ملف أسود بقلم منال كريم
حكاية يقين
في كافية على النيل
: أنا عندي سرطان
قالتها يقين بانهيار لخطيبها اللي عندها ثقة كبيرة أنه هيقف معها، بس هو صدمها و قال بكل هدوء:
أنا اسف يا يقين ،مش هقدر اكمل معاكي.
قال الجملة من غير ما يفكر ثانية واحدة.
اتصدمت و رفضت أنها تصدق و قالت: انت بتهزر صح
حرك رأسه بالرفض و قال: هو الكلام ده في هزار ، المشوار صعب و أنا مش قده، يبقي ابعد من البداية ده الاحسن…
انهارت يقين اكتر و قالت: أنت بجد هتسبني و أنا محتاجلك
رد حسام بكل ببرود: سامحني مش هقدر..
صرخت يقين بجنون: حسام، انت مش هينفع تعمل فيا كده ، انا ضحيت بكل حاجة علشانك، أنت كنت ولا حاجة و أنا اللي وافقت جنبك، كنت بصرف كل فلوسي علشان تكبر شركتك اللي بقي ليها اسم في السوق بفلوسي ، انت متخيل أنك كده غدار.
ثواني صمت و قال: مطلبتش منك تعملي كده ، انتي اللي عملتي كده من نفسك..
كانت يقين واقفة مصدومة مش عارفة تعمل ايه
بس قالت بدموع: عملت كده علشان احنا بنحب بعض و المفروض نقف جنب بعض في كل الظروف.
حسام قلع الدبلة و قال: ربنا يرزقك بالاحسن مني
و مشي و سابها لوحدها، صرخت و هي بتقول: ارجع يا حسام و بلاش هزار، انا عارفة أن ده مقلب، بس مقلب رخم اوي،ارجع علشان انا بحبك.
كان حسام مشي بكل هدوء و كأنه مش كسر قلبها.
قامت يقين رجعت البيت و تقنع نفسها أن ده مقلب من حسام ،هو لا يمكن يعمل فيها كده.
//////////
رجعت البيت و هي مقررة متقولش حاجة لأهلها ،لقت ابوها و امها و صاحبتها قاعدين و بيان عليهم الحزن بعد ما عرفوا نتيجة التحاليل.
قربت سهام منها و قالت: متخافيش يا حبيبتي ،كل حاجة هتكون كويسة.
يقين بابتسامه: انا مش خايفة يا ماما
عبدالله: انا هبيع اللي وراءي و قدمي علشان علاجك ،و عندي يقين برحمة ربنا انه يشفيكي من المرض
يقين: أن شاء الله يا بابا.
ابتسمت حور و قالت: صاحبتي الجميلة انا عارفة انك قوية و تقدري على كل حاجه
يقين: انا قوية علشان عندي صاحبة جميلة زيك.
سهام: طيب هنعمل ايه دلوقتي لازم نبدا في العلاج على طول
عبدالله : هو حسام عرف
اتوترت يقين و مردتش ،سال عبدالله تاني و قال: عرفتي حسام
يقين: أيوة
عبدالله: و رأيه ايه
يقين: طبعا هيقف جنبي.
عبدالله: كنت خايف من ردة فعله ،بس هو طالع راجل
سهام: انا هحضر الغداء علشان نشوف نعمل ايه.
يقين: ادخل اغير هدومي و اخرج.
دخلت يقين و حور وراءها ،اللي سالت: حسام عمل ايه معاكي
ضحكت يقين و قالت: زي ما قولت برة.
حضنتها حور و قالت: انتي كاذبة
انهارت يقين بالدموع و قالت: حسام سابني،قال مش يقدر يكمل معي
حور بغضب: طول الوقت بقول عليه أن شخص وطي.
يقين: هو أكيد قال كده علشان مصدوم ،كام يوم و يرجع ليا
حور: سيبك منه الاهم تفكري في نفسك
يقين: حسام لازم يرجع ليا علشان أنا مش هعرف اكمل من غيره،انا بحبه بجنون.
حور :يلا نخرج نأكل.
حور كانت متاكده أن حسام شخص جبان و بتاع مصلحته علشان كده مش هيكمل مع يقين..
/////////////////
عدي اسبوع
و كانت يقين بدأت في العلاج و حسام مفكرش يرفع عليها سماعة التلفيون
في البيت كانت نائمة يقين في اوضتها من التعب بعد ما رجعت من جلسة العلاج
في الصالون
عبدالله: انا مستغرب أن حسام متخفي طول المدة دي
سهام: يمكن عنده شغل
عبدالله: حتي لو عنده شغل مش فاضي ساعة واحدة
سهام: انا كمان مستغربة معقول قرر يفسخ الخطوبة
عبدالله: لو عمل كده يبقي جبان
سهام: احنا نحير نفسنا ليه ، اتكلم معه و اساله
طلب عبدالله رقم حسام و رن عليه ،اول ما فتح الخط قال: ازيك يا عمي
عبدالله: الله يسلمك ،عامل ايه يا حسام
حسام: الحمد لله كويس،يقين عاملة ايه
عبدالله: الحمد لله ، بقولك محدش بيشوفك ،مش المفروض تكون جنب يقين الفترة دي
حسام باستغراب: هي يقين معرفتش حضرتك
عبدالله: عرفتني ايه
حسام: أنا سببت يقين اول ما عرفت انها مريضة
ضحك عبدالله بسخرية و قال: فعلا الناس معادن و تظهر وقت الشدة و الحمد لله أن ده حصل علشان نعرف انك متساهلش بنتي ،انت خسرت و يقين كسبت
و قفل عبدالله الخط في وشه.
