حكايات ست الدار بقلم منال كريم
بتخبط ست كبيرة على الباب و هي تزعق: افتح يا محمود، محدش هيخلصك من ايدي النهاردة
فتح محمود بخوف و قال: مالك يا خالتي في حاجة
بصت عليه بغضب و قالت: اوعي يكون مش عارف انت عملت ايه
محمود: لا مش عارف
خرجت ام محمود و قالت: تعالي يا عايدة مالك عاملة دوشة على الصبح ليه.
عايدة بعصبية: جاية اتحانق مع ابنك عندك مانع
ام محمود: لا معنديش
ضحك محمود و قال: أمي تباعيني بسهولة
ضحكت عايدة و قالت: امك بتحبني يا أخويا
محمود: مالك بقي يا خالتي
عايدة: النهاردة كام رمضان
محمود: بقينا ١٥ رمضان خير
عايدة: أنت عارف اني كنت عند بنتي من قبل رمضان و لسه رجعة النهاردة ألقي الشارع كده من غير زينة رمضان
ام محمود : نعلق زينة ازاي، و لسه جوزك ميت بقاله عشرين يوم.
عايدة: انا قولت كده لما لقيت الشارع فاضي و قولت اجي اسال محمود المسؤال عن الزينة كل سنة
محمود: زي ما امي بتقولك كده لازم نرعي شعورك
مدت أيدها و قالت: فلوس الزينة زي كل سنة و أنا هدخل شقتي و قبل أذان المغرب القي الشارع مليان زينة،و لا انتوا فاكرين اني رمضان بتاعكم بس
ام محمود: رمضان بتاع مصر كلها مسلم و مسيحي ،و انتي عايدة طول عمرك معنا..
عايدة: ربنا يديم الوحدة بينا و يحفظ مصر من كل شر و يلا يا استاذ محمود علق الزينة ،انت عارف اني جوزي كان يستني رمضان من السنة للسنة
محمود: حاضر يا خالتي .
و مشيت عايدة على شقتها اللي في الدور الاول.
أم محمود: يشهد ربنا من يوم ما سكنت هنا، و إذا كانت الست دي او جوزها يتعاملوا مع الكل باحترام و لو حد اتاخر في دفع الإيجار محدش فيهم يتكلم.
محمود: فعلا يا ماما ناس طيبين اوي
ام محمود: طيب يلا اجمع شباب الحتة و علقوا الزينة
محمود: حالا.
////////////////
في شقة عايدة،دخلت قعدت على الكنبة اللي في وش الباب و قالت : أنا عايدة و شهرتي ست الدار علشان ديما قاعدة و فتحه باب الشقة ، سنين طويلة و حكايات كبيرة جمعت بيني و بين الحيران ،و تعالوا معي نشوف حكايات العمارة.
///////////////////
في شقة محمود
ام محمود: يا ابني حرام عليك كفاية لعب كورة
محمود: حاضر يا ماما ، وعد مني اني اذكر بس بعد تعليق الزينة
زعقت و هي بتقول: و بعد تعليق الزينة،تلعب كورة لحد الفجر، يا ابني حرام عليك انا مليش غيرك ، و تعبانة عليك علشان اشوفك حاجة حلوة.
محمود: هو كل يوم نفس الاسطوانة،اوعدك يا ماما ارفع راسك و اشرفك.
رفعت ايديها و قالت: يارب يفرج قلبي بيك يا حبيب قلبي.
محمود: حبيبتي يا ماما..
////////////
في الشقة اللي قصاد شقة أم محمود
بسام : بقولك يا ماما في واحد صاحبي جاي بعد المغرب يشوف ماسة
فاطمة : ما بلاش يا بسام
بسام بصوت عالي: هو ايه اللي بلاش يا ماما،يعني هتفضل قاعدة جنبنا طول العمر
خرجت نورا مرات بسام من المطبخ و هي بتقول: الواحد زهق من الموضوع ده ،كل يوم عريس يجي و اول ما يشوف شكلها يهرب.
خلصت كلامها و ضحكت بصوت عالي
فاطمة بحزن: عيب كده يا بنتي
بسام: هي قالت حاجة غلط مش دي الحقيقة
فاطمة: راعوا مشاعر اختك
ضحكت نورا بسخرية و قالت: هي بتحس يا ماما، هي بتسمع الكلام من هنا و تاكل لحد ما بقت زي البلونة.
و نزلت دموع فاطمة من كلامهم و ابنها و مراته يضحكوا على وجع بنتها.
///////
في اوضة ماسة كانت قاعدة و سماعة كلامهم اللي يحرق قلبها ، و كلمت نفسها: انا ذنبي اني تخينة ،ربنا يسامحكم على وجع قلبي بس انا مش هسامحكم
دخلت فاطمة و قالت بحزن: حقك عليا يا حبيبتي
ماسة: و انتي ذنبك ايه يا ماما
فاطمة بدموع: ذنبي اني مش قادرة على اخوكي و مراته.
ماسة: امسحي دموعك يا ماما ،انا كويسة
و قامت ماسة و قالت: هقوم احضر الفطار المغرب قرب.
///////////////
على السفرة
قاعدة فاطمة و ماسة و بسام و نوار.
كانوا ياكلوا بصمت تام
بصت نورا على ماسة و قالت::بقولك يا ماسة بلاش تأكلي كتير النهاردة يمكن العريس يرضي بيكي
سكتت ماسة و كملت اكل من غير رد
بسام:كلامك صح يا نورا
نورا بدلع : انا عمري ما قولت حاجة غلط.
