مدرسة البنات بقلم منال كريم
قصة كاملة
في مدرسة الثانوية بنات
الساعة التاسعة الصبح
في الفصل واقف الاستاذ و يشرح و من وسط الطالبات في طالبة عينها على المدرس و مش مركزة في الشرح
زعق الاستاذ طارق و قال: قومي اقفي يا هنا
قامت هنا و قالت بصوت هادي : نعم يا مستر طارق
طارق بصوت عالي: انا كنت بقول ايه؟
هنا بابتسامة : معلش يا مستر مكنتش واخدة بالي
طارق بعصبية : و انتي في الامتحان
هتقولي مكنتش واخدة بالي
و كمل بصوت عالي: كل بنت فيكم أهلها يدفعوا دم قلبهم علشان تبقي بنتهم حاجة و تنفع نفسها، بس انتوا كل اللي شاغل بالكم اللبس و المكيب و التيك توك و الحاجات التافه دي أما الدارسة لا، اللي مش عايزة تتعلم ياريت تعرف أهلها وتوفر الفلوس و تريحني انا كمان من وجودكم في حصتي…
رن جرس انتهاء الحصة و خرج طارق و هو هيطق من الفصل ده يعتبر افشل فصل في المدرسة
اتكلمت تمارا اللي قاعدة جنب هنا: مستر رخم اوي
هنا بابتسامة: اخس عليكي يا توتا ده قمر
تمارا : يا اختي نفسي اعرف بتحبي فيه ايه
هنا: ده قمر و هيبة ، حاجة فاخر من الاخر
تمارا : انتي مش عارفة عنه حاجة مش يمكن يكون متجوز أو خاطب
هنا: لا أن شاء الله هيكون سنجل.
في دسك تاني.
حلا : أنا قررت انت*حر علشان اعاقب اهلي لرفضهم لطلبي…
صبا بصدمة : انتي مجنونة هو الموت بالساهل كده
حلا: طيب اعمل ايه ، أنا بحب معاذ و هما رافضين أن اتجوز قبل ما اخلص المدرسة.
صبا: ما طبيعي يرفضوا انتي لسه في تانية ثانوي يعني عيلة صغيرة..
حلا بعصبية: أنا مش صغيرة انا كبيرة
اتكلمت صاحبتها التلاتة اللي قاعدة جنبهم و قالت: اسكتي أنتي يا صبا، دي هتكون لعبة صغيرة علشان تضغط على أهلها.
صبا: مفيش لعب مع الموت ،اسمعي كلامي يا حلا، أهلك خايفين عليكي و كل كلامهم صح..
تيا : اسمعي كلامي أنا لعبة صغيرة تخلي أهلك ينفذوا اللي انتي عايزاه
حرفيا حلا قاعدة وسط ملاك و شيطان و للاسف قررت تسمع كلام الشيطان و قالت: متدخليش يا صبا
قامت من جنبهم و قالت براحتك
قعدت صبا جنب بنت ديما قاعدة لوحدها و محدش يحب يقعد جنبها و الكل يتنمر عليها..
صبا بابتسامه: ممكن اقعد جنبك
ريناد: طبعا اتفضلي
صبا: ممكن اسالك سؤال
ريناد: اتفضلي ليه ديما ساكتة على عمايل البنات معاكي
ريناد بحزن : و الكلام هيفد بايه
صبا: طبعا الكلام مفيد علشان كل حد يقف عند حده
ريناد بحزن: الكل مش زيك قلبه طيب
صبا: شكرا بس اسمعي كلامي لو انتي سكتي عن حقك محدش هيتكلم
ريناد:ربنا يسهل.
قاموا الأربعة بنات هنا و تيا و حلا و تمارا و قالت حلا: يلا نخرج الفسحة
بصت صبا على ريناد و قالت : تعالي معانا يا ريناد
هنا بعصبية: احنا هنروح مع دي
صبا: انا هروح معها
تيا: خالص خليكي معها و ابعدي عننا
صبا: بفكر اعمل كده من فترة
و خرجوا البنات من الفصل و قالت ريناد: امشي مع اصحابك
صبا: سايبك منهم اسوء حاجة عملتها اني صاحبتهم من الأساس، يلا نخرج سوا و احنا من النهاردة أصحاب
فرحت ريناد أن هيبقي ليها صاحبة اخيرا..
و الاتنين سلموا على بعض…
/////((
في حوش المدرسة
كانوا البنات مع بعض و يبصوا على صبا بغيظ أنها فضلت ريناد عليهم
حلا: انا خدت قرار
هنا: ايه هو يا مجنونة هانم
حلا: مش هكلم صبا تاني
تيا : محدش فينا هيكلمها بعد ما قعدت مع ريناد
حلا::يعني كلكم معي..
البنات: أيوة
حلا: زي ما نتريق على ريناد نضم صبا معها
ضحكت تمارا و قالت بسخرية: احنا هنضحك ضحك
تيا: يلا بينا
مشيوا الأربع البنات ناحية صبا و ريناد اللي كانوا يذكروا سوا..