سهام بدموع: يا كسرت قلبك يا بنتي،منك لله يا حسام،يارب ما تشوف يوم حلو في حياتك.
عبدالله بحزن: خالص يا سهام، نقفل على الموضوع
سهام: هنتكلم مع يقين
عبدالله: اكيد
بعد شوية صحيت يقين ،قعد ابوها معها و قال بهدوء: انا كلمت حسام النهاردة
اتوترت أن يكون حسام قاله حاجة و سالت: كلمته ليه يا بابا ؟
عبدالله: علشان اعرف محدش بيشوفه ليه؟
اتجمعت الدموع في عيونها و سالت: و عرفت يا بابا
عبدالله: ليه كذبتي عليا
يقين: علشان توقعت انه مصدوم من الخبر ،افتكرت أنه ميقدرش يعيش من غيري
عبدالله : و هو قادر يعيش من غيرك و انتي كمان لازم تبقي قادرة، انتي قوية مش ضعيفة
حركت رأسها بالرفض و قالت بدموع: لا يا بابا أنا ضعيفة مش قوية، انا مقدرش اعيش من غير حسام، أنا أضعف مما تتخيل
عبدالله بتحفيز: انتي شايفة كده بس انا بقولك انك قوية و هتعدي المحنة دي .
سكتت يقين و هي واثقة أنها مش هتقدر تتخطي حب حسام.
/////////
بعد اسبوع
كانت يقين سابت شغلها لأنها بقت ديما تعبانة..
و كانت قاعدة في اوضتها،رن التلفيون كانت واحدة صاحبتها، ردت يقين: ازيك يا سمر
سمر: أزيك يا يقين ،عاملة ايه يا حبيبتي.
يقين: الحمد لله
سمر بتوتر: عايزة أسألك على حاجة
يقين: مالك صوتك ،متوترة كده ليه
سمر::النهاردة وصلت دعوة فرح من حسام،افتكرت أنك العروسة بس لقيت أسم تاني..
اتصدمت يقين و قالت: انتي متأكدة يا سمر
سمر: أيوة
يقين: ابعتي صورة الدعوة على الواتس
بعتت سمر الدعوة و قلبها انكسر لما لقت اسم واحدة تانية جنب اسمه، نزلت دموعها و قالت: المفروض أن ده مكان أسمي أنا ،ازاي تعمل فيا كده يا حسام.
قفلت مع سمر و رنت على حسام بس مفيش رد.
قامت غيرت هدومها و لقت ابوها و امها قاعدين في الصالة ،سال عبدالله: على فين يا حبيبتي
يقين::حور عندها مشكلة اروح اشوفها و اجي
سهام: علشان كده شكلك معياطة
يقين: لا عادي مفيش حاجه
عبدالله: استني اجي معاكي
يقين: لا يا بابا الموضوع مش متساهل.
و مشيت يقين و هي بتهرب منهم.
ركبت تاكسي ورحت على شركة حسام ،الشركة اللي وقفت على رجله بفلوسها.
/////////((
في الشركة
يقين: ممكن اقابل حسام
السكرتيرة: أقوله مين
يقين: يقين
قامت السكرتيرة تبلغ حسام و طلب من السكرتيرة تخليها تستنا شوية
عدي نصف ساعة و يقين لسه مدخلتش ،قالت::لو سمحتي امت ادخل لحسام
السكرتيرة: حالا يا فندم
زعقت يقين و قالت:: كل شوية تقولي حالا و فات ساعة
السكرتيرة :؛هبلغه حسام باشا
ضحكت بسخرية و قالت: باشا
دخلت السكرتيرة مكتب حسام و خرجت قالت: اتفضلي حضرتك
دخلت يقين و على وشها ابتسامة كبيرة و قالت: ينفع كده يا حسام تسبيني كل ده
رد حسام ببرود و قال: معلش عندي شغل
يقين: ربنا يوفقك
حسام: عايزة ايه يا يقين
فتحت الموبايل على الصورة و قالت و هي بتضحك : سمر بعت ليا الصورة دي و بتقول أنها دعوة فرحك بس انا قولت ان ده مقلب منك
رد بمنتهي الهدوء و هو يقول: ده مش مقلب ده حقيقية انا خالص هتجوز
شاورت على نفسها و قالت: و انا
حسام: مبقتش احبك
صرخت و هي بتقول: اسكت يا حسام، اسكت خالص، انت بتحبني انا ، أنت قلبك ميعرفش يحب غيري.
قام من مكانه و قال: افهمي بقي يا يقين انتي مرحلة و عدت
نزلت دموعها بانهيار و قالت: بقولك اسكت انت مش عارف حاجه ، انت بتحبني ،جرب كده ،قول بحبك يا يقين ،قول يا حسام ، انت مينفعش تحب غيري ، انت قلبك مشغول بيا ، انا معك في كل مرحلة من حياتك
زعق حسام و قال: افهمي يا يقين انا خالص قفلت صفحتك و فرحي قريب ،انا مش هعمل فيها بطل و اتجوزك و اقضي عمري كله بين المستشفيات و كل فلوسي تخلص على علاجك انا لسه في بداية طريقي و لازم احقق حلمي
قامت وافقت قصاده و قالت: انا قضيت وقتي كله وسط العمال علشان اعمل الشركة دي، دلوقتي يتقال عليك باشا بسبب فلوسي و فجأة كده تخلي عني و انت عارف أني مش هقدر اكمل من غيرك
حسام: هتقدري، محدش بيموت وراء حد
صرخت و هي بتقول: صدقني انا هموت من غيرك أنا بحبك بجنون ،مش هقدر اكمل من غيرك، قول انك لسه بتحبني و مش هتقدر تكمل من غيري
حسام: بس انا عادي هقدر
ثواني و هي بتص عليه و دموعها تنزل بانهيار
حسام: امشي يا يقين علشان عندي شغل.
