البحث عن عريس هندي بقلم منال كريم
كانت بتلم شنتطها و هي في قمة السعادة، على عكس أمها اللي قاعدة قصادها بتعيط، قفلت مسك الشنطة و قعدت جنب امها و قالت بهدوء:
ليه الدموع يا ماما.
ام مسك( نجلاء): و عايزني اعمل ايه و انتي مسافرة بلد غريبة لوحدك اقوم ارقص مثلا.
مسك بهزر: انتي ارقصي و انا أطبل يا ست الكل.
زعقت نجلاء و هي بتقول: احترامي نفسك بدل ماقوم اضربك
مسك: طيب اهدي بس يا ماما ، ليه كل ده يا حبيبتي.
نجلاء بحزن: طول عمرك قلبك قاسي يا مسك، قلبي مرعوب عليكي، ازاي يا بنتي تسافري شهر بحاله في بلد غريبة عنك، و كمان مستهونة الموضوع.
مسك بهدوء : يا ماما يا حبيبتي، أنا كبيرة مش صغيرة و كمان مسافرة مع ناس زملائي من الشركة و ده شغل و مينفعش اقول للشغل لا.
نجلاء: سيبي الشغل ده خلاص و بلاش منه.
مسك: يا ماما كده بطر، لما أسيب الشغل في شركة كبيرة زي الشركة اللي أنا شغالة فيها ده جنان
نجلاء بخوف: أنا خائفة عليكي يا مسك.
باست مسك ايديها امها و قالت: خلاص يا حبيبتي من غير خوف و لا عياط كلهم ٣٠ يوم و ارجع اقعد على قلبك.
نجلاء حضنت مسك و قالت بدموع : خلي بالك من نفسك
مسك: حاضر يا ماما.
نجلاء: تعالي ناكل سوه و بعدين نامي علشان تصحي بدري
مسك: حاضر يا ست الكل
و خرجت مسك تاكل مع امها و هي بتفكر في السفر..
///////////
تاني يوم الصبح
صحيت مسك بكل نشاط، و هي تحمد ربنا أنها شغالة في شركة سياحية و جت لها الفرصة اللي تحلم بيها و هي تسافر الهند، البلد اللي من زمان نفسها تزورها و تشوف اهل البلد.
///////////
في مطار مومباي وصلت مسك مع تلاتة معها من نفس الشركة و كان في شخص هندي في انتظارهم ..
رشاد :اهلا بيكم انا السيد رشاد خان مندوب عن صاحب الشركة.
زياد: تتكلم مصري
رشاد: انا اعشق اللغة العربية
طارق:اهلا سيد رشاد و انا طارق المسؤول و معي المساعدين، استاذ زياد و انسة مسك و مدام بسمة
رشاد : اهلا بالجميع، اتفضلوا معي إلى السيارة.
ركبوا العربية، و مسك تبص على الشوراع بانبهار،
اتكلمت بسمة بهمس: انتي لسه ناوية على اللي في دماغكم يا مجنونة هانم..
مسك: اومال انا مش همشي من هنا ،غير لما اجيب عريس هندي.
بسمة: هما المصريون قصروا معاكي في ايه.
مسك: لا غبار على الشاب المصري، بس انا من كتر ما أتفرجت على مسلسلات و افلام هندي، لقيت اني شخصيتي عايزة عريس هندي
بسمة : طيب افرضي الشهر خلص و مفيش عريس ،هتعملي ايه.
مسك: بلاش احباط يا بسمة، شهر كتير و أن شاء الله القي العريس اللي بحلم بيه.
بسمة: و هتعمليه ازاي دي، هتروحي تطلب أيد العريس من أهله.
مسك: انا عارفة انك بتقولي افيه رخم زيك،بس على فكرة في الهند عادي العروسة تطلب ايد العريس ،بس طبعا انا لازم امشي بأصول مصر، هخليهم هما اللي يطلبوا أيدي بنفسهم.
بسمة : ربنا يعينك على دماغك، و هترجعي لامك بعريس هندي
اتكلم طارق: يلا بنات وصلنا الاوتيل.
///////////
في الاوتيل
كانت بسمة و مسك مع بعض في نفس الاوضة.
