أحببت مجهول بقلم منال كريم

في قرية بسيطة بعيد عن المدينة

قامت زينب مفزوعة على صوت الصراخ اللي جاي من برة، قلبها ارتعش من الخوف ، و كلمت نفسها: يا ساتر يارب، و بعدين في اللي بيحصل في البلد دي .

و قامت تبص من الشباك و هي عيونه محبوسة على حال اهل البلد.

أما برة كان الكل بيجري بفزع و محدش مستغرب صوت الصراخ اللي على الصبح و يهز البلد، علشان كلهم عارفين مصدر الصوت ،بس كل واحد يسأل نفسه، يا ترى مين الضحية المرة دي.

اتجمعت اهل البلد حوالينا ج\ثة طفل صغير عنده عشر سنين و شكله صعب، لدرجة الكل مش قادر يبص في وشه و يحدد الملامح ،اهله اتعرفوا عليه من هدومه.

أمه و هي تصوت: قوم يا ابني يا حبيبي،انا مليش غيرك و مش هقدر اعيش من بعدك.

عمدة البلد بحزن و قلة الحيلة: لا حول ولا قوه الا بالله.

صرخ ابو الطفل و هو بيقول: و بعدين يا عمدة هتفضل ساكت برضو، مش عارف تعرف منين بيعمل كده في عيالنا، كل يوم و التاني عيل من العيال يكون ميت بالمنظر ده

العمدة: أنا مقدر حالتك، ربنا يصبر قلبك، بس يعلم ربنا أني مش ساكت.

واحد من اهل البلد: لازم الكل يتحرك عيالنا بتروح مننا، و ياريت موته عادية ، ده العيل من دول لسه طفل و نلاقي الج\ثة مبتهدلة..

العمدة : يمكن تجارة أعضاء.

ابو الطفل و أمه قعدوا كان جنب ابنهم بكسرة و قلة حيلة، و مش قادرين يتكلموا..

العمدة: ندفن العيل و نشوف حل ل المشكلة دي.

الكل مشي من المكان و فضلت زينب وافقة تبص على المكان اللي كان فيه الطفل، و كلمت نفسها: و بعدين في الموضوع ده، حتي الشرطة مش عارفة توصل لحاجة زي ما يكون شبح ، اهل البلد بقوا خايفين من الخلفة.

و هي سرحانة و مش حاسة بحاجة ، جاه صوت من وراءها بيقول: بتعملي ايه يا زينب.

لفت بخضة و قالت بعصبية: في حد يخص حد كده، قولتك اكتر من برة ،بلاش طريقتك دي معي في مرة ،قلبي هيقف.

ابتسم حربي و قال : بعد الشر عليكي يا حبيبتي ، بس براحة عليا شوية،انا بهزر معاكي.

خدت نفس و قالت: انا مش قصدي ازعلك ،بس انا قلبي خفيف و بتخض من اي حاجه.

حربي: حقك عليا يا جميلة الجميلات ، بس وافقة ليه كده.

بان عليها الزعل و قالت: زعلانة اوي يا حربي .

قرب منها و قال: مالك تعبانة و لا ايه

استغربت و سالت: هو انت مش جاي من برة

حربي ظهر عليه التوتر و قال: أيوة

زينب: يبقي ازاي معرفتش اللي حصل

حربي: متقولي ايه اللي حصل على طول من غير لف و دوران

زينب: مقصدش لف و دوران ،الموضوع زي العادة طفل جديد مات و الفاعل مجهول.

مشي ناحية الدولاب بكل هدوء و خد هدوم و قال: اكيد اللي بيعمل كده هيجي يوم و يتمسك، المهم حضري الاكل على ما اخد حمام

زينب باستغراب : انت جايب ببرود الأعصاب ده منين،كانك مش فارق معك الطفل الصغير.

نفخ بضيق و قال: انا داخل الحمام قبل ما تطلعني انا المجرم.

و دخل الحمام ، و هي دخلت المطبخ و مستغربة كلامه و تصرفاته الغريبة و كلمت نفسها: مانا غلطت برضو لما احب و اتجوز واحد غريب عن البلد و معرفش عنه حاجة، حتي شكله بيان عليه الغموض.

و ضحكت و هي بتفكر المواقف اللي حصلت بينهم اول ما جاه البلد
////((((((((((
فلاش باك

في محطة القطار ، يخرج حربي و هو شايل شنطته و يبص لو في حد مستنيه ، جاه واحد عليه و قال: استاذ حربي مدرس الالعاب

حربي: أيوة أنا.