يقين: بس انا بحبك
حسام: و انا بطلت احبك ،يلا امشي من هنا
يقين: لو حد قالك يقين ماتت اعرف أن ذنبي في رقبتك.
و مشيت يقين اللي كانت تمشي خطوات ضعيفة و مهزوزة..
//////////////////
خرجت يقين من شركة حسام و بتمشي في الشارع و هي منهارة من العياط و حزينة على حبه للشخص الغلط…
رنت حور عليها و سالت بقلق: انتي فين يا يقين
يقين بدموع: ماشية في الشارع و مش عارفة اروح فين.
حور بحزن : يا تجي عندي أو اجيلك انا.
يقين: انا هاجي عندك..
//////////
في بيت حور
حور بهدوء: أنا عارفة انك حزينة ، و عندك حق تزعلي على حبك، بس لازم تخطي الموضوع علشان نفسك و صحتك.
ردت يقين بحزن: حور انا مش هقدر اكمل من غير حسام، الحياة هتقف من بعده، اتكلمي معه يا حور علشان يرجعلي.
زعقت حور و هي بتقول: افهمي يا يقين ،حسام شخص جبان. خاين ، استغل حبك و بعدين سابك ،هو شكله كان ناوي يبعد عنك حتي لو مكنتيش تعبانة، علشان كده انسي الشخص ده و اقفلي الصفحة
يقين: تفتكري هقدر
حور: اكيد و انا معاكي و ابوكي و امك و الاهم مننا ،ربنا معاكي يا حبيبتي ،دلوقتي نركز في علاجك
يقين بحزن: أن شاء الله
/////////
تعدى الايام و الحزن ظاهر على يقين مش قادرة تتخطى حسام و كل يوم يمر و يقرب فرح حسام تنكسر اكتر
و التعب زاد عليها لأن النفيسة اهم حاجة في علاجها.
عبدالله بحزن: عجبك حالتك كده، هو يستاهل اوي تعملي في نفسك كده.
سكتت و تعيط بس، و قالت سهام : يا بنتي لو صحتك مش فارقة معاكي ، فا هي فارقة معنا احنا،حرام عليكي تعملي كده في نفسك علشان واحد قليل الاصل.
يقين معندهش رد هي عارفه أنه مش يستاهل و مع ذلك مش قادرة تبعد عنه.
/////////
و تعدى الايام لحد يوم فرح حسام.
كانت يقين في اوضتها و تتصل على رقم حسام، بعد كام مرة رد بعصبية: عايزة ايه ؟ انتي ليه مش بتفهمي، انتي خالص برة حياتي ، و انا اكيد مش فاضي ليكي النهاردة علشان كل الاتصالات دي
يقين بصوت تعبان و حزين بعد ما المرض و الحزن قضوا عليها، قالت: حسام ،بلاش تتجوز ،علشان خاطري بلاش، لأجل أي لحظة حلوة عاشنها سوا بلاش ،صدقني ممكن أموت فيها، ارجعلي و أن شاء الله لانك معي اخفف، بس ارجع.
نفخ حسام بضيق و قال::استغفر الله العظيم ، يا بنتي افهمي و خلي عندك كرامة ،انا مش عايزك ، ابعدي عني بقي.
يقين بغضب: طيب انا عايزة فلوسي
ضحك بصوت عالي و قال: فلوس ايه ،اثبتي اني خدت منك حاجه ،انتي عملتي كل حاجه بمزاجك
و قفل الخط و هي فقدت الوعي.
بعد شوية
دخلت سهام تتطمن على يقين ،قربت منها و قعدت جنبها على السرير و قالت: يقين ،قومي يا حبيبتي خدي العلاج
مفيش رد، حركت فيها من غير رد، صرخت بخوف، دخل عبدالله برعب و سال : في ايه
صرخت سهام و هي بتقول: الحقني يا عبدالله، يقين مش بترد عليا
قرب منها و حاول يفوقها بكل الطرق بس من غير فايدة
طلب الإسعاف و مشيوا على المستشفى
/////((
في المستشفى
واقفين عبدالله و سهام و الرعب مالي قبلهم على بنتهم الوحيدة، جت حور تجري بخوف و وراءها جوزها
سالت برعب: يقين عاملة ايه
سهام بدموع: محدش قال حاجه
محمود ( جوز حور) أن شاء الله هتكون كويسة و بخير
عبدالله: يارب يا ابني
مسك محمود ايد عبدالله و قال: تعال ارتاح يا عمي
عبدالله بامتنان:: شكرا ليك يا محمود، مش عارف لول وجودك معي كنت عملت ايه، انا و سهام ملناش حد غير يقين، و ربنا كرم يقين و كرمنا معها ب حور اللي كانت و نعمة الصديقة و الاخت و بقت بنتنا و أنت كمان بقيت زي ابني
محمود: متقولش كده يا عمي احنا اهل و أن شاء الله يقين هتكون بخير.
