجواز اكتر من مرة و انا رفضت

اتصدم الكل و كنزي حست بالغيرة، و قال عبدالرحيم: انت عملت كده يا عرة الرجالة

شهاب: مفيهاش حاجه يا ابويا ده الاتيكيت

عبدالرحيم: آتيكت يا ابن القناوي ، اتجوزت ازاي من غير ما نعرف

نجمة: قال إنه قاطع العلاقات بينكم علشان يهرب من الطار و بقالنا سنتين متجوزين و كمان انا حامل

بصت نجمة على شهاب و قالت:طلقني يا شهاب

شهاب: انا بحبك يا نجمة و اللي حصل ده غصب عني

نجمة باشمزاء: انا مش هكمل مع واحد خاين زيك.

عبدالرحيم: نجمة ،أي قرار عايزة تاخديه انا معاكي فيه، بس بعد ما تولدي ابننا

حطت ايديها على بطنها و قالت: ده أبني أنا .

ضحك عبدالرحيم و قال: لا يا بنتي ده عبدالرحيم شهاب عبدالرحيم القناوي

ضحكت نجمة بسخرية و قالت::و كمان اختار الاسم، أنا مش هقعد هنا دقيقه واحدة.

و مشيت ناحية الباب ،بس عبدالرحيم ،قال: بلاش تتعبي نفسك، انتي هتفضلي هنا لحد ما تقومي بالسلامة

حست بالخوف و قالت: يعني انا محبوسة هنا.

سناء: دخول الحمام مش زي خروجه يا مرات ابني.

بصت على شهاب و قالت بخذلان: شهاب.

مسك أيدها و قال: تعالي نتكلم فوق

مشي و هي وراءه،قالت سناء : خليها تقعد في الاوضة اللي جنب اوضتك انت و كنزي يا جوز الاتنين.

كانت كنزي تبص عليهم و في نار تحرقها من الغيرة
////////
في الاوضة

نزلت دموع نجمة و قالت: قول أن كل ده كدب ،قول أني بحلم أو ده مقلب فيا، قول اي حاجه غير أنك اتجوزت عليا ،اصل ليه تعمل كده و احنا مفيش بينا اي مشاكل ليه يا شهاب..

شهاب مسح دموعها و قال: اهدي يا نجمة قلبي ،حقك عليا ،بس صدقيني أنا عملت كده غصب عني

نجمة باستغراب:  غصب عنك ،يعني ايه غصبك عنك، انا مش فاهمة في جواز بالغصب.

شهاب: أيوة بالغصب، انا جيت و انا فاكر أن ابويا تعبان و اول ما وصلت لقيت كل حاجه جاهزة و اني لازم اتجوز كنزي علشان العادات و التقاليد و أننا مخطوبين لبعض من و احنا صغيرين

نجمة بعصبية: كل كلامك ملوش لازمة ،أنت خاين فاهم يعني ايه خاين،خونت حبي ليك..

شهاب: لا يا نجمة أنا بحبك و مش خاين

زقته و قالت: لو أنت فعلا بتحبني طلقني و خليني امشي من هنا.

شهاب : علشان بحبك مش هطلقك و هتفضلي هنا،و من الافضل ليكي تقبلي الأمر الواقع

و خرج شهاب من الاوضة و قفل عليها، و هي خبطت علي الباب و صرخت: افتح الباب يا شهاب ،انا مش هقعد هنا دقيقة واحدة.

فضلت نجمة تصرخ و تخبط على الباب

نزل شهاب، زعق عبدالرحيم و قال: عجبك صوتها العالي ده

شهاب : معلش يا ابويا علشان هي مصدومة

عبدالرحيم:اتجوزت من غير ما تاخد راي و لا تعرف حد..

شهاب : حبيتها و كنت متاكد انك هترفض و علشان كده تجوزت من وراكم..

سناء: اللي حصل حصل، خلينا دلوقتي نتكلم في المهم ،هنعمل ايه في اللي فوق دي.

عبدالرحيم: زي ما قولت عجبها الوضع تمام، مش عجبها نستنا لبعد الولادة و بعدين تتطلق…

كانت كنزي دخلت المطبخ ،و دخل شهاب وراها و قال: انا اسف اني خبيت عنك يا كنزي

كنزي عيطت من غير رد.