فاطمة: كفاية بقي حرام عليكم
بسام ببرود: متعصبة ليه يا ماما.
زعقت بصوت عالي: انت ايه معندكش دم لا انت و مراتك
نورا بعصبية : الحق يا بسام امك تشتمني
بسام: معلش متزعليش
فاطمة بحزن: يا خاسرة تربيتي فيك، ابوك اللي يرحمه وصك عليا و على اختك، فين الوصية يا راجل
بسام: و انا عملت ايه لكل ده.
فاطمة بصوت عالي: ديما تهين اختك و تكسر بخاطرها أنت و مراتك
ماسة بهدوء: ماما لو سمحتي كفاية أنا مش زعلانة
نورا : اعملي فيها ملاك برئ
مردتش عليها
//////////(
بعد الفطار
في اوضة الصالون
قاعدة ماسة مع صاحب اخوها و هي متوترة
كان الشاب ماسك نفسه عن الضحك بالعافية و بعدين قال: معقول أنا الشاب الكول و الوسيم يتجوز واحدة زي الفيل زيك
الكلمة جرحت قلبها بس سمعت من غير رد
عادل : عندي ليكي كام حل، اول حاجه حاولي تخسي
و ضحك بصوت عالي و قال باستهزاء: تخسي ايه أنتي عايزة قرار ازالة،تاني حل انسي موضوع الجواز أو دوري على واحد زيك
و خرج من الاوضة ، مشي بسام وراءه و قال: ايه رايك
عادل: اخس عليكي يا صاحبي تعمل فيا انا كده.
و مشي عادل و دخل بسام عند ماسة بغضب
صرخ في وشها و هو يقول::قولي اعمل فيكي ايه،اخلص منك ازاي كل عريس يجي يرفض يتجوز واحدة زيك يا شيخة الواحد تعب منك.
دخلت فاطمة و قالت: الجواز قسمة ونصيب
عادل: انتي فاكرة بشكلها ده حد يبص عليها
فاطمة::حرام عليك أخرس بقي و ابعد عنها.
جت نورا و قالت: بسام هي اختك لسه هتقعد معانا في البيت انا عروسة جديده و مش عارفة اخد راحتي من أمك و اختك دي بقت عايشة تقرف ، انا هاخد.شنطتي و اروح على بيت ابويا.
جري على مراته و قال: استني يا نورا انتي عارفة اني مقدرش اعيش من غيرك.
نورا: و اخرتها أمك و اختك كبسين على نفسي، بدعي يجي حد يتجوز اختك و تاخد أمك معها و نرتاح منهم الاتنين
فاطمة بصدمة: أنت سامع كلام مراتك و ساكت على كده..
بسام: و هي بتقول حاجة غلط احنا عرسان و من حقنا نعيش براحتنا.
زعقت فاطمة و هي بتقول: يبقي من جيبك يا سبع البرمبه،البيت ده بيتي انا،و لو بتدور على ورث يبقي بعد ما اموت.
بسام بصوت عالي : البيت ده بيتنا احنا التلاتة و انا عايز حقي فيه.
و اخيرا ماسة اتكلمت ووهي بتقول: خالص يا بسام حقك عليا أنا بس بلاش تكلم ماما كده
نورا بعصبية: يا شيخة انتي السبب في كل ده ،قاعدة زي البومة.
فاطمة: أخرسي قطع لسانك، انتي اللي وش فقر و نحس و دخلتك علينا جابت لينا الفقر، و خلت ابني دلول ليكي
نورا بردح: جرا يا ست انتي ،ازاي تكلمي معي كده.
زقتها ماسة و هو بتقول: اتكلمي مع ماما باسلوب محترم
فاطمة: و دي واحدة تعرف الاحترام
بصت نورا على بسام و قالت: ليكون عجبك طريقة كلام أمك و اختك معي
بسام: لا طبعا يا حبيبتي
فاطمة بحزن: اخس عليك يا ابن بطني يهمك زعل مراتك عن امك و اختك، ربنا يسامحك
و دخلت فاطمة الاوضة و معها ماسة.
قعدت نورا على الكرسي و قالت بعصبية: عجبك كده يا بسام
قعد جنبها و قال: لازم نتحمل يا نورا معنديش مكان تاني نعيش فيه.
نورا: كل مشاكلنا هتحل أما اختك تغور من هنا
بسام : قولي يارب.
///////////
تاني يوم
في الشركة اللي ماسة شغالة فيها
دخلت زميلتها وقفت قدمها و قالت بتريقة: عاملة ايه يا ماسة السمينة
مردتش ماسة عليها.
ايتن : انتي ساكتة ليه يا ماسة
ماسة: علشان ده مش وقت كلام هو وقت شغل.
في الوقت ده دخل صاحب الشركة و قال : كلامك صح يا انسة.
قامت ماسة وقفت و ايتن خافت و بصت على الأرض .
مروان بهدوء: عايز اسمع صوتك
بلعت ريقها بتوتر و قالت: انا اسفة يا فندم
مروان: على ايه، الكلام وقت الشغل أو التنمر على زميلتك.
ايتن بخوف: على كله.
مروان: اعتذري من زميلتك
ايتن : اسفة يا ماسة
ماسة : حصل خير
مروان: كملوا شغل.
و خرج مروان من المكتب.
و ماسة و ايتن كملوا شغل من غير كلام.