مسك: بقولك يا بسمة
بسمة: نعم يا مصيبة هانم
مسك: متخلينش أندم اني قولتك انا مخبية على الكل.
بسمة: طيب يا ستي شكرا على الشرف العظيم، عايزة ايه بقي .
مسك: ايه رايك في رشاد خان
بسمة: مين رشاد خان
مسك: ركزي معي، اللي كان مستني في المطار.
بسمة: نهار ابيض عليكي يا مسك، هو انتي لحقني تركزي مع الراجل
مسك: يا بنتي عادي، هو اول واحد قابلته في الهند، شاب وسيم و كمان مسلم
بسمة: و عرفتي منين يا اختي
مسك: من اسمه رشاد خان،يعني الاسم مسلم
بسمة: بجد مش عارفه اقول فيكي ايه، على العموم خلي بالك لتختاري واحد مش مسلم، بس انا مش موافقة على الجنان ده.
رن تلفيون الاوضة ، ردت بسمة: أيوة يا مستر طارق
طارق: هاتي مسك و تعالي نتغدى
بسمة: حاضر ،،دقايق و نكون في المطعم.
مسك: انا مش عايزة اكل ،عايزه ابدا لف في البلد و اشوف حظي.
بسمة بجدية: ياريت يا مسك تفتكري اننا هنا في شغل و اللف ده في وقت الفارغ.
نفخت مسك و قالت: انتي عاملة زي أبلة الناظرة، انا عارفة حدودي ،بلاش خوفك الزيادة عليا
بسمة: خوف ايه انا مرعوبة من دماغك.
مسك يزهق: سيبت اني في مصر ،لقيتك هنا، يارب ارحمني منك.
////////
بعد شوية
في مطعم الاوتيل
كانوا قاعدين طارق و زياد و بسمة و مسك على ترابيزة
زياد : هنعمل ايه دلوقتي يا طارق
طارق: بعد الغداء هيجي رشاد ياخدنا علشان نقابل مدير الشركة، احنا عايزين نحاول إقناعه أن يكون في شراكة بينا ،الخطوة دي هتكون كويسة لينا.
زياد: أن شاء الله نرجع مجبورين الخاطر
مسك: يارب
قربت منها بسمة و قالت: الدعوة من قلبك يا مسك
مسك بخجل: علشان مصلحة الشركة
بسمة: اومال ،انا اكتر واحدة عارفة قلبك على الشركة
طارق: مسك و بسمة عايز تركيز انتوا معانا هنا لانكم اكتر اتنين شاطرين في الإقناع و فاهمين في العلاقات العامة كويس يبقي نركز
مسك: أن شاء الله ها نكونوا عند حسن ظن حضرتك
طارق: انا واثق من كده.
زياد: يعني بلاش لعب عيال.
بسمة: هما مين دول اللي عيال
زياد: انا بتكلم في العموم
بسمة: كنت بحسب بس.
/////////
بعد وقت و صل رشاد و خدهم على مقر الشركة.
///////////
في العربية حبت بسمة ترفع الحرج عن مسك و سالت هي: مستر رشاد عرفنا عن نفسك.
رشاد: أنا اعمل في السياحية منذ سنوات و متزوج و عندي ولد و بنت.
ضحكت بسمة و قالت: ما شاء الله متجوز و عندك اولاد.
أما مسك اللي زعلت و قالت لنفسها : الاول، اول عريس طار ،يا حظك يا مسك.
بصت مسك بغيظ على بسمة اللي تضحك و كلمت مسك نفسها: انا كنت خطتت نعمل الفرح فين و اختارت مكان شهر العسل، انا شوفت الدبلة اللي عليها اسمك و اسمي تمشي قدم عيني، اخس عليك يا رشاد، كنا هنبقي ثنائي رائع، رشاد و مسك، بلاش احباط يا مسك لسه الوقت طويل
/////////
و معدتش وقت طويل و كانت مسكت نسيت رشاد و رسمت احلامها مع شاب تاني و هو صاحب الشركة.