بدأت تيا بالكلام على ريناد و قالت: انتي مش ناوية تشوفي حل لشعرك المنكوش ده
كملت هنا:: المشكلة مش شعرها بس و كمان شكلها غريب مخيفة
زعقت صبا فيهم و هي بتقول: بطلوا قلة ادب و امشوا من هنا
حلا: جبتك يا عبد المعين ،مش تنفعي نفسك الاول ابقي دفاعي عنها
صبا: و مالي يا حلا أنا زي الفل اهو
ضحكوا البنات و قالت تيا بحقد و هي فعلا بتكره صبا و تمثل عليها انها تحبه و صاحبتها: ابدا يا صبا انتي تربية ملجا و محدش يعرف أهلك
بصت صبا عليهم بكل قوة، و استنت يكملوا كلامهم
تمارا ببرود: عيب كده يا تيا، بلاش ندوس على الجرح ،الله اعلم أهلها الحقيقيين رموها جنب مقلب زبالة أو قدم جامع
صبا بكل هدوء: حد فيكم عايز يضيف حاجة
رفعت هنا ايديها و قالت بدلال: انا اضيف حاجة بسيطة يا صبا
ابتسمت صبا و قالت: اتفضلي يا هنون
قالت هنا: انك في المدرسة دي شفقة علشان يا حرام مش معاكي فلوس تدفعي
رفعت صبا راسها لفوق بغرور و قالت: عندكم حق أنا فعلا بنت يتيمة و تربية ملجا و يا تري مين اهلي و ليه رموني كده ،و كمان أنا في المدرسة الخاصة و الجميلة دي اللي هي فعلا ببلاش بس مع اختلاف السبب، انا هنا مش شفقة انا هنا بمنحة علشان انا شاطرة و المدرسة الغالية اللي انتوا داخلينها بفلوس بابي و مامي.
كملت بصوت عالي كله فخر : انا دخلتها علشان متفوقة،انتوا عملتوا ايه في حياتكم رغم المدراس الخاصة و الدروس فاشلين ،و خليني افكركم انتوا اللي جريتوا وراءي علشان اكون صاحبتكم مش انا
و مسكت ايد ريناد و قالت: انا و انتي ميشرفنش نقف مع ناس زيهم.
مشيت صبا و هما متغاظين منها،و رغم أن صبا قلبها وجعها من كلامهم بس حاولت تبيان أنها قوية رغم أنها ضعيفة..
///////////
بعد انتهاء اليوم الدراسي
كل بنت رجعت على البيت وصبا على الملجا اللي قاعدة فيها.
وقفت قدم الملجا و كلمت نفسها: مديرة الملجا قالت إنهم لقوني قدم الباب، لمرة واحدة نفسي أقابل اللي رموني هنا، ايه السبب علشان يعملوا فيا كده، و انا ذنبي ايه علشان يحصل فيا كده، كل ما افتكر ان معي السنة دي و السنة الجاية و أسيب الملجا ،اخاف مش عارفة اروح فين،انا لازم اجتهد في الدراسة علشان التعليم هو اللي يعلي من شاني…
دخلت صبا و هي حزينة على نفسها..
////////
في بيت ريناد
من وقت ما رجعت من المدرسة و هي وافقة قدم المرايا و تبص على شكلها بحزن،و نزلت دموعها و هي بتقول: ايه الشعر الغريب ده ،و كمان بشرتي سودة ،علشان كده محدش بيحبني و الكل يكرهني.
و رغم أن ريناد كانت جميلة ،الجمال مش مقتصر على البشرة البيضاء و الشعر الناعم، بس هي معندهش ثقة في نفسها.
خرجت من دوامة أفكارها على صوت مرات عمها: ريناد تعالي شوفي محمد اخوكي عمل ايه.
خرجت ريناد بخوف و سالت: عمل ايه يا مرات عمي
نادية قالت و هي بتضحك : المفعوص الصغير، قال ايه فتح كاميرا في التلاجة و سابها.
ريناد باستغراب: ليه يا محمد
محمد اللي في سنة خامسة ابتدائى، قال: علشان أنا عايز أعرف لما اقفل التلاجة اللمبة تفضل شاغلة و لا تقفل.
الموقف البسيط ده من اخوها خلها تنسي زعلها و تضحك من قلبها ،و سالت : و عرفت يا اخويا
محمد: اللمبة بتنور بس لما التلاجة تكون مفتوحة
ريناد: و ارتاحت لما عرفت الاكتشاف الخطير ده
محمد: اه
ضحكت نادية و قالت: انا عندي احساس أن الود هيكون عالم كبير
ريناد: هيبقي عالم كبير علشان لمبة التلاجة
نادية بحب: اه لو ابني حبيبي مش هيبقي عالم مين هيبقي.
ريناد بحب: ربنا يبارك فيكي يا مرات عمي، بعد وفاة بابا و ماما كنتي لينا و نعم الام
نادية بحب: انا و انتم عوض لبعض ،انا ربنا مش ريد اكون أم و انتوا كنتوا ولادي و انا زي امكم
حضنتها ريناد قالت: انتي و عمي نعم الاب و الام
محمد: خلصوا فقرة الدراما دي علشان أنا جعان
ريناد: حاضر هحضر الاكل
نادية: لا ادخلي انتي علشان المذكراة و انا هعمل
ريناد: عايزة اشيل عنك شوية
نادية: اسمعي كلام السنة دي صعبة و تالتة ثانوي مهمة ركزي السنتين دول علشان تدخلي الكلية اللي تحلمي بيها
ريناد: ربنا يسهل.
و دخلت ريناد اوضتها و تحمد ربنا على طيبة عمها و مرات عمها معها هي و اخوها..
/////////////(
عند حلا كانت لسه مرجعتش البيت و قاعدة في كافية مع صاحبتها ،اللي سالت : و ناوية على ايه؟
حلا: عندي حل علشان أهلي يوفقوا
داليا: ايه هو
اتكلمت حلا بهمس: انت/حر
خبطت على صدرها و قالت بصدمة: انتي مجنونة يا حلا
حلا: متخافيش انا هخلي بالي و كل حاجه معمول حسابها.