قرب منها و قال: حقك عليا

كنزي: عملت كده ليه يا شهاب..

شهاب: الكلام ده من زمان و قولت اتجوز من غير ما أعرف حد هنا، خلينا في الحاضر أنتي مراتي زيك زيها و بحبك…

كنزي بسعادة: بجد يا شهاب ،بتحبني.

شهاب: أيوة بحبك ،و حياتي بقت احلي معاكي.
///////////////////
في اوضة نجمة

قعدت على الأرض بعد ما تعبت من كتر الخبط و الصريخ، طلعت تلفيونها و رنت على أمل

ردت أمل و قالت: أيوة يا نجمة وصلتي

نجمة بدموع: أيوة وصلت و ياريتني ما جيت

أمل بخوف::في ايه يا نجمة؟

نجمة بحزن: توقعي جيت لقيت شهاب متجوز عليا

امل: ايه الكلام ده

نجمة بدموع: انا عايزة ارجع القاهرة

أمل: طيب ما ترجعي يا نجمة

نجمة: انا محبوسة في اوضة لوحدي،أبو شهاب بيقول مش ناوي يخليني امشي غير بعد الولادة علشان ياخدوا أبني مني.

امل بعصبية: ليه احنا في غابة قولي عنوانك ايه و انا أجاي عندك.

و قبل ما تقول العنوان ،دخلت كنزي عليها و شدت التلفيون منها

صرخت نجمة و قالت: هاتي التلفيون

ضحكت كنزي و قالت: لا يا حبيبتي ، زي ما حمايا قال انتي هنا لحد بعد الولادة

نجمة: انتي الموضوع عادي عندك ، مش زعلانة ان جوزك متجوز غيرك

كنزي ببرود : لا مش زعلانة و عرفت من اول يوم أن شهاب متجوزك و قولت مش مهم..

نجمة باشمزاء: انتي معنديش كرامة

ضحكت و قالت: بس بنت عيلة كبيرة مش زيك

نجمة: يعني ايه زي

و خرجت كنزي  من الاوضة و هي بتقول: انك تربية ملجأ.

اتصدمت نجمة للمرة التانية في شهاب أنه قال ل كنزي علي السر ده..
//////////
عدت ليلة صعبة على نجمة عكس شهاب اللي كانت كنزي شغالة تفكيره عن أي حاجه.

/////
في صباح يوم جديد

صحيت نجمة على جردل مياة ساقعة ،شقهت بخوف و هي بتسال: في ايه؟

ضحكت كنزي و قالت: اسفة على الازعاج ، قومي يلا حماتك عايزكي تحت

نجمة بغضب: انتي مجنونة

كنزي: يلا بالذوق بدل ما حماتك تطلع بنفسها و دي مش سهلة..

نجمة: انا مش فاهمة انتوا عايزين مني ايه

كنزي: انزلي احسن ليكي.

و خرجت كنزي من الاوضة،و نجمة ملقتش حل غير انها تنزل تشوف أم شهاب عايزة ايه..

///////
غيرت نجمة هدومها و نزلت، دخلت المطبخ.

سالت بهدوء: خير.

سناء: خير يا اختي ،تعالي شوفي شغلك

استغربت نجمة و سالت: شغل ايه؟

سناء: شغل البيت ،انتي مش مرات الكبير

نجمة:  انتي قصدك  شهاب هو الكبير

سناء: أيوة ،و لازم تشوفي شغل البيت بمزاجك أو غصب عنك

زعقت نجمة و قالت: لو انتي فاكرة  بقي اني اسمع كلامك تبقي غلطانة..

و جت علشان تخرج من المطبخ لقت كنزي و ياسمين مرات اخو شهاب و سارة أخت شهاب،وقفوا قدم المطبخ و قالت كنزي بتهديد:::
جربي ترفضي و تشوفي وش مخيف.

خافت نجمة لأنها لوحدها، و قالت بضعف و دموع محبوسة: حاضر،عايزني اعمل ايه

سناء: البيت كله عايز بتنظف ، و المطبخ عايز تنظيف

رغم أن الشغل كتير عليها بس هي نفذت بدون كلام.
////////
بليل

كان الكل متجمع على العشاء و كنزي زي العادة تأكل شهاب بايدها، خرجت نجمة من المطبخ و قالت : اظن كده انا عملت اللي عليا..