////////////(((((((
بعد كام يوم
في الشركة
كانت ماشية ماسة ،جه مروان و قال بابتسامه: ازيك يا انسة ماسة.
ماسة بهدوء: الحمد لله يا أستاذ مروان.
مروان بهدوء: اخبار الشغل ايه
ماسة بهدوء: كويس.
مروان: عايز اشوف حسابات الشركة خلال السنة
ماسة: أن شاء الله يا فندم انا شاغلة عليها
مروان: تمام
مشيت ماسة و مروان كلم نفسه: بقالي سنتين بحبك بصمت و خايف ترفضني، نفسي تحسي بي.
//////////
في مكتب مروان
مروان: تعرفي ايه عن ماسة
السكرتيرة : هي موظفة في الحسابات ، مجتهدة في شغلها ، رغم تنمر الموظفين عليها.
مروان باستغراب : الموظفين يتنمروا عليها ليه ؟
السكرتيرة : بسب شكلها.
مر أن: ماله شكلها؟
قالت بحزن: يا فندم ياريت الكل كان زيك، عايزة اقولك حياة ماسة جحيم بسبب انها تخينة، و تسمع كلام يسم البدن من القريب قبل الغريب.
مروان بحزن: معقول هي بتعاني في حياتها.
السكرتيرة: جدا يا فندم،اكتر ما تتخيل.
و خرجت السكرتيرة و هو بيفكر فيها و أن لازم ياخد خطوة
//////////
بليل
في فيلا مروان
مروان: انا كنت عايز اقولكم على حاجة
ام مروان : اتفضل
مروان: أنا قررت اتجوز
ام مروان و أخته زغرطت
ابو مروان: الف مبروك يا حبيبي و الفرح امت
ضحك مروان و قال: يا جماعة اهدوا مش كده
أسيل: الف مبروك يا مارو انا فرحانة اوي
قامت من مكانها و قالت: بس انا كده عندي حاجات كتير لازم اعملها
مروان: ايه هي
أسيل: احجز فستان و المكيب و حاجات كتير اوي اوي.
مروان بهدوء: اقعدي يا أسيل علشان اعرف اتكلم.
قعدت و هي بتقول : يلا اتكلم
ام مروان: مين العروسة و شوفتها فين؟
مروان بابتسامه: العروسة اسمها ماسة،موظفة في قسم الحسابات في الشركة عندي.
أسيل بهزر: يا سلام يا مارو قصة حب المدير و الموظفة
مروان بعصبية: اهدي علشان اعرف اتكلم
ابو مروان: أنت واثق من مشاعرك
مروان: طبعا يا بابا
أبو مروان: يبقي على بركة الله، شوف عايز تطلب أيدها امت.
مروان: أن شاء الله ناوي اتقدم اليومين دول علشان الخطوبة بعد العيد
زغرطت ام مروان وقالت: الف مليون مبروك يا حبيبي
مروان: الله يبارك فيكي يا ماما، عايز اعرفكم حاجة
ابو مروان: خير ان شاء الله
مروان: العروسة
أسيل: مالها
مروان: وزنها زايد شوية
ابو مروان: انت شايف انها عندها مشكلة
مروان: لا
ابو مروان: يبقي تمام مفيش مشكلة
مروان: انا حبيت اعرفكم علشان مش عايز يظهر عليكم اي ردة فعل تزعل ماسة أو اهلها
ام مروان : يا حبيبي الحلاوة حلاوة الروح و طالما انت موافق احنا موافقين و ربنا يسعدك
أسيل: اسمها جميل جدا
مروان: هي كلها جميلة
أسيل: شكلك واقع يا مارو
مروان: واقع من الدور الالف
///////////////
في بيت ماسة
كانوا يتسحروا قالت نورا : يا بنتي كفاية اكل بقي
بصت ماسة عليها و قالت: انتي فاكرة اني مقدرش ارد عليكي، انا اقدر بس مينفعش انزل من مستويه و اكلم واحد زيك ،فكبري دماغك مني علشان انا لو فكرت ارد ردي هيكون صعب اوي
بسام بغضب: يا ما شاء الله لسانك طلع يا قطة
ضحكت ماسة و قالت: من زمان ،بس زي ما قولت اوفر مجهودي لحاجة اهم، أنت و مراتك غلطتوا كتير و دلوقتي من الاحسن ليكم محدش يسمع ليكم صوت
فاطمة : برافو عليكي يا ماسة قولتك ردي عن نفسك و متسكتيش
ماسة: زمن السكوت راح يا ماما و حان الان الرد القاسي
سكت بسام و مراته و هما شايفين ماسة قوية.
///////////
تاني يوم كان الجمعة
رن تلفون بسام: الو
مروان: السلام عليكم
بسام : وعليكم السلام ،مين معي
مروان: انا مروان عبدالعزيز، مدير الانسة ماسة اختك، و كنت بطلب منك معاد.
بسام باستغراب: معاد ليه
مروان: انا طالب منك ايد الانسة ماسة
بسام بسعادة: ماسة اختي أنا.
مروان: ايوة ،و لو سمحت اجي انا و بابا و ماما و اختي بعد صلاة التراويح أن شاء الله
بسام: يا مرحب بيكم
قفل بسام و دخل المطبخ و قال بسعادة: ماسة عارفة مين كلمني دلوقتي
ماسة: مين
بسام: الأستاذ مروان مديرك
ماسة باستغراب: و هو عايز ايه
بسام: استأذن مني يجي مع اهله علشان يطلب ايدك
ماسة بصدمة: انت بتقول ايه
قربت فاطمة و سالت: الكلام ده حقيقي
بسام: طبعا هو كلام زي ده فيه هزار.
