أختي و مراتي بقلم منال كريم
كانت بتصرخ بجنون و عدم تصديق: معقول يطلقني بعد كل الحب اللي بينا، و عشرة السنين و مفكرش في ولاده،باعني بالسهولة دي علشان أخته الشيطانية..
//////////
في محافظة الإسكندرية
في شقة بسيطة قريبة من البحر، صوت الموج عالي ،كانت نورا بتطبق غسيل والولاد نايمين( أسر ٨ سنين، و أسيل سنين )
راجع عمار من الشغل و التعب بيان عليه و قال: السلام عليكم ورحمه الله وبركاته
نورا بابتسامه:و عليكم السلام ، حمدالله على السلامة، خد دوش و على ما جهز الأكل.
عمار: حاضر
دخل عمار الاوضة و نورا على المطبخ
/////////
على السفرة
عمار ياكل و هو ساكت، سالت نورا بابتسامة: يومك كان عامل ازاي
عمار بهدوء: الحمد لله ، بقولك كلمت أختي النهاردة.
الابتسامة اللي كانت منورة وش نورا اختفت و عرفت باقي الكلام
و فعلا كمل عمار كلامه: سارة هتجي تقضي معانا كم يوم،،، الجو عندها خنقة في القاهرة. وبنتها تعبانة والدكاترة قالوا تغير جو. فقولتلها تيجي تقعد عندنا أسبوعين مصيف.
نورا بصوت هادي بس مخنوق : هاجي إمتى؟
عمار : الخميس الجاي، أوضة الضيوف فاضية، و ياريت تتعاملي معها هي و بنتها كويس .
نورا بعصبية: وأنا؟
عمار باستغرب: وإنتي مالك يا نورا؟
قامت نورا من على السفرة و قالت بعصبية : أنا مراتك وأم عيالك. صاحبة البيت ده معاك، حضرتك خدت القرار لوحدك من غير ما ترجعلي كاني مليش لازمة في حياتك.
عمار بص عليها بعتاب و قال بنبرة عتاب: سارة أختي و أرملة وبنتها يتيمة، و ملهاش حد غيري، انا لو سألتك عارف انك هترفضي، و بعدين دول أسبوعين بس مش قادرة تتحملي اختي و بنتها فيهم.
نورا : أسبوعين ولا سنة، المشكلة مش في المدة. المشكلة إنك شايفني ديكور. بتبلغني بعد ما خدت القرار.
قام عمار من على السفرة و قال بغضب : إنتي ليه قاسية كده؟ بنت اختي نفسيتها تعبانة، انا فكرت يمكن لما تجي هنا حالتها تتحسن، و مش هفكرك تاني أن اختي ملهاش غيري…
نورا شالت الاطباق و هي بتقول : و أنا مراتك،،ومن حقي أرفض ان حد يقعد في بيتي فترة طويلة من غير ما يكون ليا رأي ده مش فندق.
عمار: تفتكري لو حد من أهلك كان مكان اختي كان ده هيكون راي ،على العموم شكرا يا بنت الاصول
دخل عمار اوضة النوم و نورا قعدت تفرك طول الليل و تكلم نفسها: انا بكون مش مرتاحة في وجود سارة ده بيتي و من حقي اكون على راحتي..
/////////(
تاني يوم الصبح
كانت نورا بتحضر الفطار و عمار و الاولاد قاعدين على السفرة ،رن التلفيون،قال عمار: ازيك يا سارة
سارة: الحمد لله يا حبيبي، بقولك إن شاء الله هنوصل الخميس العصر
عمار: توصلوا بالسلامة
قفل عمار معها و وجه كلامه الولاد: عمتو سارة و بنتها ياسمين جاينا عندنا اخر الاسبوع
فرحوا العيال و قالت أسيل: ها ها ،انا بحب العب مع ياسمين اوي
عمار بحزن: و هي كمان بتحب تلعب معاكي ،عايزكم تخلوا بالكم منها علشان هي بعد موت ابوها و تعبانة
أسر: متخافش يا بابا هنخلي بالنا منها
كانت نورا تسمع الكلام و هي هتنفجر من الغضب، استنا لبعد الفطار و العيال خرجت تلعب و قالت بعصبية : انا برضو بتعمل اللي في دماغك، من الاخر يانا يا اختك
عمار بهدوء: طيب اهدي يا نورا
صرخت بجنون : انا مش مجنون علشان تقول اهدي، اختك مش هتدخل بيتي لو دخلت البيت يبقي انا هخرج منه.