داليا بعصبية : ما بلاش جنان الموضوع خطير..
حلا بتحدي: جهزي نفسك علشان تحضري خطوبتي قبل امتحانات الثانوية
داليا بحزن : ربنا يشفيكي
ضحكت حلا من غير ما يفرق معها خطورة الموضوع..
/////////
الساعة واحدة الصبح ،خرجت تيا من اوضتها على صوت خناقة ابوها و امها زي العادة
وقفت على السلم و هي تسمعهم بحزن
ام تيا( نرمين) : هو انت ايه كل يوم سهر لوش الصبح
ابو تيا( ماهر) : و انتي مالك و مالي.
نرمين بعصبية: انا مراتك يا استاذ
ماهر بصوت عالي: بلاش وجع دماغ على المسا و غوري من وشي.
دخلت تيا أوضتها تبكي بصمت زي العادة
//////(//////////
تاني يوم الصبح
في فيلا هنا
بتنزل على السلم و هي بتقول: صباح الخير يا ماما
إيمان: صباح النور يا قلب ماما
هنا: كنت عايزة فلوس
من غير ما تسال ليه أو حتي عايزة كام ادتها مبلغ كبير و قالت: خدي يا حبيبتي اصرفي و عيشي حياتك.
هنا: شكرا يا ماما
////////(((
في بيت حلا
سعاد: يلا يا حلا علشان تروحي المدرسة
خرجت حلا من الاوضة و قالت: حاضر يا ماما
عادل: تعالي افطري معانا
حلا : معلش يا بابا متأخرة على المدرسة
خرجت حلا و اهلها يدعو لها بالتوفيق.
مجرد ما خرجت من الشارع كان في شاب مستنيها قرب منها و قال: وحشتني يا أجمل حلا في الدنيا.
ابتسمت بخجل و قالت: و أنت كمان وحشتني يا معاذ
معاذ : طمنيي قلب معاذ ،ابوكي قال ايه
حلا بحزن: ما انا قولتك في التلفبون رفض برضو بس أنا عندي حل
معاذ : ايه هو؟
حلا: خليها مفاجأة
معاذ : دلوقتي عايزك تركزي في الامتحانات اللي على الابواب.
حلا: من عيوني يا حبيبي
مشيت حلا لحد المدرسة مع معاذ
///////((
قدم مدرسة البنات
قال آسر بعصبية: و بعدين بقي هو ذنب عليا كل يوم نقف كده
حمزة: أنت كل يوم تعمل حوار ليه هما خمس دقائق تجي ابص عليها و نمشي..
آسر: و بعدين يا عم روميو هتفضل تحب بصمت كده، مش ناوي تعترف.
حمزة: خايف لو اعترفت بحبي ترفض ،بيان عليها محترمة
آسر: كان يوم ابيض يوم ما شوفتها صدفة و بقي مكرر علينا نجي هنا قبل الجامعة يوميا.
دق قبل حمزة اول ما نزلت صبا من الميكروباص و قال : اهي ظهرت، شايف الشمس نورت ازاي
آسر بتريقة: كده كده الشمس طالعة
جز حمزة على أسنانه بغيظ و قال:: اسكت بقي يا غبي ..
آسر: حاضر، بس انا مستغرب حاجة.
حمزة كان مركزة مع صبا اللي دخلت المدرسة و اختفت من قدمه، و بعدين قال: مستغرب ايه؟
آسر: ازاي هي في مدرسة في خاصة و من أكبر المدراس و تجي في الميكروباص
حمزة: مش عارف، بس انا مستغرب ازاي ميكروباص يجي في المنطقة دي
آسر: انا بقول يلا نلحق المحاضر
حمزة: يلا يا صاحبي
ركب حمزة و آسر عربية حمزة و مشيوا على كلية الطب هما في سنة ثالثة..
//////////
في يوم دراسي جديد
مروة: النهاردة في نشاط ترفيهي ،مطلوب من كل طالبة فيكم تعبر عن المشاعر اللي جوها من خلال رسم لوحة
رفعت هنا ايديها و قالت: بس أنا مش بعرف ارسم
مروة: مش شرط رسمة محترفة.، رسمة بسيطة تعبر عن مشاعركم، مدة الاختبار ساعة و الاختبار عليه درجات، حاجة كمان محدش هيشوف الرسم غيري.
بدوا البنات في الرسم و كل بنت عبرت عن مشاعرها برسمة
عدت ساعة و بدأت مروة تلف على البنات
البداية مع صبا و كانت لوحة ، بيبي صغير على الأرض قدم باب حديد كبير، بصت مروة عليها بابتسامة و فهمت أنها تقصد نفسها و قالت: جميلة…
و بصت على رسمة هنا اللي رسمت بصعوبة و قالت: انا حاولت يا ميس بس كان صعب،تحبي اشرحلك اللوحة
مروة : اللوحة جميلة و انا فهمتها
هنا : شكرا
هنا رسمت قبر و طفلة صغيرة تبكي و كان ده قبر ابوها اللي مات و هي طفلة..
مروة: فين اللوحة يا تيا
تيا ببرود: مش لازم حضرتك تشوفيها
مروة : اتكلمي كويس ،هاتي اللوحة
قطعت تيا اللوحة و قالت: انا عايزة أسقط مش عايزة انجح.