زغرطت نورا
قالت ماسة: استني يا نورا، فهمني ايه الحوار اللي حصل بينكم
حكي لها عن اللي اتقال في المكالمة،و مكنتش مصدقة
////////
بعد الفطار
اتكلم مروان في التفاصيل العادية و طلب يقعد مع ماسة لوحدهم.
ماسة :بدون مقدمات و لا كلام كتير أنا عندي سؤال حضرتك.
ضحك و قال: اتفضلي حضرتك
ماسة: أنا مش فاهمة حاجة ،حضرتك بتعمل ايه هنا
مروان: بطلب ايد حضرتك للجواز
ماسة: أيوة ما هو ده سبب اني مستغربة ،يعني ايه تطلب أيدي للجواز.
مروان : لو بتسالي عن السبب ،هو أني بحبك من أول يوم اشتغلي معي في الشركة ، و اتمني تكوني شريكة حياتي، كنت خايف اخد خطوة ليكون الرفض من نصيبي
ماسة: أنا مش مصدقة كلام حضرتك ،هو أنت شايف شكلي
مروان: ماله شكلك
ماسة بحزن: يعني ايه ماله شكلي، أنا تخينة اوي.
ابتسم مروان و قال: الشكل مش كل حاجة ،الاهم جمال الروح و أنا متأكد أن روحك جميلة.
ماسة: أنا أول مرة حد يقولي الكلام ده ،انا حاسة أني بحلم، في حد شايف اني حلوة
مروان: دي الحقيقة انتي حلوة يا ماسة
ابتسمت ماسة بخجل.
و اتفقوا الفرح بعد العيد
//////////////////////
في نفس العمارة الشقة اللي في الدور اللي فوق
خرجت إيمان من الاوضه وهي بتقول: أنا قررت قرار
عمار: خير ان شاء الله
قعدت على الكرسي و هي بتقول: مش هطبخ النهاردة
بص باستغراب و سال: و ده ليه أن شاء الله
إيمان بابتسامه: أنت اللي هتطبخ يا حبيبي
عمار بعصبية: نعم يا اختي و أنا بعرف اطبخ
ضحكت إيمان و قالت: مش لوحدك يا حبيبي
عمار: اه، قصدك أساعدك في الاكل
هزت راسها بالرفض و قالت: لا يا عمار أنت اللي هتعمل فطار النهاردة
قام من مكانه و قال بعصبية: نعم يا اختي اتجننتي ولا ايه.
إيمان بعصبية: اتكلم كويس، بلاش تكلمني بالطريقه دي و أسأل الاول مين اللي هيساعدك في المطبخ
عمار: أنا مش هنفذ كلامك بس تمام عايز أعرف مين يساعدني في المطبخ.
إيمان بهدوء: الولاد هما اللي يساعدوك.
قامت أنجي اللي عمرها ١٠ سنين و قالت : نعم يا ماما ،مين اللي يطبخ
إيمان : أنتي يا قلب ماما، و معاكي أخويا
خرج عبدالرحمن من الاوضة اللي عمره( ١٥ سنة) قال : ايه يا ماما القرارات الغريبة دي.
ردت بحزن:اخس عليكم ،أنا بقالي سنين اطبخ ليكم،فيها ايه لو طبختوا انتوا النهاردة.
عمار: الاجابة بسيطة محدش فينا يعرف يطبخ
قامت وفقت و شوحت بايديها و هي بتقول: و مش معنا عمرو و تامر يعرفوا يطبخوا.
عمار وقف قصادها و سال بعصبية : مين دول؟
ردت إيمان بهدوء: مش عارف مين عمرو و تامر
عمار: لا مش عارف، عرفني انتي.
إيمان: ايه الجهل ده
مسك أيدها بعنف و قال: أنت مجنونة بتقولي لجوزك أنه جاهل
إيمان بوجع: سيب ايدي بتوجعني،مش قصدي اقول كده.
عبدالرحمن: بعد اذنك سيب أيدها يا بابا
ساب أيدها و هي قالت : اخس عليك يا عمار تمد ايدك عليا
عمار: هو أنا مدت ايدى ،انا عايز اعرف ازاي تقولي عليا جاهل.
إيمان : أنا قصدي علشان أنت مش عارف مين عمرو و تامر
عمار: لا مش عارف مين هما
إيمان: تامر حسني و عمرو دياب
عمار: حصلنا الرعب ،و مالهم بقي
إيمان: الهضبة جمع ولاده و طبخوا مع بعض، و تامر جمع ولاده و طبخوا مع بعض برضو
عمار: و المطلوب مني ايه
إيمان: اعمل زيهم خد العيال و اطبخوا سوا.
عبدالرحمن : أنا مش موافق على الكلام ده
أنجي: و أنا كمان مش موافقة.
زعقت إيمان: و انا مش هطبخ النهاردة
نفخ عمار بعصبية و قال: الدنيا صيام يا إيمان و بلاش جنان، ادخلي جهزي الفطار
إيمان: و أنا قولت لا
أنجي : انتي كل يوم تعملي الاكل يا ماما ،حصل ايه جديد النهاردة
قبل ما ترد ايمان، قال عمار: السبب عمرو و تامر ،أمك دماغها تعبانة علشان عايزين نقلد الاعلانات
إيمان بعصبية: من غير غلط انا قولت اللي عندي
عبدالرحمن: يا ماما استعيذي بالله و جهزي الفطار
إيمان: لا
عمار: لآخر مرة هحذرك يا إيمان
قعدت على الكنبة و مسكت الموبايل من غير ما ترد عليه.