مد أيده و قال: انا رياض فراش المدرسة ،هات الشنطة عنك

حربي: لا أنا هشيلها،و اتشرفت بمعرفتك

مشيوا الاتنين سوا، و قال رياض: عارف انك وجودك هنا حدث تاريخي

حربي: ليه

رياض: علشان هنا ل المدرسة و لا حتي الأهالي مهتمين بحصة الالعاب دي و شايفين أنها مضيعة وقت.

حربي: العقل السليم في الجسم السليم.

رياض: ده كلام اللي زيك

حربي: بس هو كلام سليم، المهم هنروح فين دلوقتي

رياض: هنروح على استراحة العمدة علشان ترتاح فيه و من بكرة تبدأ شغلك في المدرسة..

حربي: ماشي
///////
بعد شوية ، وصلوا ل الاستراحة اللي كانت نضيفة و في اكل موجود و كتير ..

حربي: ما شاء الله المكان جميل، و مين جاب الاكل ده

رياض: أهل البلد، دول ناس غلابة و اي حاجه تحتاجة هتلاقيه هنا

حربي: شكرا ليك و ليهم

رياض: العفو، اسيبك انا بقي

حربي: اتفضل

مشي رياض، و حربي يتفرج على المكان بإعجاب، و قعد ياكل و رن تلفيونه، ضحك اول ما شاف الرقم و قال: حبيت قلبي ،عاملة ايه؟

كانت صوت ست كبيرة و قالت: خلي بالك من نفسك.

سكت شوية و بعدين قال: من عيني يا ماما، هخلي بالي من نفسي، بس بقولك بلاش تكلمني انتي ،انا هبقي اكلمك، انا مش معرف حد حقيقتي، عايزهم يفتكروا اني مليش حد و مقطوع من شجرة.

و اتكلم معها شوية و بعدين قفل الخط و بدأ ياكل و هو مستمع بالاكل
/////////
تاني يوم

في طابور الصباح

كان المدير يعرف الطلاب و المدرسين، على حربي مدرس الالعاب

/////(
بعد ما الطابور خلص،
في اوضة المدير

المدير: منور يا استاذ حربي

حربي: بنورك يا حضرت المدير

المدير: أن شاء الله تكون البلد عجبتك و مكان الإقامة قد المقام

حربي: المكان جميل ،شكرا ليك على الاستقبال

قبل ما يرد ،خبط الباب

المدير: اتفضل

دخلت زينب اللي شغالة في المدرسة، مدرسة موسيقي و هي بتزعق: يعني انا شغالة هنا بقالي سنتين و مفيش اي آلة موسيقية و لا اوضة الموسيقى و لا حتى حصة موسيقي، و النهاردة اتفاجا بوجود مدرس العاب ده معناه ايه يا حضرت المدير

المدير: معناه أن الوزارة قالت لازم مدرس الالعاب ،مع أن وجودك و وجوده ملوش لازمة

فتحت عينها بصدمة و قالت: بقي بعد ما اتعلمت سنين طويلة تجي تقولي كده، بكرة تشوفني و انا بعزف في الاوبرا قدم العالم كله.

ضحك و قال: من وقت ما دخلتي الجامعة و انا بسمع منك كده

زينب: حضرتك محبط بشكل كبير، و بعدين تعال هنا، هو كلام الوزارة لسه من دلوقتي، ده من زمان أن شرط وجود مدرس العاب

المدير: و مين قالك أن مكنش فيه بس كان زيك من البلد أما الأستاذ حربي عامل ضجة علشان غريب عن البلد.

زينب بغيظ: كنا ناقصين احنا حد يجي عندنا

كان حربي يبص عليها و مستمع بكلامه و أن عندها شغف و حب للموسيقي،،و أيوة حصل اللي يقوله عليه حب من اول نظرة، شايف قدمه بنت جميلة و كيوت يبقي لازم يحبها.

أبتسم حربي و قال: أنا اسفة لحضرتك، بس ممكن تقبلوني بينكم

مردتش عليه و خرجت من الاوضة و هي نفسها يهتموا بالموسيقى زي باقي المواد..

//////////////
في اوضة المدرسين

دخلت زينب بغضب و قعدت بعصبية، قالت نور: ما براحة يا بنتي

زينب بضيق: اسكتي يا نور علشان انا متضايقة اوي

دخل حربي و قال: صدقني عندك حق، علشان سوء الموسيقى أو الالعاب مفيدين جدا للطالب و ها يخرجوا الطلاب من ضغط باقي المواد ،و يعرف يذكر اي مادة بحماس.

زينب: مين يسمع كلامك ده.