مروة: تمام اقعدي يا تيا
قعدت تيا و مشيت ناحية تمارا اللي لوحتها بيضاء ، سالت مروة: ايه دي يا تمارا
تمارا: انا معرفتش ارسم ايه، علشان كده سبت اللوحة فاضية زي حياتي.
مروة: تمام يا تمارا
و مشيت على ريناد و لوحتها كانت كلها اسود عكس لوحة تمارا ،سالت مروة: ايه ده يا ريناد
ريناد بحزن: دي أنا .
مروة بزعل: اخس عليكي يا ريناد ،انتي جميلة و لازم تعرفي انك جميلة، اقعدي يا حبيبتي
و مشيت على حلا: ها يا ست حلا فين الرسمة
مدت أيدها بسعادة و قالت: اتفضلي دي انا بفستان ابيض علشان هكون عروسة قريب
ضحكت مروة و قالت : انتي لسه صغيرة
حلا برفض: لا مش صغيرة و هتجوز السنة دي
مروة : أن شاء الله اقعدي .
و كملت مروة لف على باقي الفصل و كان الاختبار علشان يخرجوا الطاقة السلبية اللي جوهما.
حلا: انتي كنتي رسمة ايه
تيا: ملكيش دعوة
حلا: براحتك يا توتا
و كلمت تيا نفسها: هكون رسمة ايه غير امي و ابويا اللي ديما يتخانقوا قدمي انا زهقت منهم و عايزة اخلص منهم…
صبا: انتي رسمتي ايه؟
مدت أيدها بلوحة و قالت: رسمت دي
صبا: ليه يا بنتي كده؟
ريناد: ما هي دي أنا
صبا: لا مش انتي، انتي جميلة اوي بس انتي عامية
ضحكت ريناد و قالت: أنتي اللي عيونك حلوة، يلا قولي رسمتي ايه؟
صبا: رسمت طفلة صغيرة مرمية قدم ملجا..
ضحكت ريناد بحزن و قالت: هوني على نفسك يا صبا
صبا: متخافيش عليا أنا جامدة و مش بخاف
ريناد: ربع ثقتك بنفسك
صبا: لما تشوفي نفسك صح هتكوني واثقة في نفسك..
ريناد: أن شاء الله
و كان يوم دراسي عادي زي بقيت الايام
//////(((////
بتعدى الايام و صبا و ريناد ديما مع بعض و ده مضايق باقي البنات
في كافتيريا المدرسة
قربت تيا على ترابيزة صبا و قالت: مش كفاية كده يا صبا
صبا بعدم فهم: كفاية ايه؛ مش فاهمة
تيا: كفاية تمشي مع ريناد، صحيح انتي بنت مش من مستوانا بس على الاقل جميلة مش زي الفحمة السودة اللي جنبك.
صبا: و طالما انا مش من مستواكم مش عايزة اصحابكم علشان انتوا عايزين علاج نفسي
جت هنا عليهم و قالت: ما تلمي لسانك يا صبا، كنتي لازقة فينا ايه حصل فجأة كده
صبا: عرفت انكم من غير قلب
حلا: و هانت عليكي العشرة،احنا صحاب من سنة أولى
تمارا: صبا تطلعت غدرة
صبا: عمري ما كنت غدرة و لا هكون
هنا::خالص يا بنات خلوها براحتها مع ريناد اللي شبه الفحمة السودة
صبا زعقت فيهم: امشوا من هنا انتوا معندكمش لا دم و لا احساس.
و بصت على ريناد اللي تعيط بصمت و قالت: انتي ليه جبانة كده دفاعي عن نفسك
ضحكوا البنات و قالت تيا::انتي قولتي هي جبانة
و رجعوا على البنات على الترابيزة و صبا بصت ريناد بعتاب و مشيت على الفصل.
///////
خلص اليوم الدراسي و ريناد طلعت على قبر ابوها و امها ،قعدت قدم القبر و هي تبكي: أنا مش عارفة ادفاع عن نفسي، و ثقتي بنفسي مهزوزة ، من صغري و انا الكل ينتقد شكلي و انا اسكت و معرفش ارد. سمعت كلام كتير وجع قلبي ،طيب انا ذنبي ايه قلبي مش قادر يتحمل الوجع، و زهقت من حياتي.
جت صبا من وراءها و قالت: احمدي ربنا يا ريناد، في غيرك يتمنى يعيش مكانك
ريناد بدموع: الحمد لله ،كان نفسي يكون بابا و ماما جنبي.
صبا: على فكرة لو جنبك ناس كتيرة هيكون ملهمش لازمة ، زي ما قولتك لازم تكوني قوية .
ريناد: حاولت و مش قادرة
صبا: متضحكيش على نفسك، انتي خايفة تحاولي
مدت صبا أيدها و قالت: انا جنبك و هفضل معاكي طول العمر…
مسكت ريناد ايديها و قالت: الحمد لله على وجودك في حياتي
مشيت صبا و ريناد من المقابر و رجعت صبا الملجا، و ريناد رجعت البيت و قررت تغير من نفسها.
///((((((((
في بيت تمارا
رجعت البيت اللي كان قصر كبير و مليان ناس بس تمارا عايشة وحيدة، بصت على البيت و قالت: عندي اب و ام و اخوات و البيت مليان خادمين و مع ذلك أنا عايشة وحيدة و حياتي فاضية و طلعت اوضتها بحزن…
////((((((((//
عدي يومين
و كان ابو حلا و امها قاعدين في الصالة فاكرين أنها بتذاكر بس هي الحقيقة بتخطط ازاي تضغط عليهم علشان تتجوز الشاب اللي هي عايزاه..