عمار: تمام اوي كده، خليكم شاهدين يا ولاد على أمك.
طلع تلفيونه و رن على ابو ايمان: أزيك يا عمي
ابو إيمان: الله يسلمك يا ابني
عمار: كنت عايز حضرتك تشرفني لحد البيت
ابو إيمان بتوتر: خير ان شاء الله انتوا والاولاد كويسين.
عمار: ايوه الحمد لله الموضوع بسيط ما تقلقش لما تيجي هنا هتعرف.
ابو إيمان: مسافة السكة
قفل عمار التلفيون و قعد على الكرسي ، و إيمان تبص عليه بغيظ، و الولاد قاعدين زعلانين.
///////
بعد شوية
وصل ابو إيمان و عمار حكي له كل حاجه
بص عليها و قال بعتاب: ليه كده يا أيمان ،انتي طول عمرك عقلك كبير.
إيمان: و انا عملت ايه يا بابا ،فيها ايه لما ارتاح يوم
أبو ايمان: مفيش فيها حاجة بس الطريق بتفرق
إيمان: و مالها طريقتي يا بابا
أبو إيمان:طريقة أمر ، انما لو طلبتي بدلال كانت تفرق، بس كده غلط
عمار: و الاسوء يا عمي تقولي زي عمرو و تامر
أبو إيمان: يا بنتي كل الاعلانات كدب و مش حقيقية و الناس دي حياتهم غيرنا.
عمار: قول يا عمي قول،و علشان خاطرك و خاطر إيمي النهاردة أنا اللي اعمل الاكل
عبدالرحمن: و انا المساعد الأول
أنجي: و أنا المساعدة التانية.
ضحكت إيمان و قالت: و مش معنا دلوقتي
عمار: زي ما قولت الطريقة بتفرق ، أعمل حسابك يا عمي انت هتفطر معانا، هبعت عبدالرحمن يجيب حماتي و نفطر سوه على شرف أني أنا اللي هطبخ
و دخل عمار و الولاد المطبخ
و قال أبو إيمان: الست تقدر تخلي جوزها يعمل كل اللي هي عايزاه بس الطريقة بتفرق ،خليكي عاقلة و دماغك كبيرة
إيمان:يمكن كبرت الموضوع شوية.
ابو إيمان: كبرتي الموضوع كتير.
//////////////////
اليوم التاني
في الشقة اللي قصاد شقة إيمان
كانت علياء ماسكة ورقة في ايديها و دموعها نازلة و كلمت نفسها بحزن: أنا مش فاهمة حاجة من الورقة دي، جوزي شغال في اسكندرية ، و كلمني في التلفيون وطلب مني إن مرات صاحبه هتيجي تقعد معايا كام يوم ، علشان هي و جوزها متخانقين ومش طايقه و هي مش من القاهرة ومتعرفش حد هنا، و مش عايزة ترجع عند اهلها،و صاحبه بنفسه كلمني و أكد كلام جوزي.
مشيت لحد الكنبة و قعدت بحزن و كملت لنفسها:
قعدت معايا أكتر من خمس شهور، وأنا فاكرة إنها مرات صاحب جوزي وبعمل معها كل خير و شايلها من على الأرض.
و بكت بانهيار و كملت: و بالصدفة اكتشفت الحقيقة ، هي مرات جوزي التانية، يعني ضرتي، هتجنن و مش عارفة هو ليه عمل كده،الورقة وقعت منها بمزاجها أو بالغلط ،يمكن هي عايزة تعرفني.
حطت أيدها على رأسها و قالت : أنا تايهة و. مخنوقة، حاسّة إني على وشك أجنن، . ليه يعمل كده؟
خبط الباب، مسحت دموعها و قامت تفتح و كانت سامية: ازيك يا علياء
علياء: الحمد لله ،كنتي فين
دخلت و قفلت الباب و قالت: كنت بدور على شقة مش أنا قولتك قبل ما انزل
علياء : و ليه تدوري على شقة خليكي معي، أنا عايشة لوحدي.
سامية :كتر خيرك يا علياء أنا قعدت و طولت عندك
علياء: أنا مبسوطة انك معي انتي شايفه انا وحيدة ،جوزي مسافر و معنديش عيال
سامية: ربنا يرجع جوزك بالسلامة و ربنا يرزقك با الذرية الصالحة
نزلت دموعها و قالت: للاسف مفيش امل انا مقدرش اخلف، الحمد لله انا راضية، كل اللي بحلم بيه هو أن سعد يكون مبسوط
سامية: انتي طيبة اوي يا علياء
علياء: أنا مش طيبة انا هبلة.
سامية: انتي كويسة شكلك زعلانة
علياء بحزن: انا بخير ،عن اذنك ارتاح شوية لحد المغرب.
سامية: ارتاحي يا لولو و أنا هحضر الفطار و اصحيكي.
دخلت علياء الاوضة،رمت نفسها على السرير و انفجرت من العياط ،و قالت : ليه يا سعد،
كنت تقدر تجيب لها شقة بعيد عني وخلاص؟ ليه تدخلها في حياتي ، كان في حاجة في دماغك و عايز تعمله ، و هي ليه تقبل بكده، يشهد ربنا طول الوقت كانت كويسة معي، كانوا عايزين يعملوا معي ايه.