سناء: كل يوم من ده

نجمة : بس ده ظلم لما أعمل كل ده لوحدي..

كنزي: عيب لما تقولي على حماتك ظالمة

نجمة: هو العيب هو اللي يحصل ليا في البيت ده، ايه رايك يا شهاب في اللي بيحصل

شهاب بكل صدق: صدقيني أنا بحبك يا نجمة

نجمة بحزن: بتحبني و من امبارح لحد دلوقتي مسالتش عليا،و قاعد قدمي و بكل بجاحة مراتك الجديدة  تاكلك بايديها.

قام شهاب من جنب كنزي و  واقف قدم نجمة و قال: أنا اسف.

نزلت دموعها و قالت: انا عايزة امشي من هنا.

و لما كنزي لقت أن شهاب قلبه يميل لنجمة،حبت تجرحها و قالت : انتي الكسبانة يا نجمة على الأقل هنا ليكي عيلة كبيرة ،يمكن تنسي انك يتيمة و متربية في ملجأ.

بصت نجمة على شهاب باشمزاء و قرف

قال عبدالرحيم: انت اتجنت يا شهاب متجوز واحدة من الملجا.

شهاب:و ايه المانع

سناء: المانع انك سبت واحدة زي كنزي بنت ناس و عيلة كبيرة و جبت بنت ملهاش أهل

رغم أن الموضوع جرح قلب نجمة بس قالت: و ايه يعني تربية ملجا، اني مليش اب و ام دي حاجة مليش ذنب فيها، و بنت الملجا دي قدرت تبني نفسها من الصفر، اتعلمت احسن تعليم و عملت مشروعي الخاص، مش زي واحدة زي كنزي قبلت تجوز واحد كان متجوز و لا حتي كملت التعليم..

و طلعت على فوق و هي بتفكر ازاي تعرف تهرب من هنا ، حتي التلفيون خدتها كنزي منها

قعدت في الاوضة و طلع وراها شهاب و قال:

انا مهما اقول مش هيكون مبرر اني غلطان.

وقفت قدمه و قالت بصرخة و دموع:
ازاي اقدر اهرب من هنا يا شهاب ، انا لازم انقذ  نفسي انا و ابني  منكم انتوا ناس ظالمين ،منك لله يا شهاب ،مش قادرة اصدق ازاي قدرت تعمل فيا كده و أنا كنت ديما أحاول اسعدك، عملت فيا كده ليه يا شهاب، و ازاي انا هونت عليك ،ازاي ابنك هان عليك، رد عليا ،قول ازاي بعد الحب الكبير اللي بينا تعمل فيا كده، ازاي و ليه  ..

حضنها و قال بحزن: انا اسف

صرخت نجمة و قالت: اسف، ملهاش لازمة ،اصل اسف بعد ايه، انت جرحت قلبي ،خلتني احس ان كل اللي بينا هواء، و صحيح هان عليك تقول ل كنزي على سري ، انا كنت شايفة انك اماني و حافظ أسراري بس أنت قولت لمراتك علشان هي تذلني اكتر

سكت شهاب و هو فعلا مش عارف يقول ايه

خرج من الاوضة و يفكر مع نفسه: انا بحب نجمة، و حبيت معاملة كنزي ليا،مش عايزة أفرط في واحدة فيهم، كل واحدة تكمل التانية، يعجبني قوة و إصرار نجمة، و عجبني دلال كنزي و أنها تبيان نفسها ضعيفة قدمي و انا السيد و هي أمينة، اعمل ايه علشان اقنع نجمة تكمل معايا…

///////
في اوضة كنزي كانت محضرة فيلم و فشار و فاكهة علشان تسهر مع شهاب.

اول ما دخل قالت بابتسامه: منور يا سي شهاب

ضحك شهاب و قال: بنورك يا كنز غالي.

انبسطت من الاسم و قالت، اقعد و ريح جسمك طول النهار شقيان مع العمال في الغيط

قعد و هو فرحان أنها حاسة بيها ،و مش بس كده جابت طبق مياة بملح و بقت تغسل رجله،استغرب و قال: بتعملي ايه يا نجمة.

بصت عليها و عيونها مليانة دموع و قالت: انا كنزي مش نجمة.