خرجت حلا من الاوضة و حطه أيديها على بطنها و قالت: انا انتح*رت علشان مش موافقين اتجوز الشاب اللي انا عايزاه.
بصوا عليها و كانت بتنزف من بطنها ،لانها جرحت نفسها بالس*كينة.
دقائق صمت و ذهول، و صرخت سعاد: يالهوي بنتي بتروح مني
عادل: أخرسي يا سعاد بلاش فضايح.
جري على حلا اللي كانت بتفقد الوعي شالها و هو بيقول بحزن : لدرجة دي حياتك رخيصة عندك.
مشيوا على المستشفى و تم خياطة الجرح و بقت كويسة ، و رجعوا البيت
عادل بغضب: ليه عملتي كده
حلا: علشان بحب معاذ و حضرتك رافض الجواز
عادل: انا خايف على مصلحتك انتي لسه صغيرة و مع الوقت ممكن مشاعرك تتغير
حلا بعناد: مشاعري هتفضل زي ما هي
عادل بقى مش عارف يعمل ايه ؟ يرفض تاني و تحاول تنتحر تاني او يقبل و تتحمل هي تمن اختيارها.
عادل: بلاش تعملي كده تاني، حياتك غالية علينا …
حلا: لو متجوزتش رامي هموت نفسي
ضربها بالقلم و هو يصرخ:: انتي قليلة ادب و انا معرفتش اربيكي
دخلت سعاد و قالت: كفاية يا عادل
عادل بغضب: بنتك بتقول هتموت نفسها
سعاد بحزن: ربنا يهديكي يا حلا
و خرج عادل و سعاد من الاوضة و هي شايفة نفسها صح و مش غلطانة
برة
عادل: هنعمل ايه
سعاد بحزن: مش عارفة
عادل: انا هوفق تجوز معاذ و هي تتحمل اللي هيحصل
عيطت سعاد بحزن على بنتها اللي عايزة تضيع نفسها
///////
بليل
على القهوة
عادل بضعف: انا موافق يا معاذ تعال أخطب حلا
معاذ : و أنا يشرفني نسبك يا عمي ،و اوعدك اعمل المستحيل علشان حلا تكون مبسوطة ، بس انا هاجل شوية على ما اخلص الجيش.
انجرح عادل و قام بحزن و بلغ حلا اللي شايفة أن أهلها السبب و صرخت بجنون: انتوا السبب لو كنتوا وافقتوا من اول مرة مكنش رافض.
مقدرش عادل يتحمل و نزل ضرب فيها ،و سعاد بعدته عنها بالعافية.
//////((((
تاني يوم في المدرسة
تمارا: فين حلا
تيا: انتي متعرفيش المجنونة عملت ايه
تمارا: عملت ايه
تيا: حاولت تنتحر علشان ابوها يوفق على الجواز
تمارا بصدمة: يخربيت جنانها قدرت تعمل كده ازاي
صبا بعصبية: تيا اللي قالتها تعمل كده…
تيا: ملكيش دعوة يا صبا مش انتي ماشية وراء الفحمة السودة
خدت ريناد نفس و قالت: احترامي نفسك يا تيا و إياكي تغلطي فيا
ضحكت تيا و تمارا بصوت عالي
تمارا: شوفي مين بيتكلم ريناد طلعت ليها صوت
ريناد بعصبية: أيوة ليا صوت و مش هسكت تاني لو حد فكر يجرحني بكلمة…
تيا: طيب ريناد فحمة سودة هتعملي ايه
ضحكت ريناد و قامت من مكانها و فجأة ضربت تيا بالقلم
تحت صدمة كل اللي في الفصل
صبا بصوت عالي: الله واكبر،اخير يا ريناد.
رفعت تيا ايديها علشان تضربها بس دخل الاستاذ و قال: الكل يقعد في مكانه
قعدت تيا و هي حرفيا هتولع.
صبا: حمد لله على السلامه يا ريري..
ريناد: الله يسلمك و شكرا ليكي على الدعم
صبا: اي خدمة يا حبيبتي
/////////
أما هنا كانت في غرفة المدرسين و قالت بدلال: ممكن يا مستر تفهمني القطعة دي
طارق بغضب: انتي بتعملي ايه هنا. المفروض في حصة دلوقتي.
هنا: مش مهم الحصة
طارق بعصبية: لو فضلتي تحاولي تقربي مني ،هبلغ إدراة المدرسة عنك..
هنا : انا بحبك يا مستر
طارق بهدوء: مشاعرك دي مشاعر مراهقة،علشان كده حاولي تركزي في الدراسة اهم
هنا بحزن: لا يا مستر مشاعري حقيقة انا بحبك
طارق بغضب: أطلعي برة..
خرجت هنا بغيظ
////////
بعد الحصة
مشيت تيا عند ريناد و مسكتها من شعرها و قالت بغضب: بقي انتي تضربني أنا
صبا: ابعدي عنها يا تيا
مسكتها تمارا و قالت: بلاش تتدخلي انتي يا صبا
ريناد بتهديد: ابعدي ايدك احسن لك
ضحكت تيا باستهزاء
ريناد: براحتك بقي انتي الخسرانة
زقتها ريناد و نزلت فيها ضرب ،حرفيا عجنتها.