حربي: مش مهم حد يسمع، المهم احنا نحاول لحد ما الكل يصدق كلامنا

زينب: انا اسفة اني اتعصبت و حضرتك موجود و ملكش ذنب

حربي : حصل خير، و نتعرف من الاول،انا حربي مدرس الالعاب

زينب: انا زينب مدرسة الموسيقى
///((((((((
تاني يوم

كانت زينب زهقانة و مش هعرف تعمل ايه، قررت تنزل حوش المدرسة ،لقت حربي يلعب كورة و مشيت ناحيتها و هو شاط الكورة بقوة جت في رأسها،حطت ايديها على الخلطة و قالت: يا نهارك ابيض ،انت مش بتشوف و لا ايه؟

كتم ضحكته و قال: معلش انا اسف ،غصب عني، مخدتش بالي انك موجودة

صرخت و هو بتقول: ليه يعني انا شفافة،انت اللي أعمي و مش بتعرف تلعب كورة

حربي: ما خلص بقي قولت مكنتش شايفك ،ورني كده

صرخت و قالت: ابعد عني

و مشيت من قدمه و هو بيضحك عليها..
///////
في اخر اليوم كان حربي مستني زينب و معه وردة، اول ما خرجت من المدرسة جري عليها و قال: ممكن تقبلي دي منين

زينب: و ده ليه يا اخويا.

حربي بندم: اعتذر عن اللي حصل الصبح

زينب: حصل خير

حربي: طيب خدي الوردة

زينب بتريقة: مش بحب طعم الورد الشكولاتة احسن

مخدتش باله أنها بتهزر ،مشيت من قدمه و هو قرر يجيب لها اغلي شوكولاته موجودة
/////////
تاني يوم في المدرسة

حربي: اتفضلي

زينب:ايه ده

حربي: شكولاته،انتي قولتي امبارح مش بتحبي طعم الورد و بتحبي الشكولاته ،فأنا جبتها ليكي، اتفضلي و انا اسف

ضحكت باستهزاء و قالت: انت صفر ذكاء ،شكلك ماجر عقلك لحد تاني، هو الورد بتاكل علشان يكون له طعم حلو او وحش، انا كنت بهزر

و رغم أنه استوعب و فهم كلامه بس سال و كأنه كل اللي يهمه سعادته و يعرف هي بتحب ايه: يعني انتي دلوقتي تحبي الورد و لا الشكولاته

ابتسمت و قالت: الاتنين

طلع ورد من وراء ضهره و مد أيده بالشكولاته و الورد و قال: اتفضلي و اسف على اللي حصل

خدت الحاجات منه و قالت : صدقني حصل خير..

حربي حب زينب من اول يوم بس هي بعد اللي حصل ده شرارة الحب ولعت في قلبها..
/////////
بعد يومين بدأت الامتحانات و كانت اهالي الولاد وافقين قدم المدرسة، و يقولوا اجابات الامتحان في ميكرفون كبير ،مسمع المدرسة كلها..

دخلت زينب عند المدير و قالت: و بعدين في اللي بيحصل ده؟

المدير: انا طلبت الشرطة تجي تشوف حل.

زينب: منتهى الظلم لأي طالب ذاكر طول السنة..

المدير: الشرطة على وصول.

///(((
أما حربي لف على كل اللجان و قال بتهديد: كل طالب أهله وافقين برة و عملوا كده، يعتبر نفسه سقط،حتي لو هو مذاكر، علشان اهليكم تعرف تعمل كده تاني
كل الطلاب خافوا حتي اللي الشاطرين ليكون اهليهم وراء..

خلصت الامتحان و خرجت الطلاب اللي قالوا لاهليهم على كلام حربي و علشان كده استنوا المدرسين و ناوين يضربهم.

خرجت زينب مع شوية مدرسين و محدش فيهم اتوقع حاجة و فجأة الأهالي بقت تضربه فيهم و محدش فيهم فاهم حاجه

جاه بعد المدرسين علشان يفضوا المشكلة و فعلا الموضوع كانت منتهي الفوضي.

حربي مفكرش غير في زينب اللي مسك أيدها و خلها وراء ضهره و هو ياخد كل الضرب

بعد شوية جت الشرطة و حلت الموضوع

زينب: شكرا يا استاذ حربي

حربي: العفو انا عملت الواجب، متعرفيش كنت خايف عليكي ازاي.

ضحكت زينب بخجل و سالت : و ده ليه بقي

كان علي لسانه يعترف بحبه بس حاجة منعته

و عدت الايام و الاتنين مفيش كلام بينهم نهائي ،و رغم كده مشاعرهم اتحولات لحب..