///////
عند يقين حرفيا كانت بتصارع الموت
بعد شوية خرج الدكتور و قال: الحمد لله الحالة دلوقتي كويسة ،بس نفسيتة المريض مش احسن حاجه
حور: هتروح عند دكتور نفسي
الدكتور: المستشفي هنا بتوفر دكاترة نفسين علشان أي مريض سرطان يبقي محتاج دعم، هي أول ما تقدر تتكلم هبعت لها اشطر دكتور هنا.
عبدالله: تمام
//////(/(/
في اوضة يقين
كانت نائمة على السرير بتعب و معها في الاوضة عبدالله و سهام و حور
عبدالله: عاملة ايه دلوقتي
ردت بصعوبة: الحمد لله بخير
سهام بعتاب: كده يا يقين توجعي قلبي عليكي
حور: مش وقته يا طنط.
قالت بحزن؛ انا اسفة
و بقت تفكر أن حسام خالص اتجوز غيرها.
///////
قدم اوضة يقين
كانت معتصم واقف مع محمود وقال: انت بتعمل ايه هنا
محمود: انت اللي بتعمل ايه هنا
ضحك معتصم و قال: انا دكتور هنا
محمود بحزن: انت اشهر و اشطر دكتور نفسي ، بس انا مش متاكد انك هتقدر تعالجها علشان هي مدمرة نهائي
معتصم بص في الملف الخاص بحالتها و شاف أسمها و قال :انت تباع حالة يقين عبدالله
محمود: أيوة
طبط على كتفه و قال: متخافش يا صاحبي هعمل كل ما بوسعي
و خبط على باب الاوضة
رد عبدالله: اتفضل
دخل معتصم و على وشه إبتسامة و قال: السلام عليكم
رد الكل: و عليكم السلام
معتصم: انا الدكتور النفسي و محتاج اتكلم مع الانسة على انفراد
حور: يلا يا طنط
عبدالله: ربنا يجعل الشفا على ايدك
معتصم : أن شاء الله
و خرجوا كلهم ، قعد معتصم على الكرسي اللي قصادها و قال بهدوء: ازيك
مفيش رد منها و بصت الناحية التانية
ابتسم و قال: بلاش ازيك، عاملة ايه
مفيش رد منها، فقال : مفيش إجابة برضو، طيب يا ستي مالك زعلانة ليه
بصت عليه و كأنه بتقول أنا مش زعلانة
معتصم: طالما مش زعلانة أهلك زعلانين ليه.
مردتش عليه، خد نفس و قال : طيب مبدئياً كده لو فضلتي ساكتة انا مش هقدر اساعدك
يقين: انا مش عايزة مساعدة منك
ضحك و قال بهزار: اه يا قلبي قصف جبهة في المنتصف، فين جبر الخواطر، انا دكتور غلبان و على قدي، طلبوا مني اساعد الناس علشان اقبض اخر الشهر.
و بص حواليه كأنه خايف من حد و قال: و بيني و بينك انا اللي عايز مساعدة.
ابتسمت ابتسامة بسيطة ،قال معتصم: ضحكت يعني في أمل اقبض اخر الشهر.
تنهدت بحزن و قالت: متحاولش معي علشان انا فقدت الشغف في كل حاجه
معتصم: و ليه كل ده علشان تعبانة شوية ، ربنا قادر على كل شيء و أن شاء الله بالعلاج تبقي كويسة.
يقين: يعني في أمل اتعالج
معتصم: أن شاء الله
نزلت دموعها و قالت بحزن: و طالما ممكن أكون كويسه،هو ليه سابني..
معتصم: اه حب و كده.
يقين بحزن: تقدر تقول الحب اللي وصل لحد الجنون ،كنت وافقة معه في كل الأوقات و الأزمات و اول ما عرف اني تعبانة قرر يسبني و النهاردة فرحه.
معتصم بهدوء: طبعا محدش ينكر الالم اللي قلبك حاسس بيكي ، و من حقك تفقدي الشغف انك تكملي في الحياة، انتي شايفة حياتك مش مهمة بعد ما سابك صح.
يقين بحزن: صح
معتصم: و بالنسبة لأهلك حياتك مهمة ليهم او لا ،وجعهم فارق معاكي يا يقين، شايفة الحزن اللي بيان عليهم، علشان شخص باع ،قررتي انتي تبيعي أهلك ،انتي شايفة ده عدل، اللي الشخص ده عمله معاكي ظلم و انتي كمان ظلمتي أهلك اللي وافقين برة و هيموتوا من الرعب عليكي .
يقين: انا مش قصدي كده، بس انا حياتي من غيره ملهاش لازمة.
معتصم : و انا باكد ليكي أن حياة أهلك من غيرك ملهاش لازمة، كده انتي تختاري موتك و موتهم معاكي ، حاربي يا يقين لو مش علشانك مع انك تستاهلي ،يبقي علشان اهلك، مش شخص غلط دخل حياتك و حاول يدمرها يبقي الدنيا خلصت ،فين روح المحاربة و جو انا قادرة و مش بخاف.
يقين: تفتكر أنجح من غيره
معتصم: مش هفتكر انا متأكدة أنك هتنجي.
يقين: قول كلام مقنع علشان اصدقك ، متأكد ازاي و احنا لسه شايفين بعض من دقائق
معتصم: علشان انا ليا وجهه نظر في الشخص اللي قدمي
يقين: طيب تفتكر هو ليه سابني
معتصم: انا واثق أن قرار الانفصال كان في دماغه و هيلاقي بدل الحجة الف علشان يبعد، و استغل مرضك و قال يهرب، لو تسالي ليه،علشان في أشخاص في حياتنا كده تاخد كل حاجه منك و بكل هدوء تمشي بعد ما حطمت و كسرت قلبنا..