طارق: انا سعيد أن حضرتك كمان تتكلم عربي
اريان : اللغة العربية لغة رائعة الكل يسعي علشان يتعلمها
طارق: انا شرحت لحضرتك كل حاجه ، عند حضرتك اي استفسار
اريان: حاليا لا و لكن الفترة اللي الجاي هنتكلم كتير علشان أنا أفهم طبيعة شغلكم و انتم كمان.
طارق: تحت امر حضرتك يا فندم، و نستأذن دلوقتي
اريان: تمام ،لكن بكرة الغداء عندي في البيت
زياد: شكرا على كرم الضيافه
اريان: اتعلمنا كرم الضيافه من ام الدنيا ، انتم اهل كرم و عز.
طارق: شكرا لحضرتك و أن شاء الله نتقابل بكرة.
////////////
قدم الشركة
طارق: ها نرجع الاوتيل أو نتفسح في البلد
زياد: طبعا نتفسح هو احنا جايين ننام
طارق: رايكم ايه يا بنات
بسمة: موافقين
زياد: تكلمي بالنيابة عن مسك ليه
بسمة: علشان رأينا واحد
طارق: مسك رايك ايه
مسك: زي ما بسمة قالت ،راينا واحد
//////////
و قضوا اليوم الأربعة و هما يلفوا في البلد و كان يوم جميل، و بعد يوم طويل رجعوا الاوتيل
///////
في اوضة البنات
مسك بصوت عالي: هو ده انا كنت بقول على رشاد ينفع، بس طلع جنب اريان صفر على الشمال، اريان اسم و شكل و فلوس و اكيد مش متجوز
بسمة : و عرفتي مين
مسك : واضح اوي عليه.
بسمة : انا هنام اليوم كانت طويل
نامت بسمة. مسك تفكر في اريان و العيشية اللي تعيشها معه بعد الجواز
و بعدين اتكلمت: كنت بحلم اقابل شارو خان
بسمة: و هو شارو خان هيكون مشي في الشارع كده من غير حراسة، تصدقي انك محتاجة علاج
مسك بعصبية: ليه أن شاء الله مجنونة.
بسمة بجدية: أيوة مجنونة و عندك هوس من مسلسلات الهنود و دماغك مفوتة
مسك: نامي يا بسمة و اقفلي بوقك
بسمة: النوم احسن من الكلام معاكي
//////((
في اوضة الشباب.
زياد: هتفضل كاتم في قلبك لحد امت يا طارق
طارق: قصدك ايه ،مش فاهم .
زياد: اطلع من دول يا نمس
طارق: فهمني يا ابني قصدك ايه
زياد: كلمني عن مسك
ش
حاس طارق بالتوتر اول ما سمع إسمها و قال: لو سمحت يا زياد اقفل على الموضوع دلوقتي
زياد: انت هتفضل ساكت لامت، يا ابني لازم تاخد خطوة قبل ما تضيع منك
طارق: عايزني اخد خطوة
زياد: بالظبط
طارق: اخد خطوة ناحية واحدة هي مش شايفيني
زياد: و عرفت مين يا ابو العريف
طارق : من غير تريقة و حياة ابوك ، في الحجات دي تتحس من غير ما تتقال.
زياد: و مخطرش في بالك مثلا، أنها مكسوفة تاخد الخطوة الأولي هي.
طارق: زياد أنا مش في دماغ مسك و اقفل على الموضوع انا عايز انام.
زياد: نام يا عم و بكرة لما تضيع من ايدك ابقي تعال عيط.
طارق: متخافش هعيط بعيد عنك ،اقفل النور خلني انام
قفل زياد النور و استعداد زياد و طارق للنوم،بس طارق يتظاهر بالنوم و هو عقله و قلبه مشغولين ب مسك…
و كلم نفسه: يارتري اخد بنصحية سها و اللي افضل ساكت زي ما أنا، يارب وجهني للصالح.
////////////
في صباح يوم جديد، كانت واقفة مسك في البلكونة و تقول: الجو جميل اوي النهاردة.
خرج طارق من البلكونة اللي جنبها و قال بابتسامه: صباح الخير يا مسك
مسك بابتسامه: صباح النور يا مستر طارق
طارق: خليها طارق بس من غير القاب
مسك: لا طبعا مينفعش
طارق: المهم اعملي حسابك انتي و بسمة النهاردة هنعمل جولة سياحية و بعدين اريان عزمنا على الغداء.