///////////(
و مع بداية عام دراسي جديد، قرر حربي بداية جديدة مع زينب

في أوضة المدارسين

كانت قاعدة زينب لوحدها,,دخل حربي و سال: مفيش حد هنا

زينب بعصبية: لا كلهم عندهم حصص

حربي: و انتي

زينب بغضب: تحب اطول لساني عليك.

ضحك و قال: حقك عليا، بقولك عايزة اكلمك في حاجة بما أن احنا الاتنين فاضين

زينب: اتفضل على الأقل الوقت يعدي اصلي زهقانة

حربي: كلمني عن عيلتك كده و أنا كمان اكلمك عن نفسك

زينب بحزن: انا بنت البلد دي، وحيدة معنديش اخوات ،أبويا و امي متوفين و تقدر تقول بعتبر كل أهل البلد عائلتي.

حربي: تصدقي انا كمان زيك، وحيد و مقطوع من شجرة، طيب قولي لما احب اطلب ايدك اكلم مين.

فتحت عينها بصدمة و سالت : انت بتقول ايه

ابتسم حربي و قال: بحبك و عايز اتجوزك..

قامت جري خرجت من الاوضة من الكسوف بدون رد، أما هو مشي على اوضة المدير و طلب أيده منه.

المدير: انا متاكد من قرارك ده.

حربي: أيوة

المدير: غريبة انت بقالك هنا شهرين بس لحقت تحبها

حربي: حبيتها من اول نظرة

المدير: لو انت واثق من مشاعرك ،اطلب أيدها من عمدة البلد

حربي: تمام

و فعل طلب حربي أيدها، و هي وافقت
///(///
بعد شهر
كانت كتاب كتابهم على الضيق

وصلوا بيت زينب بما أن حربي ملوش بيت هنا

مسك حربي أيدها و قال: انا اسفة يا زينب اني مقدرتش اعملك الفرح اللي يليق بيكي و لا عندي مكان نتجوز فيه، بس اوعدك لما تسافر القاهرة هقعدك في شقة جميلة على النيل و هيجي اليوم اللي اعملك فرح الكل يتكلم عنه

ابتسمت زينب و قالت: كل ده مش فارق معي، أنت اللي فارق معي و بس و انا مبسوطة اني مراتك.

حربي: مش اكتر مني.

و عدت الايام و الأسابيع و الحياة بينهم هادئة و ديما مع بعض سوء في البيت أو المدرسة.
/////((
بعد ما رجعت زينب و حربي من إجازة الجواز

في المدرسة

كانت قاعدة زينب في اوضة المدرسين مع نور

قالت نور: انا بحسدك يا زينب

زينب: اعوذ بالله ، ليه يا بنتي كده.

نور: علشان تجي المدرسة و مش بتعملي حاجة و تقبضي فلوس على الجاهز .

زينب: قل اعوذ برب الفلق من عينك يا شيخة، بقي انتي نور انتي ضلمة ، و انتي شايفيي مبسوطة اوي، انا زهقانة و مضايقة من كده، و بقول ياريتني دخلت اي حاجه تانية، الظاهر محدش مهتم بالموسيقى

نور حست انها زودتها في الكلام ،فقالت بندم: انا اسفة يا زينب، انا كنت بهزر ،معرفش انك هتزعلي مني

زينب: لا أنا مش زعلانة منك ، انتي صاحبتي و حبيتي

نور: قلبي يا زوزو ، بس انا غلطت علشان كده هجيب لكي شاي على حسابي

ضحكت زينب و قالت: إذا كان فيها شاي انا زعلانة اوي.

خرجت نور علشان تجيب شاي، و رغم أن زينب بتضحك بس هي زعلانة أنها مش قادرة تحقق حلمها، دخل حربي و سال : مالك يا زوزو .

زينب: ايه زوزو دي، احنا في المدرسة، افرض حد سمعك هيقول ايه؟

قعد حربي و قال: هيقولوا انك مراتي سهلة و مش مستهلة

زينب: حد قالك قبل كده أن دمك خفيف اوي.

حربي: كتير اوي، المهم مالك

زينب بحزن: مخنوقة و زهقانة و ضايعة

حربي: التلات مع بعض، ليه كل ده

زينب: كل حلمي اني اجي هنا و اشتغل زي اي مدرس موجود في المدرسة، مش اقضي اليوم كلها و انا مبعملش حاجة خالص، انا عندي احلام كتير و نفسي احققها

حربي: زي ايه؟

زينب: ادرس الموسيقى للطلاب هنا، و نفسي اعرف في الاوبرا

حربي: أن شاء الله يجي يوم و تحققي كل احلامك، و بكرة هتقولي حرب قال، و انا هكون جنبك طول الوقت

زينب: يخليك ليا يا حبيبي

حربي: قلبي يا زوزو

دخلت نور و هي بتقول: احم احم نحن هنا

حربي: طيب ما تمشي هنا.