يقين: لو بيموت قدمي مش هسامحه
معتصم: بعيد عن الشخص ده عايز اطمن على نفسي ،هتكملي معي علاج
ضحكت يقين و قالت: أن شاء الله اطمن بقي هتبقض اخر الشهر.
معتصم بصوت عالي: الحمد لله يارب
و كانت بداية رحلة جديدة ل يقين
/////////
تاني يوم
كانت يقين تاخد جلسة كيمائية و هي بتموت من كتر التعب بس هي مش بتكلم ،دموع بس مع ذكر الله و الدعاء ..
///////
بتعدى الايام و يقين تتعالج جسديا و نفسيا، و رغم جلسات العلاج النفسي لسه مش قادرة تنسي حب حسام.
في عيادة معتصم
قال بهدوء: و بعدين يا يقين
يقين بحزن: و بعدين ايه
معتصم: عدى وقت و انتي لسه مش عارفة تنسي
نزلت دموعها و قالت: صدقني غصب عني.
معتصم: مفيش حاجه اسمها غصب عني، انتي لازم تحاولي بس انتي خدتي الطريق السهل
اتعصبت يقين و قالت: لو سمحت اتكلم بطريقة كويسة.
معتصم: انا طريقتي كويسة بس من الواضح أنك تدوري على حجة علشان متجيش تاني، و انا مش همنعك تعملي كده، بس اسمعي مني اخر حاجة.
يقين: اتفضل
معتصم: كان في مريض عندي اتعالج معي لمدة سنتين من حبه لبنت اتخلت عنه، و في اخر جلسة بينا سالته، عايزة تقول حاجه
ضحك معتصم بسخرية و سال: عارفة قال ايه
يقين بفضول: قال ايه
معتصم: قال اول حاجه اعملها لما أخرج من هنا، اروح على بيتها و اعرفها اني اتعالجت و نسيت حبها، عارفة معني كلامه ؟
يقين بحزن: هو لسه مريض بحبها و معرفش ينسي.
معتصم: وقتها انا قولته انت مش عايز تتعالج و عجبك جو الضحية فاكر انك ممكن تصعب عليها، بس هي نسيت حبك و انت مش عايز، حالتك نفس حالته انتي مش عايزة بس تقدري تنسي يا يقين ، حاولي يا يقين ،و لو مش عايزة انا اللي مش عايزك تجي العيادة.
بصت عليه بصدمة و قبل ما تنطق بكلمة ،شاور على الباب و قال: يلا برة الجلسة خلصت.
بصت على الباب و بعدين عليه و مشيت بكسوف.
////////
كانت حور مستنيها برة ،سالت : عملتي ايه النهاردة
يقين بعصبية: اعمل ايه يعني
و خرجت يقين من العيادة و حور وراها.
////////////////
في عربية حور
حور: مالك يا بنتي متعصبة ليه كده.
يقين بعصبية: تخيلي الدكتور الغبي طردني من عنده
حور: طردتك ليه؟
يقين بحزن: علشان مش عارفه انسي حب حسام.
وقفت حور العربية فجأة و بصت على يقين و صرخت بغضب: انتي غبية يا يقين علشان بتفكري في حسام، ده واحد خاين و من زمان من قبل ما تتعبي بس انتي كنتي عامية، انا شخصيا يا ما حذرتك و قولتك حسام مش كويس و انتي مش فاهمة حاجة
يقين بصدمة: انتي بتكلمي كده ، زي ما تكوني عارفة حاجة
حور: لا مش عارفه حاجه ، غير أن اللي قدمتي له كل حاجه فا اول مطب سابك لوحدك، عايزني اعرف ايه غير أنه اتجوز واحدة تانية يبقي خاين او لا
يقين بعدم تصديق: انا متأكدة أنك عارفة حاجة تانية.
حور: مفيش حاجه شكلك نسيتي اللي فاتت.
و مشيت حور بالعربية و يقين عقلها مشغول بكلام حور ،وصلت يقين قدم بيتها نزلت يقين من غير كلام و كملت حور على بيتها
وقفت يقين قدم باب العمارة و رجعت فلاش باك
/////(((
كانت يقين بتكلم حسام في التلفيون و قال وسط الكلام: كنت عايزة اقولك حاجه و ياريت متفهميش غلط
يقين: انت عارف اني عمري ما فهمتك غير صح.
حسام: عندي احساس أن حور بتغير منك
ضحكت يقين و قالت: نعم انت بتقول ايه يا حسام حور دي اختي لو عندي اخت مش هنحب بعض كده
حسام : يا حبيبتي فكري كويس أنا هكذب ليه، انا بقولك كده لما لقتها بتحاول تقرب مني.
صرخت يقين و قالت: انت مجنون يا حسام أنا عمري ما اصدق كلامك ده، و بعدين حور مخطوبة و قربت تجوز و بتحب محمود
حسام ببرود: براحتك يا يقين
و قفل الخط و الحقيقة ان حسام حاول يقرب من حور و فكر أن قبل حور ما تقول ل يقين هو اللي يسبق.