طبطب على رأسها و قال: حقك يا كنزي ،ذلة لسان

كنزي: مش زعلانة منك يا سيد الناس

شهاب: اللي يعجبني فيكي عقلك الكبير رغم سنك الصغير..

ضحكت كنزي و قالت: يخليك ليا يا سندي

و  ليلة شهاب و كنزي  كانت سعيدة أما نجمة كانت حزينة.
////////
عدي شهور

و نجمة وصلت للشهر السابع.
و شافت كل ألوان العذاب من أهل شهاب و هو ساكت مش بيعمل حاجه

بقت هي اللي تخدمهم و هما قاعدين ،و للاسف مفيش في أيدها حاجة تعملها لأنها مسجونة عندهم.

و العلاقة بينها و بين شهاب مقطوع تماما.

أما كنزي رغم أن شهاب اتعلق بيها جدا و هي كمان حامل بس  اللي شاغل تفكيرها تخلص من حمل نجمة علشان تخرج من حياتهم و جربت طرق كتير بس فشلت

////((
برة البيت

كنزي:فين الدواء

ممرضة : اهو حباية واحدة و العيل يموت و احتمال هي كمان

كنزي ::يارب تموت هي و العيل خليني اخلص منهم و شهاب يكون ليا لوحدي.

ممرضة :فين الفلوس

كنزي: الفلوس اللي اتفقنا عليها و زيادة ..

الممرضة: تسلمي يا ست البنات
///////
في قصر عبدالرحيم القناوي

سناء: نجمة

خرجت نجمة من المطبخ و هي مش قادرة تقف على رجليها و قالت: نعم

سناء: خلصتي المطبخ

نجمة بتعب: أيوة

سناء: طيب يلا اطلعي نضفي السطح

نجمة بتعب : بجد مش قادرة

زعقت سناء و قالت: لازم اهددك علشان تشتغلي

نجمة بحزن: انتي ايه معندكش قلب ،انتوا عايزين الطفل اللي في بطني صح ، طيب خافوا عليه

سناء بأمر: قومي يا بت

نجمة  شافت شهاب دخل من الباب، عملت نفسها يغمي عليها، جري شهاب عليها و قال بخوف: نجمة ،يا نجمة

نجمة بتعب: الحقني يا شهاب حاسة اني هموت و ابني مش بخير

بص لامه و قال: كفاية كده يا امه.

شال نجمة و طلع فوق ،و جاب لها اكل و عصير ،بعد ما كلت، باست أيده و قالت بدموع: ابوس ايدك يا شهاب خلني امشي من هنا انا تعبت و مش قادرة اتحمل ، خلينا نمشي و نرجع بيتنا و انا هسامحك و حتي لو كنزي هتفضل مراتك معنديش مشكلة تقسم الايام بينا

مسح دموعها و قال : كفاية عياط.

نجمة: يعني هترجعني القاهرة

شهاب: هتسامحني

هزت راسها و قالت: أيوة

شهاب : اعملي حسابك نمشي من هنا الفجر من غير ما نقول لحد

حضنته و قالت: شكرا يا حبيبي.

في وقت ما شهاب يخطط مع نجمة يرجعوا القاهرة ،كانت كنزي تخطط ازاي تخلص من نجمة و ابنها
//////(
و قبل  الفجر بساعة خرج شهاب مع نجمة من البيت بكل هدوء علشان لو ابوه عرف هيمنع خروجهم.

على الساعة تاسعة الصبح ،اتنفست نجمة براحة لما لقت نفسها تبعد عن البلد ،مسكت ايد شهاب و قالت: بحبك

شهاب : و انا بعشقك يا نجمة قلبي
////((((((
في قصر القناوي

عبدالرحيم ماسك الورقة اللي شهاب سابه و مكتوب فيه: سامحني يا ابويا بس نجمة حبيتي و ام ابني الجاي، و كانت بتعذب في البيت ،انا اكمل مع نجمة و كمان كنزي هتفضل مراتي و هعدل بين الاتنين و خلي كل واحدة في مكانها احسن.

نزلت دموع كنزي و قالت: هو كده سابني

عبدالرحيم بعصبية: انتي غبيبة ما هو بيقول هيكمل معاكم انتوا الاتنين

جزت على أسنانها و قالت لنفسها: طيب كنت صبرت يوم واحد يا شهاب علي ما أخلص منها و من ابنها..
////////////
عدي شهرين و كان شهاب يقضي اسبوعين في البلد و اسبوعين في القاهرة و الحياة نوعاً ما بقت مستقرة مع الكل.