قامت قعدت و طلبت رقم سعد
فتح الخط سعد و قال: عاملة ايه لولو
علياء: عملت فيا كده ليه يا سعد
محاولش يخبئ أو يكذب، رد من غير لف و دوران: انتي عرفتي
علياء بحزن: أيوة عرفت و عايزة اعرف عملت فيا كده ليه.
سعد : أنا آسف
علياء: ملهاش لازمة اسف، رد عليا ، لو علشان تخلف ،انا طلبت منك الطلاق و أنت رفضت و عملت فيها الزوج المضحي و الشهم، وأنا عارفة إن من حقك تتجوز، بس مش بالطريقة دي، ولا بالخداع ده، أنت خايف علشان كاتب الشقة باسمي ، صدقني انا مش عايزة حاجة و عندي استعداد أتنازل عنها حالا,سعد أنا تايهة و ضائعة و مش عارفة اعمل ايه.
سعد بصوت كله ندم: أنا اسف يا علياء ،انا عارف اني غلطت ،صدقني كنت خايف اجرحك و مش خايف على الشقة أو الكلام الفارغ ده، سامحني
قفلت علياء الخط .
بعد شوية
خبطت سامية من برة و قالت: علياء ،سعد قالي انك عرفتي ،حقك عليا، سامحني يا علياء، على فكرة النية كانت خير، و هي انك تحبني و يمكن تقبلي وجودي بينكم ، هو كان خايف على مشاعرك و انا كمان لما عرفتك حبيتك يا علياء زي اختي ، انا ماشية و سامحني.
سمعت علياء صوت قفلت الباب ،قامت اتوضات و صلت صلاة الاستخارة ،مجرد ما خلصت مسكت التلفيون رنت على سامية و قالت: انتي فين مش قولتي هتجهزي انتي الفطار
سامية بصدمة: يعني ايه
علياء: انا يتيمة و معنديش حد الا سعد و انتي و ولادكم أن شاء الله.
زغرطت سامية في التلفيون
و قبلت علياء أن تكون لها ضرة
//////////////
اليوم التاني
في شقة تانية في العمارة
صحيت آيه على صوت المنبه، قامت بكسل و خرجت على اوضة الولاد، وقفت قدمهم و قالت: يلا يا ولاد علشان المدرسة
محدش رد، قالت: يلا آسر ( ٨ سنين) أنت نسيت في أمتحان شهر النهاردة.
آسر: مش فاهم ازاي يكون في امتحانات في رمضان.
آيه: معلش يا حبيبي علشان تاخد ثواب انك صيام ،قوم يا بطل.
قام آسر و دخل الحمام
بصت آيه على أيسل (٧)و قالت: مين الشطورة اللي بتسمع الكلام
قامت أيسل بحماس و قالت: أنا يا ماما
آيه: يلا يا حبيبتي بسرعة.
جهزت آيه الاولاد و نزلت معاهم لحد باص المدرسه.
و بعدين دخلت تصحي جوزها على الشغل.
كان هشام جوزها يسرح شعره قدم المرايا، قالت بخوف: هشام
هشام: نعم
آيه: ممكن لو سمحت تزود مصروف النهاردة
رفع صوته و هو بيقول: ليه أن شاء الله
آيه: علشان الفلوس اللي تسيبها مش بتكفي حاجة خلاص.
هشام: بطلي تبزير و هي تقضي
آيه: هو فين التبزير ده علشان مش شايفه، أنا بمشي نفسي بالقليل ،بس الأسعار غالية
خرج و هو يقول: مش عايز صداع على الصبح
و خرج من البيت و سأبها و هي حزينة : و كلمت نفسها: أنت شايف اني مبذرة ،يارتني اقدر اقولك اني عايشة أقل من الناس و ساكتة و مش بتكلم علشان مجرحش قلبك، بس أنت عادي بتجرح قلبي على طول و من غير رحمة.
مسكت الفلوس و قالت: زي كل يوم ابقي محتارة و مش عارفة اعمل ايه بالفلوس اللي مش بتقضي حاجة.
و خرجت آيه السوق،ورجعت لدوامة شغل البيت.
/////////////
على اذن المغرب
بص هشام على الاكل و قال: هو فين الاكل
آيه: الاكل قدمك اهو
هشام: طول النهار بتعملي ايه
آيه بحزن: ليه كلامكم ده
هشام بعصبية: علشان طول النهار قاعدة فاضية و معلتميش اكل زي الناس
آيه: الاكل على قد الفلوس
زعق هشام: قصدك اني بخيل
آيه: وطي صوتك بلاش فضايح ، و مش قصدي حاجة ،انا اسفة.
قام هشام من على السفرة و قال: أنا خارج و سايب البيت ،عيشة تقرف.
و خرج هشام من البيت
بصت آيه على اولادها اللي يعيطوا و قالت: بلاش عياط ،افطروا انتوا صائيمبن
أيسل : و بابا
آيه: وقت ما يجوع يرجع ياكل
آسر: انتي كمان افطري يا ماما.