و صبا وافقة مبسوطة و بتفرج عليهم عكس تمارا متغاظة أما هنا قاعدة حزينة..
//////(/
بعد انتهاء اليوم الدراسي
كانوا خارجين صبا مع ريناد
صبا بابتسامه: برافو عليكي يا ريناد
ريناد: ايه رايك أقل حاجه عندي
كان واقف من بعيد حمزة مع أسر
و قرر حمزة يتكلم معها النهاردة ،قرب منهما و قال: ممكن اتكلم معاكي يا انسة
شاورت صبا على نفسها و قالت: أنا
حمزة: أيوة
صبا: خير ان شاء الله
حمزة من غير مقدمات، قال : بحبك
اتصدمت صبا و مشيت من غير كلام و وراها ريناد و كمان حمزة و آسر
حمزة: انا عارف أن ممكن تفتكري اني شاب طايش أو عايز اتسلي بيكي، بس انا أعجبتك بيكي لما شوفتك مرة صدقة و بقيت يوميا اقف هنا وقت الدخول و الخروج علشان اشوفك، صدقني حبي ليكي بجد
آسر يساعد صاحبه و قال: هو ابن عيلة كبيرة و كمان في كلية الطب سنة تالتة و الموضوع بالنسبة له مش هزار..
وقفت صبا و قالت بهدوء: صاحبك عرفني عنك انا كمان اعرفك عني علشان احتمال كبير تكون مخدوع فيا، أنا بنت يتيمة تربية ملجا معرفش منين ابويا و أمي ، حد رماني قدم الملجا، دخلت المدرسة دي بمنحة علشان مجتهدة و اظن كده الموضوع انتهى…
مشيت صبا و معها ريناد
قال آسر: علشان كده ديما تركب ميكروباص
ابتسم حمزة. قال: تصدق حبي زد لها و هستنا تخلص الثانوي و اخطبها..
////////////
راحوا البنات عند حلا
هنا: عاملة ايه
حلا: مش كويسة خالص
تيا: كنتي هتضيعي نفسك على الفاضي
تمارا: ارجعي لعقلك يا حلا
حلا: مش هسكت غير لما اتجوز معاذ غصب عن الكل
دخلت سعاد على الكلمة دي و قالت: الكل ده اللي هو ابوكي و أمك
حلا بعصبية : أيوة يا ماما أنا هحارب الكل علشان حبي
سعاد بحزن: يا خاسرة يا حلا ماشية وراء شيطانك مش بتفكري في الحرام و الحلال
و خرجت سعاد من الاوضة
//////(/(
بعد اسبوع
كانت قاعدة سعاد وسط ستات كتير ،كلهم لبسين اسود في اسود و سماعة كلام كتير منهم بس هي مش فاهمة هما بيقولوا ايه،او مش عايزة تصدق، ازاي تصدق ان بنتها ماتت و دلوقتي هي تحت التراب و السبب كان صدمة ، هي اللي عملت في نفسها كده.
و افتكرت اللي حصل امبارح
///////
فلاش باك
صحيت حلا زي كل يوم على أساس أنها ماشية على المدرسة بس هي كانت ناوية تروح مكان تاني..
قابلت تيا قدم البيت و قالت : هتيجي معي يا تيا
تيا: على فين
حلا : هجيب برشام
تيا: برشام ايه، أنتي تعبانة
حلا: لا مش تعبانة بس هتعب
تيا بعدم فهم: مش فاهمة
حلا: هاخد حبية الغلة
صرخت تيا و قالت: نهارك ابيض انتي رحت منك خالص، انتي عارفة ان الموضوع مش هزار
حلا: افهمي يا تيا ، انا لازم اعمل كده علشان اتجوز معاذ
تيا بعصبية: معاذ ده اللي رافض يتجوزك و قال لما يخلص جيش.
حلا: بابا يكدب،علشان أنا كلمت معاذ و قال إن هو وافق و بابا بيقول كده علشان يضحك عليا.
تيا : ما بلاش تصدقي معاذ في كل حاجه
حلا : تيا انا بحب معاذ و مش هقدر ابعد عنه، هعمل كده علشان بابا يوفق و معاذ ميقدرش يرفض
تيا: أنا حذرتك و مش هقدر اشارك في اللي هيحصل، صحيح أنا شجعتك زمان بس دلوقتي بقولك بلاش يا حلا أنا خائفة عليكي…
حضنتها حلا و قالت: متخافيش ابقي سلمي على البنات و قريب اعزمكم على فرحي و قولي صبا أنها وحشتني و قولي ل ريناد تسامحني.
تيا: ايه يا بنتي الأوفر ده
حلا: مع السلامة
مشيت تيا على المدرسة و مكنتش تعرف تيا أن ده آخر لقاء ، و حلا مشيت على طريق الشيطان…..
///////////
بعد ساعات
خرجت حلا من اوضتها و علامات الخوف و الرعب عليها و قالت بخوف: ماما أنا خدت حبة الغلة و مش عايزة اموت
خلصت كلامها و وقعت من طولها، صرخت سعاد بصدمة ، و هي بتقول: عملتي ليه كده، حرام عليكي، حرام عليكي..
مسكت التلفيون و اول ما رد ،صرخت و هي بتقول: الحقني يا عادل، حلا خدت حباية الغلة
عادل بخوف:انا هطلب الإسعاف حالا
/////////
بعد شوية في المستشفى
حلا على الترول ،مسكت في ايد امها و قالت: ماما اوعي تسبيني انا خايفة انا كنت فاكرة اني اعمل غسيل معدة و اخرج على طول ،انا خايفة اموت و اقابل ربنا كده، ياريتني سمعت كلامك..