لحد يوم ولادة نجمة اللي ولدت ولد و اتسجل محمد زي ما طلبت نجمة
///((/(///
يوم السبوع اللي اختارت نجمة أنها تعملوا في دار مناسبات

وصل أهل شهاب من الصعيد و الكل مستني وصول نجمة مع الطفل و صاحبتها امل.

رن شهاب عليها مفيش رد

جاه العامل و قال: استاذ شهاب مدام نجمة أمرت في فيديو هيشتغل قبل ما توصل.

ضحك شهاب و قال: اكيد الفيديو هيكون ذكريات بينا

اشتغل الفيديو و الكل مركز و كانت نجمة اللي قالت: ازيك يا شهاب ،اكيد دلوقتي انت مستني ظهوري ، من غير تشويق انا مش جاية.

اتصدم الكل و هي كملت: أنت فاكرة ايه، ممكن اكمل معاكي بعد خيانتك ليا، لا و الف لا،اصل اللي يخون مرة يخون الف.

انا خدعتك علشان نرجع القاهرة ، زي ما فضلت اتعامل معاك كويس و كانا محصلش حاجه لحد الولادة علشان مع الاسف القانون بيقول لازم الاب او حد من طرفه هو اللي يسجل الطفل، علشان كده اتحملتك، بس في الوقت ده كنت بحضر سفري أنا و ابني و امل صاحبة عمري لمكان بعيد و بعت المحل و كمان الشقة و جهزت كل حاجه علشان أول ما امسك شهادة ميلاد ابني اسيبك و اه انا خلعتك ،قبل ما اسافر ، انت غبي يا شهاب علشان فكرت أن نجمة تسامح في الخيانة، اكيد كنزي معك دلوقتي ، بقولك يا حلوة مش كل اللي عنده عيلة يبقي عنده كرامة، و خير مثال انا و انتي ،انتي رغم عيلتك الكبيرة بس كان عادي عندك تكملي مع واحد عرفتي يوم فرحك أنه متجوز قبلك ، أما أنا بنت الملجا رفضت ده ، اشتغلت بذكاء علشان انقذ نفسي و ابني من شر ناس زيكم ، يمكن افتكرتوا اني قبلت بالأمر الواقع بس كان كل ده علشان اضمن تسجيل ابني و بعدها عمركم ما هتشوفوا ابني، و بس كده سلام

و اتقفل الفيديو و الكل مصدومة و محدش مصدق

بص عبدالرحيم على شهاب و قال: وراي يا عرة الرجالة و من النهاردة هتفضل في البلد تحت طوعي بعد ما فشلت تسيطر على مراتك..

و امر عبدالرحيم رجالته يقبلوا الدنيا على نجمة.
/(((((
أما نجمة سافرت مع امل و ابنها بلد احلامها لندن ، و كان معها فلوس كويسة ،اشتروا بيت صغير و فتحوا محل و عاشوا التلاتة حياة بسيطة مع بعض .

أما شهاب كمل مع كنزي و خلفت بنت و ولد و رغم كده لسه يدور على نجمة و مش عارف يوصل لها.

و كنزي تدعي أن نجمة و ابنها يفضلوا مختفين للابد

و كان عقاب شهاب و كنزي و أهله عدم راحة البال و مشاكل تحصل لهم على عذب نجمة أما نجمة عايشة مبسوطة و مرتاحة..

و تمت و ليس للحديث بقية

#نجمة_بنت_الملجأ
#روايات_بقلم_منال_كريم
♥️♥️♥️♥️♥️♥️
سبحان الله وبحمده سبحان الله العظيم
استغفر الله العظيم و اتوب اليه
لا اله الا الله وحده لا شريك له له الملك وله الحمد وهو على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
لا اله الا انت سبحانك اني كنت من الظالمين
اللهم احفظ أولادنا وبناتنا
اللهم احفظ مصر واهلها من كل سوء
اللهم انصر اخواننا في فلسطين و السودان و النصر لجميع البلاد العربية و الإسلامية
♥️♥️♥️♥️♥️♥️♥️♥️