ضحكت آيه و قالت: حاضر
و تظاهرت آيه أنها بتاكل علشان الأولاد
و بصت على مكان هشام و قالت بحزن:
كنت بتمناه اعيش مع الشخص اللي اختارته في سعادة، بس اللي حصل أن كل يوم هشام بيهد ويهدم فيا ،ويضغط عليها اكثر و حمل العيال و العيشة تقيلة عليا، و طاقتي خلصت، بس مفيش في أيدي حاجة اعملها.، الله يسامحك يا هشام ديما تكسر بخاطري بس أنا مقدرش اكسر بخاطرك أو خاطر اي حد، بخاف على مشاعر الكل وأنا مشاعري ملهاش تمن عند حد.
خلصوا الأولاد الاكل و بعد صلاة المغرب دخلت تروق المطبخ ،مسكت التلفيون و رنت على هشام اللي رد بعصبية: عايزة ايه ؟
آيه: عايزة اطمن عليك، أنت فين؟
هشام: في ستين داهية ،عايزة حاجة
ايه بحزن: يا هشام حرام عليك أنا عملت ايه لكل ده.
هشام: اقفلي دلوقتي
قفلت ايه و غسلت الاطباق و هي بتعيط و كلمت نفسها بعصبية كلام نفسها تقوله لهشام بس مش قادرة: أنا وصلت لمرحلة صعبة، زهقت و مش عارفه أرضي نفسي ولا ارضي اللي حواليا ، أنا بجي على نفسي علشان الكل و مفيش فايدة،١٥:سنة متجوزة و كاني في سجن، عايشة مع راجل بخيل في مشاعره و الفلوس و في كل حاجه ، مخلني أنا و الولاد أقل من كل الناس بحجة أنه مش معه فلوس ،هو معه بس بخيل و انا معنديش اختيار الطلاق مقدرش اخد الخطوة دي، ربنا يصبرني و يقويني
خلصت المطبخ و قعدت مع الولاد قدم التلفزيون و ياكلوا حلويات و مبسوطين
وصل هشام و قال: انتوا لسه صاحين لحد دلوقتى
ايه: حمد لله على السلامه يا هشام تعال اقعد معانا شوية
قعد و هو بيقول : كل ما اقعد معاكم تسدوا نفسي على الدنيا
زعلت ايه في نفسها و مدت ايدها بطبق و قالت: دوق الكنافة بتاعتي هتعجبك
رد ببرود: و هو أنا فطرت علشان احلي
قامت من مكانها و قالت: حالا احضر الاكل
هشام : بسرعة علشان جعان
ايه: حاضر
حضرت الاكل بسرعة و بكل حماس و سعادة أنه هياكل و نسيت اي كلمة زعلتها منه.
//////////
عدت الايام بينهم و مفيش جديد
ايه ديما محل انتقاد من هشام اي حاجه تعملها مش عجبه و ديما هو اللي مش بيغلط.
///////////////
آيه: منورة يا ماما.
ام هشام: بنورك، عاملة أكل ايه النهاردة
آيه: هشام بلغني أنك هتفطري معانا النهاردة ، علشان كده عملت محشي و مكرونة بالبشاميل
ام هشام: عملتي دول بس
آيه باستغراب: بس ، تحبي أعمل ايه تاني معاهم
قامت ام هشام و اتكلمت بعصبية: انتي بتكلمي معي كده ،قولي انك مش عايزني أفطر معاكم و انا امشي بهدوء.
ايه بصدمة: هو حضرتك بتقولي ايه.
خدت شنتطها و قالت: بقول اني مش مرحب بي في بيت ابني.
مشيت ام هشام و ايه واقفة مصدومة.
و أول ما خرجت ام هشام كلمت هشام و هي بتعيط: شوف اللي حصل لامك يا هشام.
هشام: خير يا ماما
آيه: مراتك قابلتني وحش و شبه طردتني من بيتك.
هشام بعصبية: هي اتجننت علشان تعمل كده، حقك عليا يا ماما
////////////
رجع هشام من برة و هو متعصب: آيه، يا آيه
خرجت آيه من المطبخ و قالت بخوف : في ايه يا هشام ،حصل حاجة
هشام: هي امي فين
آيه بتوتر: أنا كنت لسه هكلمك و اقولك ايه اللي حصل.
قاطع كلامها و قال : اللي حصل أنك طردتي أمي.
آيه: لا ده محصلش هي أمك اللي زعلت من غير سبب
هشام: كاذبة أمي نزلت من البيت زعلانة منك
آيه:لا مش كاذبة ، أنا طلبت منها و هي رفضت و مشيت من هنا من غير زعل، أنت جبت الكلام ده منين.
هشام: أمي اللي كلمتني و قالت اللي حصل.
آيه: صدقني يا هشام أمك عملت مشكلة من غير سبب.
هشام بصوت عالي: لا مش هصدقك ،أنا هصدق أمي،انا زهقت و تعبت منك
و جت لحظة الانفجار عند آيه، قالت بنبرة هادية: مش أنت اللي زهقت ،انا اللي زهقت و تعبت منك و من عيشتك، راجل بخيل في كل حاجه ، شايف نفسك ديما صح و مش بتغلط، و انا اللي غلطانة و بقول معلش أتحمل علشان بحبك و علشان العيال بس أنا خالص مش قادرة أتحمل ،أنا تعبت و الطاقة خلصت ، طلقني يا هشام
كان مصدوم منها أول مرة تتكلم معه بالطريقة دي، ديما كانت مطيعة و هادئة بس دلوقتي شايف قدمه واحدة تانية و اتاكد من ده لما قالت بقوة: اطلع برة البيت يا هشام، ده بيتي و بيت عيالي ،و أنت ملكش مكان هنا
هشام بصدمة: أنتي بتقولي ايه يا آيه.