حست مسك بسعادة اول ما سمعت أسم اريان.
مسك بحماس: أنا مبسوطة اوي ،من زمان و نفسي ازور الهند.
طارق: ضحكتك حلوة اوي يا مسك
ضحكت مسك بخجل و قالت: شكرا ،عن اذنك
و دخلت مسك و طارق يبص عليها و نفسه يعترف بحبه ليها.
جاه زياد و قال: خليك كاتم في نفسك كده لحد ما تموت.
طارق: ملكش دعوة.
//////////////
بعد زيارة اماكن كتير ،راحوا بيت اريان.
في قصر اريان
كانت قصر كبير و فخم و مسك بقت تحلم أنها تعيش في القصر ده: ياه لو ربنا كرمني و بقيت مرات اريان و اعيش في العز ده، هبقي زي السلطانة هويام، شكلها هتبقي عايشه فلة.
كانوا قاعدين على السفرة
و الكل ملاحظ أن اريان عيونه على مسك ،و مسك قالت لنفسها: ما شاء الله عليا ،من غير اي مجهود العريس وقع و محدش سمى عليه، يا سلام لو يطلب أيدي دلوقتي و نخلص الموضوع.
أما طارق كان غيران أن اريان يبص على مسك، و اضايق اكتر لما شاف مسك مش مضايقة من نظرات اريان
زياد اتكلم علشان يشغل اريان أنه يبص على مسك،و قال: شكرا على الغدا سيد اريان
اريان: ، أنا مبسوط بوجودكم في بيتي
كان يتكلم و عيونه على مسك
طارق بغيظ مكتوم: خلصوا يا شباب علشان نرجع الاوتيل.
اريان: لسه متكلمنش في الشغل
طارق بعصبية خفيفة: ما هو الواضح أننا مش هنتكلم في الشغل ،يبقي نمشي احسن
و بص على مسك نظرة غضب
اريان: لا طبعا هنتكلم في الشغل بعد الاكل.
طارق: تمام ،زياد خد مسك و ارجعوا الاوتيل انتوا،. و اكمل انا و بسمة
مسك: ليه
طارق: يلا يا زياد
رغم أن مسك اضايقت من طريقة طارق بس نفذت كلامه و قررت تمشي مع زياد، و قبل ما تتحرك ،قال اريان: استني يا مسك عايز اتكلم معاكي.
قلبها دق و قالت: بس لقد وقع في الفخ، هيطلب أيدي و انا اكيد موافقة.
بس طارق اتكلم بعصبية مفرط: مستر اريان ،مسك هتمشي حالا و أنا اللي هكمل معك
اريان بتحدي و هو متاكد ان مسك معجبة بيه،قال: بس انا عايز مسك، و محتاج اتكلم معها و بعدين تمشي.
طارق : و انا قولت لا
اريان: انت كده ممكن توبظ الشغل اللي بينا
طارق: مش مهم عندي، يلا يا زياد خد مسك و امشي
اريان: مسك انا محتاج اتكلم معاكي ضروري.
وقفت مسك في حيرة، اريان هو الفرصة الكبيرة اللي بتحلم بيها و صعب تفرط فيه،و نفس الوقت طارق هو مديرها و ابن بلدها و لازم تسمع كلامه
بسمة: اسمعي كلام طارق يا مسك
زياد: يلا يا مسك نرجع الاوتيل.
اريان: انا متاكد ان كلامي هيعجبك.
و فجأة مسك قالت:
و للحديث بقية
رايكم يا حلوين 🥰
متابعة للصفحة علشان تشوف الفصل التاني اول ما ينزل
#البحث_عن_عريس_هندي
#الفصل_الاول
#روايات_بقلم_منال_كريم
♥️♥️♥️♥️♥️♥️♥️♥️
سبحان الله وبحمده سبحان الله العظيم
استغفر الله العظيم و اتوب اليه
لا اله الا الله وحده لا شريك له له الملك وله الحمد وهو على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
لا اله الا انت سبحانك اني كنت من الظالمين
♥️♥️♥️♥️♥️♥️♥️♥️