عمار: افهمي بقي اختي ملهاش غيري ،فطبيعي اكون جنبها
نورا بغضب : تمام خليك جنبك اختك و انا هاخد عيالي و امشي، أما أنا مش هقول زرقك اللي يبدوب مكفي يتقسم بين عيالي و بين اختك و بنتها، ياريتها هي اللي كانت ماتت بدل جوزها اللي كل شوية تقولي اختي أرملة و بنتها يتيمة و ملهاش حد
اتصدم عمار من كلامها و قال: وصلت معاكي تتمني الموت لأختي ،تمام اوي كده، اختي هتيجي هي و بنتها و مش هتقعد اسبوعين هتفعد شهرين عجبك اهلا و سهلا مش عجبك الباب يفوت جمل بس ما تخرجي هتكوني طالق
نورا: و أنا موافقة طلقني علشان اخلص منك و من اختك ومن العيشية الزفت دي..
عمار: طالما انتي بايعة العشرة يبقي تماما كده و أنا اشتري اختي.
في الوقت دخلت سارة و هي بتقول: مفاجأة ،ضحكت عليكم و قولت اجي النهاردة بدل الخميس.
عمار و نورا رسموا ابتسامة على وشهم و مشي عمار ناحية سارة و حضنها و قال بحب : حمد لله على السلامة، عاملة إيه يا حبيبتي؟
سارة : الله يسلمك يا حبيبي،انا بخير.
بعد عنها و شال ياسمين و قال: عاملة ايه يا سوسو
ياسمين : الحمدلله يا خالو.
نورا واقفة بعيد، وشها مبتسم بس هي من جواها زعلانة و مش طايقة حد، مشيت سارة ناحيتها، بتسلم عليها و قالت : عاملة ايه يا مرات اخويا الغالي
نورا:الحمد لله أهلاً، نورتوا إسكندرية، اتفضلي يا حبيبتي..
قعدت سارة على الكنبة و قالت: : تعرفي بحس براحة غريبة في شقتك ،الشقة بسيطة و جميلة زيك.
كلام سارة كان مدح في نورا و كمان اثبت ان الشقة ملكها هي لما قالت شقتك، بس نورا وفقتك عند كلمة بسيطة و سالت بعصبية: قصدي ايه يا سارة
استغربت سارة و قالت : مش فاهمة.
نورا: قصدي أن شايفي قليلة
سارة : انا
نورا: أيوة طالما قولتي الشقة بسيطة يبقي قصدك أننا مش بفهم في الديكور
سارة بتربير: انا اسفة لو فهمتي غلط انا اقصد الشقة بتاعت جميلة بسبب البساطة اللي في الديكور ،صدقني ده مدح فيكي و في شقتك
خد عمار نفس و قال: خالص يا سارة متزعليش نفسك نورا فهمت غلط، يلا تعالي افطري انتي و بنتك انا لسه مفطرتش
سارة حست أن نورا مضايقة من وجودها،فقالت : الحمد لله فطرنا على الطريق، لو ممكن نرتاح
قبل ما عمار يرد ،ردت نورا و قالت: انا كنت فاكرة انك جاية يوم الخميس ،فا اوضة الضيوف عايزة ترتيب
سارة: مفيش مشكلة أرتب الاوضة انا و ياسمين
و خدت سارة بنتها اللي عندها( ٧ سنين) على اوضة الضيوف و رتبه.
و بره عمار منطقش بحرف مع نورا ، رغم أنه مضايق من معاملة نورا مع سارة
هي اللي قالت: انا النهاردة تعبانة و مش قادرة اعمل غداء
عمار بكل هدوء: اوعي تتعبي نفسك ، خلينا ناكل برة النهاردة
جت تتكلم ،قال بغيظ مكتوم: طبعا هتقولي ناكل برة علشان اختك بس.
و قام خرج عند الولاد
أما سارة نامت هي و بنتها من تعب السفر و الطريق..