و فعلا وصلت حور عند يقين و قالت بصدمة و حزن : يقين شوفتي حسام عمل ايه
يقين بهدوء: عمل ايه
حور بدموع: حاول يقرب مني
ضحكت يقين بحزن و قالت: بطلي كدب يا حور ،اللي حصل هو العكس ،انتي ازاي تعملي فيا كده انا اختك مش صاحبتك
حور بصدمة: انتي صدقتي كلامه
يقين بغضب: انا صدقت الحقيقية
صرخت حور و هي بتقول: الحقيقية أن حسام شخص خاين و جبان و انتي عامية
يقين : انا مبسوطة ملكش دعوة.
دخلت سهام و قالت: في ايه بناتكم أصواتكم عالية ليه
حور بدموع: مفيش حاجه
و مشيت حور و هي حزينة أن يقين شكت فيها، و لمدة شهرين فضلوا متخاصمين لحد فرح حور و سهام اللي صالحتهم على بعض رغم أنها مش عارفة السبب.
///////
عودة
خبطت على رأسها و قالت بصدمة: وقتها صدقت حسام و كذبت صاحبة عمري، و حتي لما رجعت اكلمها مفتحتش معها الموضوع تاني و هي مرضتش تكلمني في الموضوع و انا كنت غبية.
ركبت تاكسي و مشيت على بيت حور
///////
في بيت حور
كانت وصلت و كان معتصم موجود مع محمود ،قعدت معاهم و هو قال: شوفتي صاحبتك
حور بعصبية: انت ازاي تطرد صاحبتي من عندك
معتصم: صاحبتك مريضة عندي و مش بتفهم
حور بصوت عالي: معتصم متقولش كده على يقين انت فاهم
معتصم بتريقة : يا اختي انتي و صاحبتك عايزين مستشفي مجانين
بصت حور على محمود اللي يضحك عليهم الاتنين و قالت: محمود سكت صاحبك.
محمود بابتسامه: بطلوا انتوا الاتنين شغل عيال و اتكلموا بعقل
معتصم: حور ملكيش دعوة بشغلي
حور: مش انت اللي بتقول شوفتي صاحبتك
معتصم: انا غلطت اقفل بوقي ،و قومي اعملي كوبية شاي .
حور: لا
معتصم : اخس عليكي ،يعني أنا صاحب جوزك و ابن خالتك و مش عايزة تعملي كوبية شاي.
حور: اه، قوم أنت اعمل
معتصم: ايه يا استاذ محمود فين السيطرة
محمود: ذهبت مع الريح ، انا هنا باكل عيش
قام معتصم و قال: و الرجالة ماتت في الحرب
و معتصم ماشي على المطبخ ،سمع خبط الباب، رح يفتح ،و كانت يقين اللي منهارة من العياط ، سال بخوف: يقين مالك
اول ما حور سمعت اسمها جريت على برة و محمود وراءها
وقفت حور قدم يقين و مكنتش محتاجة تسأل في ايه، علشان هي فهمت، نزلت دموع حور و قالت يقين بندم: انا اسفة
حضنتها حور و الاتنين انهاروا من الدموع
و الشباب وافقين و مش فاهمين حاجه
معتصم بصوت وطي: هو في ايه
محمود: مش عارف
شوية و قال محمود: حور ادخلوا جوة علشان نقفل الباب علشان الجيران.
مسكت حور ايد يقين و دخلوا أوضتها.
محمود بحزن: يقين صعبانة عليا اوي، حاول يا معتصم تعالجها
معتصم : صدقني بحاول بس هي لازم تساعدني.
محمود: بالنسبة ل يقين نسيان حسام صعب ،الموضوع هياخد وقت.
معتصم: ليه يعني
محمود: الحب يا صديقي.
ضحك معتصم و قال : الحب مظلوم معانا، علشان ده مش حب ده جنون و تعلق مرضي..
/////////////
في اوضة حور
حور: ممكن تهدي و كفاية عياط
يقين بندم: انا اسفة يا حور، انا كدبت كلامك و صدقت حسام، انا مش عارفة ازاي كنت غبية للدرجة دي، حسام طول الوقت كان يلعب بيا و انا مبفهمش حاجة
طبطت حور عليها و قالت: ممكن كفاية بقي ،حاللتك دي ممكن تاثر عليكي و تتعبي ،كفاية عياط و كفاية حزن، ركزي في عالجك ده الاهم
يقين: اوعدك يا حور اني اتعالج و أبطل أفكر في حسام…
حضنتها و قالت: أنا واثقة فيكي يا يقين.
قامت يقين و قالت : انا همشي بقي علشان اتاخرت
حور: استني اجي هوصلك
يقين: لا
خرجت يقين و حور وراءها
كان لسه معتصم قاعد مع محمود ؛ قربت يقين منه و قالت: انا اسف يا دكتور
ضحك معتصم و قال: حصل خير.
يقين: أنا ها التزام بالعلاج..
معتصم: اتمني انك تكوني صادقة المرة دي
يقين: أن شاء الله
اتحركت علشان تمشي و قالت حور: انا جاية اوصلك.
نفخت يقين بضيق و قالت: صدقني هعرف اروح لوحدي و اول ما اوصل اعرفك ، يلا سلام
حور: خلي بالك من نفسك
يقين: حاضر
///////////////
اول ما رجعت يقين البيت ،قعدت مع ابوها و امها و قالت: بابا و ماما أنا اسفة لو زعلتكم ،اوعدكم أن شاء الله مش هزعلكم تاني.
عبدالله: يا حبيبتي احنا عمرنا ما هنزعل منك المهم تكوني كويسة..
سهام: الاهم عندنا هو انتي ،المهم تبقي بخير.