و دخلت حلا غرفة العمليات
قاعدة سعاد على الأرض و تصرخ بانهيار و عادل واقف بس منهار و نزلت دموعه و هو شاف الموت في عيونه بنته و قال بصوت عالي: أن لله و ان اليه راجعون ، لله الامر من قبل و من بعد
صرخت سعاد : اسكت ،اسكت بنتي هتعيش..
سكت عادل مردش عليها و بعد شوية خرج الدكتور و كلامه كان متوقع لما قال: البقاء لله
صرخة كسرت قلب سعاد لما سمعت كلام الدكتور
و عادل سند على الحايطة و قال: ان لله وان اليه راجعون.
///////////
عودة
وصلوا أصحاب حلا ( هنا و تيا و تمارا و صبا و ريناد)و هما مصدومين أنها ماتت
أول ما سعاد شافتهم قال بصوت واطي: حلا ماتت، حلا ماتت
البنات عيطوا بانهيار و فجأة سعاد صرخت بأعلى صوت و هي بتقول: حلا ماتت كافرة ،قت*لت نفسها.
و بقت تلطم على وشها و تقول كلام من واعي : أن شاء الله يا حلا ربنا هيحرقك في نار جهنم
جربوا عليها البنات و قالت صبا: كفاية يا طنط ادعي لها بالرحمة
هنا: ربنا غفور رحيم
تيا: حاولي تهدي علشان صحتك
تمارا: البقاء لله
ريناد فجأة افتكرت وفاة أهلها و مبقتش قادرة تتحمل صراخ سعاد ، خرجت من المكان و قعدت على جنب و حاولت تكتم دموعها، قعد جنبها أسر و قال: على فكرة مش لازمة تكتمتي الدموع، اخرجي اللي جواكي علشان ترتاحي
مجرد ما سمعت كده انهارت من العياط و قالت: بابا و ماما وحشتوني اوي انا مش عارفة اتخطي موتهم ،عدى اربع سنين و مش عارفة اتعيش على فكرة أنهم مش موجودين في حياتي
آسر بهدوء: كل حد فينا جرب الفقد و لازم نكون اقوي علشان هي دي الحياة صعبة بس لذيذة
مسحت دموعها و قالت: شكرا
آسر : العفو
جاه حمزة و قال: يلا يا آسر
افتكر أن البنت دي كانت مع صبا ،سال: انتي تعرفي حلا
ريناد بحزن : حلا كانت زميلتي في المدرسة
حمزة: يعني صبا هنا
ريناد : أيوة
و دخلت عند البنات. ،،،،قاعدوا شوية و بعدين مشيوا ،موت حلا كان صدمة عليهم كلهم
///(((
رجعت تيا البيت ، و زي العادة أهلها يتخانقوا ،قربت من ابوها و امها و صرخت: كفاية، كفاية بقي حرام عليكم حسوا بيا ،لمرة واحدة حسوا بيا و بطلوا خناق. صاحبتي ماتت النهاؤدة،لا مش ماتت دي انت*حرت ،و انا محتاجة حضنكم…
قربت امها و ابوها منها و حضنوها و هي المهارات و قالت بصرخة: حلا ماتت، انا شجعتها تحاول تنتحر ،مكنتش فاكرة أنها توصل معي لكده. انا مش عارفة اكمل حياتي من غيرها و خايفة عليها اوي.
ام تيا بندم: انا اسفة
ابو تيا: حقك علينا ،اوعدك نغوضك على كل دقيقة ضاعت و احنا نتخانق بدل ما نخلي بالنا منك
تيا بدموع: انا بحبكم و عايزة اكون بنت ناجحة و كويسة مش بنت تنتمر على اي حد و شايفة أنها احسن من الكل
ام تيا: مع بعض هيحصل كل اللي انتي عايزاه
و كان وفاة حلا بداية جديدة في علاقة تيا مع اهلها…
//////////////
في بيت تمارا
وصلت بيتها و الكل مشغول في الشغل حتي امها تهتم بالموضة و أنها تكون ديما على جميلة
دخلت القصر اللي بتحس فيها بالبرد حتي لو في الصيف، ولعت الولعة تحت انذار الحريق ،و اشتغل الانذار و اتجمع كل اللي في القصر
و هما مرعوبين من الحريقة
وفقت تمارا و قالت: متخافوش انا اللي شغلت انذار الحريق
زعق ابوها و قال: جرا ايه علشان تعملي كده
قالت إنها: انتي مجنونة يا تمارا
تمارا: ممكن اكون مجنونة بس الاكيد اني يتيمة رغم وجود عيلة كبيرة زيكم
اخوها الكبيرة: مالك
هنا تمارا انهارت حصونها و قالت : مالي، انا تعبانة اوي، عايشة وحيدة و يتيمة كاني مليش أهل مع أن عندي عيلة كبيرة، انا بقيت اشوف الفلوس و القصر الكبير ده نقمة في حياتي ، عمري ما حسيت بدف العيلة ، كتير يكون عايزة احضنك يا ماما و قولك يومي مشي ازاي ،و انت يا بابا كنت بحلم القيك تسالني عاملة يا حبيبتي ، و لا اخوكي اللي كنت اتمني يكونوا ضهر اتسند عليه..
وقعت في الأرض و صرخت و هي بتقول: ليه بتعاملوني كده و كاني مش بنتكم..
