ثنائي الدايت و عود القصب بقلم منال كريم

في بيت محمود

عدي ساعتين و مريم لسه قاعدة بتعيط ، رجع محمود و دخل الاوضة من غير سلام و لا كلام.

قالت مريم بدموع: محمود استنا لو سمحت عايزة أتكلم معك.

محمود بعصبية: معلش يا مدام مش فاضي.

عيطت مريم اكتر و كلمت نفسها: و كمان راجع ساكت و مخمصني ،أكيد هي اللي قاللتك بلاش تكلم مراتك ، خائفة على مشاعرها. و أنا لا..

و كملت عياط و هي مقتنعة أن جوزها يخونها…….

////////////////

في بيت عز

رجعت عهد حضرت لعز الغداء و كان قاعد ياكل ،كلمت نفسها : طيب على الأقل صالحني على كلامك اللي يوجع القلب و يسم البدن ، أو حتي أسأل أنا ليه مش قاعدة معك على السفرة ، عمري ما تخيلت أنك قاسي كده يا عز.

خلص اكل قام من على السفرة و قال بأمر: اعملي شاي و هاتي البلكونة

عهد بطاعة: حاضر يا حبيبي..

/////////

في منزل احمد

مدت سندس أيدها و هي بتقول عايزة فلوس يا حمادة.

أحمد : فلوس ليه خير أن شاء الله

سندس: مش أنا روحت لدكتورة تغذية و كمان حجزت في جيم علشان اخس و اعجبك يا سي أحمد.

أحمد : طول عمرك عجبيني بس ده لمصلحتك.

سندس ببرود : اومال ،أنا عارفة كل اللي يهمك هو مصلحتي بس الشكل ميفرقش معك مش كده يا حمادة

مد أيده بفلوس ليها و قال: من غير كلام كتير، اتفضلي الفلوس و عايز اشوف فرق.

سندس: من عيني يا حمادة.

و خدت الفلوس و دخلت الاوضة

/////(((((((((((((

عدى اسبوع و عهد و سندس ماشين على نظام رجيم قاسي ، أما مريم في حالة نفسية سيئة بسبب كلام علا اللي زي السم و كمان محمود قليل الكلام معها.

///////////////

في العيادة

قاعدة سندس و عهد مستنين دورهم ،و دخلت مريم العيادة بص كل الموجودين بإستغراب

سألت عهد:هو في هنا قسم علاج النحافة.

سندس: لا هنا علاج السمن بس.

عهد: امال دي بتعمل ايه هنا.

سندس: يمكن جاية مع حد أو قريبة الدكتورة

عهد: أكيد اصل دي شبه عارضات الازياء.

سندس: يا اختي أنا لو وزني قدها مرتين مكنتش فكرت في الموضوع.

اتكلمت عهد بتأثر: موضوع صعب، امبارح عز طلب مني مكرونة بشاميل و أنا بعشقها و مسكت نفسي بالعافية .