يقين: خلاص انا فوقت من الوهم و أن شاء الله ابقي كويسة .
///////////
و للمرة الثانية قررت يقين تبدأ العلاج بس المرة دي بجد
////////////
بعد شهور
في مكان مفتوح ،كان معتصم عامل جلسة علاج جماعية
اتكلم معتصم بهدوء: النهاردة حببت الجلسة تكون جماعية و كمان في مكان مفتوح ،علشان تغيروا جو ، النهاردة مطلوب منكم حاجة بسيطة جدا ،،،و هي تتصلوا بشخص ،في كلام جواكم عايزين تقولوا من غير خوف أو خجل كل اللي جواكم تطلعوا.
سالت يقين: شخص واحد بس
معتصم: براحتكم
بدأ الكل يمشي في حتة بعيد علشان يتكلموا في التلفيون
و كان آخر شخص هي يقين ، و معتصم يبص عليها بتركيز ،لانه للاسف وقع في حب مريضته ،
أما يقين أول شخص جاه في بالها هو حسام.
قامت علشان تكلمه و مشي معتصم وراءها بدافع الغيرة و الفضول.
رنت يقين على حسام ،اللي اول ما فتح الخط ،قال: ازيك يا يقين
استغربت يقين و سالت: غريبة يا حسام رقمي لسه معاك ليه.
حسام: انتي الحب يا يقين و مقدرش انساكي.
ضحكت يقين بسخرية و قالت: اه الحب و أنت سيد مين يعرف الحب، اسمعني يا حسام أنا اتصلت النهاردة علشان عندي كم كلمة عايزة اقولهم ليك.
حسام ببرود: اتفضلي يا حبي.
يقين بكل هدوء: انت شخص جبان و خاين و وطي و انا كنت غبية اني في يوم حبيت واحد زيك، بس الحمد لله فوقت من وهم حبك…
و قفلت الخط و هي حاسة براحة كبيرة و معتصم فرحان اكتر منها علشان متاكد انها صادقة و مبقتش تحب حسام
رنت يقين على تلفيون ابوها و قالت: ازيك يا بابا
عبدالله: الحمد لله يا حبيبتي
يقين: ماما جنبك
عبدالله: أيوة
يقين : افتح الاسكيبر علشان تسمع كلامي
فتح عبدالله الاسكيبر و قالت: ماما و بابا شكرا ليكم على كل حاجه انا عارفة اني تعبتكم معي الفترة اللي فاتت بس لول وجودكم كنت وقعت من زمان، انا بحبكم اوي.
سهام بدموع: احنا بنحب اكتر يا حبيبتي و بعد الشر عليكي من كل شر
عبدالله: ايه الكلام ده يا يقين انتي حتة مننا و نعمل ايه حاجة علشان خاطرك
و قفلت يقين مع اهلها ورنت على صديقه عمرها و قالت: بصي يا حور انا حياتي من غيرك ملهاش طعم و لون انتي رمانة الميزان في حياتي ،صدقني مهما اشكرك مش هوفي حقك ،شكرا على كل حاجه
ردت حور على الكلام بجملة بسيطة : بحبك يا يقين
يقين: انا بحبك اكتر..
و قفلت يقين و هي حاسة أنها طائرة من على الارض و كلمت نفسها : شخص واحد نفسي اقدر اقول اللي في قلبي من ناحيته
و زي ما وقع الدكتور في حب مريضته ،وقعت المريضة في حب الدكتور و الاتنين خايفين يتعرفوا لبعض….
قرب منها بتوتر و سال: عملتي ايه.
فركت بايديها بتوتر و قالت: زي ما حضرتك طلبت كلمت حد،،و قولت كل اللي في قلبي.
معتصم: و دلوقتي حاسة انك احسن.
يقين: أيوة
معتصم: تعالي نتمشي سوه
حركت رأسها بالموافقة و الاتنين ماشين جنب بعض و يخطفوا نظرات من بعض و كل شخص فيهم جواه حرب.
كلم معتصم نفسه: أنا حبي لمريضة عندك،كده خونت الأمانة المهنية، ازاي أعمل كده ،و كمان انا متأكد أنها بتحب واحد تاني ،يعني عمرها ما تحبك انت، انسي يا معتصم علشان ده حب مستحيل.
و يقين بتكلم نفسها و تقول: انا متأكدة لو اعترفت بحبي ،معتصم مش هيصدق ،هيقول أن مينفعش علاقة بين الدكتور و المريضة و كمان هيتفكر اني لسه بحب حسام ، بس انا نسيت حسام و مبقتش شايفة غير معتصم، انا ديما حظي وحش في الحب، لتاني مرة اخسر اللي بحبه علشان معتصم عمره ما يكون ليا.
و كملوا مشي من غير ما حد ينطق بحرف، الاتنين بالهم مشغول ببعض..
///////////
انتهت الرحلة اللي حسنت نفسية يقين و كل اللي معها،و هي لسه تحارب المرض.
في المستشفى
حور بفرحة: انتي بتقولي ايه
يقين: بقولك بحب معتصم
قامت حور من على السرير و هي ترقص بسعادة ، و قالت: الحمد لله انك تخطيت حسام
يقين بحزن: اقعدي يا حور علشان الموضوع كده كده مش نافع
قعدت حور و سالت: ليه
يقين بحزن: تفتكري معتصم يحب حد زي
حور باستغراب: انتي مالك ،انتي بنت زي الفل و اي شاب يتمنه واحد زيك.