آيه : اللي سمعته ،طلقني و أطلع برة البيت.
اول مرة يحس أنها هتضيع منه قال بهدوء: براحة بس يا آيه اسمعني و حقك عليا.
ضحكت باستهزاء و قالت: ياه تصدق أول مرة تقول حقك عليا ديما انا اللي اقولها،بس هي جت متأخرة و أنا خالص طاقتي خلصت و مش قادرة أتحملك.
هشام بهدوء: علشان العيال
صرخت آيه بصوت عالي و قالت: أخرج من هنا و بلاش فضايح علشان الجيران
خرج هشام و هو محتار و ندمان
//////////
عدي اسبوع و هشام يحاول يرجع البيت بس آيه رفضت رفض قاطع، و صمتت على الطلاق و فعلا تم الطلاق و حست آيه بالراحة و هشام بالندم…
//////////////
يوم وقفة العيد
في شقة ماسة كان ستات العمارة متجمعين و يعملوا كحك العيد
علياء: عقبال ما نعمل في فرحك يا ماسة
ماسة: تسلمي يا لولو
ام محمود: عايزة أسألك حاجة يا علياء
ضحكت علياء و قالت : عارفة الحاجة دي ، تفتكري عند حل تاني ،انت مفكرتس في نفسي ،فكرت أن سعد من حقه يكون اب، و محبتش اتطلق و اعيش وحيدة ،فققرت اكمل مع سعد و ضرتي في نفس الشقة
إيمان: و هي عاملة معاكي ايه
علياء: الشهادة لله معاملتهم الاتنين معي حلوة و فيها تقدير
عايدة: ربنا يهدي الحال
ام ماسة: و انتي يا يويو مش ناوية ترجعي لهشام الرجل كلم كل الناس علشان توفقي ترجعي
ايه: مبقاش ينفع ،انا ضغطت على نفسي كتير لحد ما الطاقة خلصت.
علياء: بقولكم ايه عايزين نفرح و نركن الهم على جنب
جت نورا و هي تغني: يا ليلة العيد انسيتنا.
/////////////////
بعد العيد
في فرح ماسة كان الكل متجمع
جري محمود على امه و هو بيقول بسعادة: بصي يا ماما الرسالة دي
ام محمود: رسالة ايه ده وقته.
محمود: يا ماما جالي عرض من نادي كبير ألعب فيه كورة
ام محمود بسعادة: بجد الف مبروك يا حبيبي.
محمود: الله يبارك فيكي،شوفتي بقي وعدتك اشرفك و ارفع راسك
ام محمود: يارب تحقق كل اللي نفسك فيا يا حبيبي.
محمود: في حياتك يا ماما
عايدة: مبروك يا حودة اوعي تنسي خالتك عايدة لما تبقي مشهور
محمود بهزر : و لا اعرف حد فيكم
عايدة: وطي من يومك
ام محمود : ديما انتي و هو نقار و نقير
/////////
على ترابيزة تانية
علياء: الف مبروك الحمل يا سامية
سامية: اللي يبارك فيكي يا لولو
سعد:انا اتفقت مع سامية أن التربية مشتركة بينكم علشان ياخد من صفاتك الجميلة
علياء: شكرا ،ربنا يسعدكم
و سكتت علياء و قالت لنفسها: انا مبسوطة علشان سعد بس في نفس الوقت حزينة على حرماني من الأمومة ، الحمد لله على كل حال
///////////
كانت قاعدة آيه مع ولادها، و قاعد هشام جنبها و قال بندم: مش ناوية تسامحي يا يويو
هزت راسها بالرفض و قالت: لسه قلبي شايل وجع كبير سيب الموضوع على الايام
هشام بحزن : انا مش عارف اعيش من غيركم
آيه: انت اللي افتكرت أننا حق مكتسب و مش مطلوب منك تحافظ علينا علشان كده ضاعنا من ايديك.
هشام: في امل للرجوع
آيه: الله اعلم.
//////////
عمار: ايه يا إيمان قاعدة ساكتة ليه
إيمان: عايزني اعمل ايه
أنجي: يعني يا ماما مشوفتش إعلان و عايزة نعمل زيه.
إيمان بعصبية : ما خلاص بقي هي سيرة هحنكي فيها
عبدالرحمن: يا جماعة السبب مش في ماما،السبب عمرو و تامر
و ضحكوا التلاتة على أيمان
///////
في مكان العروسين
مروان: مبروك يا ماسة
ماسة: الله يبارك فيك يا مروان
مروان: ايه الحلاوة دي
ماسة: عيونك اللي حلوة.
مروان: بحبك
ماسة: بحبك
و تمت الفرح في سعادة على الجميع
و تمت و ليس للحديث بقية
#حكايات_ست_الدار_في_رمضان
#روايات_بقلم_منال_كريم
♥️♥️♥️♥️♥️♥️♥️♥️
سبحان الله وبحمده سبحان الله العظيم
أستغفر الله العظيم و اتوب اليه
لا اله الا الله وحده لا شريك له له الملك وله الحمد لله على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
اللهم تقبل منا صالح الاعمال
اللهم تقبل صيامنا و صلاتنا و ركوعنا و سجودنا
اللهم احفظ مصر واهلها من كل سوء
اللهم احفظ كل البلاد العربية و الإسلامية
♥️♥️♥️♥️♥️♥️♥️♥️♥️♥️