و نورا كانت حرفيا تغلي زي النار
///////
بعد شوية صحيت سارة هي و ياسمين رتبوا السرير، و خرجوا الصالة كانوا كلهم قاعدين،سلمت على ولاد اخوه و قعدت ووعي بتقول: معلش لو طولنا في النوم ، الطريق متعب
عمار: نوم الهنا يا سرسورة
سارة بابتسامة: انا مش عارفة يا عمار حياتي كانت هتبقي عامله ازاي من غيرك انا اللي ليا اب ولا ام كمان جوزي الله يرحمه مات وسابني انا و ياسمين
عمار: ربنا يرحم الجميع خلينا نجهز دلوقتي علشان نخرج نأكل برة
سارة : بلاش غرامة ملهاش لازمة، انا جايبة حاجات كتير معايا..
دخلت سارة الاوضة و خرجت بشنطه صغيره مليانه فراخ و بط وكمان رز و مكرونه وسكر وزيت وكانها جايبه اكلها هي وبنتها عشان ما تبقاش عال على حد ومع ذلك نورا مستخسره انها تقعد في بيت اخوها كام يوم
نورا :وسايبه في الشنطه ده كله ياك ما يكونش باظ
سارة: لا ما تخافيش الاكل متجمد كويس و بعدين الجو حلو
حطت ساره الاكل في الفريزر والمطبخ وخرجت وقالت: انا من رايي بقى اخش انا احضر الاكل وبلاش نخرج وفر فلوسك يا عمار
عمار: يا ستي الايام جايه كتير يلا بس نخرج النهارده نفك عن نفسنا و عن العيال ،بس انا زعلان انت جايبه اكلك معاكي،انا مش هقدر اكلك.
سارة: والله ما اقصد عادي انا جايه الحاجات دي من عندي وانت عارف انا عندي غاية تربيه الطيور
عمار: طيب يلا نخرج.
جهزوا كلهم وخرجوا بره واخر خط كان هيخرج من الشقه هي نورا مسك عمار ايديها وقال ::جايبة اكلها رتبت اوضتها بنفسها وعرضت انها تعمل اكل بنفسها ايه مشكلتك
وقبل ما ترد سابها وخرج وهي خرجت وراه بعد ما حست بالندم, وشافت ان اكبر غلط انها تحاول تقارن نفسها باخته او تقول يا انا يا اختي لان كل واحده فيهم لها معزه خاصه، خرجت معاهم وهي مكرره انها تتغير ومعترفه انها غلطت..
//////////
بعد ما رجعوا من البيت
في اوضه عمار
قعدت نورا جنبه وقالت بندم:أنا عارفة إنك شايل هم أختك وده حقها عليك. بس أنا كمان حقي عليك اني اعرف اي قرار ناخده، أنا مش ظالمة ولا بكره اختك انا بس عايزه يبقي عندي الخاصة
عمار: محدش جاه على حياتك الخاصة ،انتي غلطتي و قولتي كلام كتير مينفعش،انتي عايزة إيه؟ أقولها متجيش وأجرحها،كلمتني و قالت عايزة اغير جو انا و بنتي. هما عايشين في الأرياف و مفيش اي مكان ترفيهي ليهم غير عندي، ارفض أنا علشان مراتي صح
فهمت نورا الموضوع من وجهه نظر تانية هي مش حرب بينها و بين اخت جوزها،الزوجة لها مكانة و الاخت مكانة تانية خالص ،لو نورا دخلت في الحرب دي هي اللي تخسر مش حد تاني هتخسر زوج حنين على أخته و طبيعي هيكون حنين عليها
باست رأسه و قالت بندم حقيقي: من النهاردة سارة اختي أنا مش اختك انت و حقك عليا على كل حرف طلع مني ،سامحني يا عمار
ابتسم عمار و قال: سامحتك يا نورا علشان بحبك
و اتحولات علاقة نورا و سارة لعلاقة اخوات.
و تمت و ليس للحديث بقية
#روايات_بقلم_منال_كريم
❤️❤️❤️❤️❤️❤️❤️❤️❤️❤️❤️❤️❤️
سبحان الله وبحمده سبحان الله العظيم
استغفر الله العظيم و اتوب اليه
لا إله إلا الله وحده لا شريك له له الملك وله الحمد وهو على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
حسبي الله ونعم الوكيل
اللهم انك عفو كريم تحب العفو فاعف عنا
اللهم احفظ مصر واهلها من كل شر
اللهم احفظ اولادنا وبناتنا من كل شر
❤️❤️❤️❤️❤️❤️❤️❤️❤️❤️❤️❤️❤️❤️❤️❤️