ضحكت يقين بسخرية و قالت: بلاش تصدقي نفسك، انتي شايفة كده علشان صاحبتي ،بس انا بالنسبة ل معتصم مجرد مريضة و كمان هو عارف اني كنت بحب واحد قبل كده
حور: كل ده مش مبرر ، انتي مش اول واحدة تكون مخطوبة و متكملش و كمان بتحصل كتير الدكتور يتجوز مريضة عنده
يقين بتعب: أنا اتكلمت معاكي علشان محتاجة اتكلم بس اقفلي على الموضوع.
حور: بس
يقين : عايزة انام.
خرجت حور من الاوضة و بتفكر ازاي تعرف اذا كان معتصم بيحب يقين أو لا ..
//////////
في مكتب معتصم
هو كمان حكي لمحمود صاحبه كل حاجه
محمود: و ايه المشكلة انك بتحب يقين و تكمل معها
معتصم : أنت اللي بتقول كده و أنت عارف قد ايه هي بتحب حسام و ممكن تشوف اني استغلت انها مريضة عندي
محمود: بلاش التفكير ده، انا شايف اقصر طريق هو الصراحة ،اعترف لها بمشاعرك و هي لها حق الاختيار
معتصم : اسكت يا محمود و الموضوع ده سر بيني و بينك بلاش مراتك تعرف.
محمود: سرك في بير يا اخويا.
/////////////
في العربية
محمود و حور كانوا راجعين من المستشفى
الاتنين عايزين يتكلموا في الموضوع بس خايفين علشان معتصم و يقين ميزعلوش منهم.
حور: مالك يا محمود
محمود: مالك انتي
حور:عايزة اقولك حاجه بس يبقي سر بيني و بينك
محمود: في بير
حور: يقين بتحب معتصم
وقف محمود العربية بصدمة و قال: بتقولي ايه
حور: مالك مصدوم كده
محمود بسعادة: علشان معتصم بيحب يقين و مش عارف يعترف لها ازاي.
ضحكت حور بسعادة و قالت: طيب و احنا هنعمل ايه يقين مصممة تكتم مشاعره علشان كلام اهبل
محمود: و معتصم نفس القصة و احنا كا أصحابهم لازم نعمل حاجه
حور: اقولك انت ابعت رسالة ل معتصم فيها أن يقين بتحبه و انا ابعت ل يقين أن معتصم بيحبك و هما يعترفوا لبعض.
محمود: ممكن يزعلوا منا
حور: مش مهم المهم الاتنين يجتمعوا .
و بالفعل في نفس الوقت بعت محمود رسالة ل معتصم و حور ل يقين..
////////
في المستشفى
كان معتصم قاعد مع يقين و أعلن تلفيونه و تلفيونها على وصول رسالة بس محدش فيهم شاف الرسالة.
و سال: عاملة ايه في العلاج
يقين : الحمد لله و الدكتور قال إني أن شاء الله انتصر على السرطان
معتصم: انا واثق من كده ،علشان انتي قوية مش ضعيفة
يقين: كنت ضعيفة بس بقيت قوية بسببك
معتصم: انا معملتش حاجة
يقين: لا عملت كتير يا دكتور، خلتني اعرف قيمة نفسي،بسبك بصيت لاي موضوع بوجهت نظر تانية، شكرا يا دكتور
خد نفس و قال: العفو انا بعمل شغلي
ضحكت و افتكرت أول مقابلة بينهما و قالت: اه بتعمل كده علشان تقبض المرتب صح
معتصم: صح
تلاقت عيونهم في نظرة و علشان يهربوا من بعض كل واحد فيهم بص في التلفيون و كانت الصدمة
في نفس الوقت بصوا على التلفيون و بعدين بصوا على بعض بصدمة
من غير تفكير قال معتصم: يقين انا بحبك و كنت خايف تكوني لسه بتحبي حسام.
هي كمان ردت بدون تفكير : انا كمان بحبك، و حسام مجرد ماضي.
معتصم بسعادة: تقبلي تجوزني
يقين: استنا لما اتعالج
معتصم: عايز اتجوزك علشان اكون معاكي في رحلة العلاج
يقين: يعني هتفضل معي و عمرك ما تزهق مني.
معتصم:عمري ما ازهق علشان انا بحبك في كل حالاتك.
يقين: و أنا بحبك.
و بعد اسبوع كان كتب كتاب معتصم و يقين في المستشفى و مشي معها رحلة العلاج و كان هو اجمل عوض لها.
أما حسام اتحققت دعوة سهام لما قالت( منك لله يا حسام،يارب ما تشوف يوم حلو في حياتك)
و فعلا خسر كل فلوسه و مراته سابته لما بقي فقير و دلوقتي عرف قيمة يقين و ندم بعد فوات الاوان
و كل شخص زرع اللي حصده و كانت نهاية سعيدة ل يقين و معتصم..
و تمت و ليس للحديث بقية
رايكم يا حلوين ♥️ 🥰
#ملف_اسود
#قصة_كاملة
متابعة للصفحة ليصلك كل جديد 👇👇
#روايات_بقلم_منال_كريم
♥️♥️♥️♥️♥️♥️♥️♥️♥️
سبحان الله وبحمده سبحان الله العظيم
استغفر الله العظيم و اتوب اليه
لا اله الا الله وحده لا شريك له له الملك وله الحمد وهو على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
لا اله الا انت سبحانك اني كنت من الظالمين
♥️♥️♥️♥️♥️♥️♥️♥️♥️♥️