يمكن لاول مرة أهلها يحسوا بالتقصير في حق تمارا
قال ابوها بنبرة حزينة : كنت فاكر لما احقق لكي كل طلباتك كده بعمل اللي عليا ، أنا اسف يا تمارا لاني و أنا بحاول اجمع ثروة تكوني امانك من بعدي ، خليتك تخسري الامان في وجودي.
قربت امها منها و حضنتها و بكت من غير كلام
أما اخوها قال: معنديش كلام كتير أقوله ،غير اسف يا حبيبت اخوكي و اوعدك نبدا من جديد و اكون الاخ اللي تحلمي بيه.
///(/(
في بيت هنا
لاول مرة قعدت مع امها و حكت عن مشاعرها، قالت بحزن: من بعد وفاة بابا و انا حاسة بالضياع حضرتك تعبتي كتير في تربيتي و عملتي المستحيل بس انا كان ناقصني يكون عندي راجل في حياتي مفيش لا اخ و لا أب، و علشان كده وقعت في حب المدرس بتاعي هو اكبر مني بس حسيت بحبه حب أبويا و أنا عارفة اني غلطانة و غلطت كتير بس نفسي اتغير ساعدني يا ماما أنا خائفة يا اعمل زي حلا
حضنتها بحب و قالت: بعد الشر عليكي يا حبيبتي ،متخافيش انا جنبك و هساعدك تكوني احسن…
////(((((
عند صبا كانت تصلي و رفعت ايديها و قالت: الحمد لله يارب على كل حال، الحمد لله أن قلبي عامر بالإيمان، و رغم ظروفي عندي ثقة في الله، ربنا يرحمك يا حلا و يغفرلك و يسكنك فسيح جناتك.
////////////////
في بيت ريناد
كانت قاعدة مع مراته عمها و قالت: انا زعلانة عليها اوي يا مرات عمي
ردت عليها بهدوء: ربنا يرحمها و يصبر اهلها ،المهم تكوني مسامحها على كل حاجه
ريناد: ربنا يسامحها انا مسامحها…
/////(////(
بعد اسبوع
في المدرسة
و بالتحديد فصل البنات كانت مروة بتقول: اكيد كلنا عرفنا على اللي حصل حلا و زعلانين عليها، اللي تقدر نعمله ندعي لها بالرحمة و يصبر اهلها، الاهم أننا نعرف أن الحياة مش سهلة و مش اي مشكلة تحصل ، ناخد الحل السهل اللي هو الهروب ،لازم نوجهه مهما كانت الظروف ،يا بنات اسعوا علىشان تكونوا افضل ،و نشاط دلوقتي هو كل بنت فيكم تكتب كلمة واحدة بس في الورقة و تحتفظ بيها.
بدأت البنات تكتب و كلهم كتبوا كلمة واحدة( اسفة) كان اعتذار لنفسهم و لاي اي حد زعلوا منهم.
و تمت السنة الدراسية و نجحت البنات اللي كان عندهم وقت يتغيروا بعد موت حلا أما حلا خسرت نفسها.
و خلصت الثانوية العامة و اتفرقت البنات في منهم دخل كلية ادبي و في كليات علمي
دخلت صبا كلية طب، و ريناد كلية اعلام، أما تيا كلية علوم و هنا كلية حقوق.
و اول شخص قابل صبا و يتكلم معها كان حمزة اللي قال بابتسامة: كدفعة سنة أولى منورة
كانت صبا ليه فاكره بس عملت نفسها نسيت و سالت : اهلا وسهلا ، مين حضرتك
حمزة مش فاكرني
صبا: لا مش فاكرة ، عن اذنك
و مشيت صبا ، جاه اسر و قال: اومال فين صحبتها
حمزة بعصبية: مش عارفة و بعدين دي مش فاكرني…
آسر: انا من وقت ما شوفت صاحبتها في عزاء حلا بنت خالي مش عارف انساها.
حمزة: و انا مش عارف انساها، بس هفضل وراها لحد ما تكون ليا
////////
بعد عشر سنين
كان فرح حمزة و صبا
حمزة بسعادة : و اخيرا بقيتي مراتي
ضحكت صبا و قالت : لما أتاكدت أنك شخص مناسب ليا و قبلت كل ظروفي لقيت اني هكون غلطانة لو ضيعتك من ايدي..
حمزة: اوعدك اعمل المستحيل علشان اسعدك
كانوا البنات موجدين
تيا مع جوزها و هنا مع جوزها و ريناد مع أسر خطيبها..
و في النهاية اللي عافر و حاول يصلح من نفسها هو ده اللي كسب..
و تمت و ليس للحديث بقية
رايكم يا حلوين ♥️ 🥰
اكتر بنت حبته من البنات هي مين
منتظرة رايكم بعد القراءة
#مدرسة_البنات
#روايات_بقلم_منال_كريم
❤️❤️❤️❤️❤️❤️❤️❤️❤️❤️❤️❤️❤️
سبحان الله وبحمده سبحان الله العظيم
استغفر الله العظيم و اتوب اليه
لا إله إلا الله وحده لا شريك له له الملك وله الحمد وهو على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
حسبي الله ونعم الوكيل
اللهم انك عفو كريم تحب العفو فاعف عنا
اللهم احفظ مصر واهلها من كل شر
اللهم احفظ اولادنا وبناتنا من كل شر
❤️❤️❤️❤️❤️❤️❤️❤️❤️❤️❤️❤️❤️❤️❤️❤️