حطت نور الشاي و قالت: تحت امرك يا فندم

و خرجت نور من الاوضة، و حربي يضحك عليها، و قال: صاحبتك مجنونة

زينب: بس طيبة اوي

حربي: مشفتش حد اطيب منك

زينب: انا فعلا محظوظة بزوجك زي

حربي: انا اللي محظوظ مش انتي..

كان اللي يشوفهم يتأكد أنهم زي اساطير الحب، من كتر التفاهم و الحب اللي بينهم و ظاهر للكل و الاتنين مبسوطين ببعض..

////(/((((((
بس اللي حصل بعدها فترة مش كبيرة بدأت زينب تلاحظ تصرفات غريبة على حربي.

كانت قاعدة مستنية في البيت و هي متعصبة ، اول ما دخل اتفزع و قال: انتي ليه لسه صاحية ؟

زينب: كنت عايزني اكون نائمة صح

دخل و قفل الباب و قال: عادي

زينب: كنت فين

حربي: بتمشي شوية الدنيا حر

زينب بعصبية: الإجابة المعتادة ،ما تقولي ايه اللي بيحصل معك..

حربي قعد ببرود و سال: بطلي كلامك ده ،مفيش حاجة.

قعدت جنبه و قالت بهدوء: انا مش فاهمة أنت مالك، المدارسة بقيت تروحها قليلة، و ديما تأخر برة و انا معرفش بتروح فين أنت حتي ملقكش أصحاب هنا ، يبقي بتروح فين..

حربي: ممكن تبطلي كلام كتير ،انا مصدعة..

و قام دخل الاوضة و سابها هتنفجر من الغضب،و زي اي ست اول احتمال جاه في دماغها أنه خاين.

شافت تلفيونه على الترابيزة،جريت عليه و قبل ما تفتحه ،شده حربي و هو بيقول بعصبية: اللي بيحصل ده عيب، بلاش الطريقة دي يا زينب

زينب: و انت خايف اشوف التلفيون ليه؟

حربي: لا أنا مش بخاف ،انا مبحش حد يتعدي حدوده و دي خصوصية.

و دخل الاوضة للمرة التانية و هي جزت على أسنانها..

و عدت الايام و تصرفات حربي تثير شكوها
///////(///((((((
عودة
فاقت من سرحانها على صوت حربي، و قال: الاكل جاهز

تنهدت بحزن و قالت: جاهز يا حربي، لي كنت عايزة اتكلم معك النهاردة

حربي: معلش مشغول النهاردة ،خليها يوم تاني

زينب: انت مش ملاحظ أن دي بقت الإجابة المعتادة ليك مشغول و خليها وقت تاني، هو أنا بقيت اشوفك أساس، ثم نفسي اعرف مشغول في ايه.

خرج من المطبخ بدون رد ، نفخت بضيق و قالت: يارب يهديك يا حربي ،و ترجع حربي بتاع زمان ،علشان انت بقيت صعب و انا مبقتش قادرة اتحمل اسلوب الحياة ده.

خرجت بالاكل ،و قعدوا على السفرة و الاتنين ساكتين و مفيش حد فيهم بيتكلم.
////////
بعد اسبوع

و الشك ينهش في قلب زينب، و اتاكدت أن حربي عارف واحدة ست عليها،و مفيش حل تاني غير ده.

كان حربي في الحمام ، فتحت زينب تلفيونه و دورت فيه على أمل تعرف هو بيعمل ايه، دورت في الشات و بعدين معرض الصور و شافت المحذوف مؤخر و هي نيتها أنه يخونها مع واحدة ست،و هتلاقي ليهم صور،،، بس للاسف اللي عرفتها اكبر صدمة في حياتها،،،،و هو طلع خاين ربه و دينه قبل اي حاجة و كل أهل البلد، علشان تكتشف السر وراء اللي يحصل في البلد، كلمت نفسها بصدمة: معقول حربي هو المجرم اللي يق\تل الاطفال، صور الضحايا على تلفيونه و الواضح الموضوع اخطر من كده، وصلت ل الدرك ويب.

الصدمة أن زينب لقت على تلفيونه فيديوهات و صور تعذيب للاطفال يعني الموضوع جحيم الدرك ويب..

خرج حربي و اتصدم أن التلفيون في أيدها، شدوا منها و قال: انتي بتعملي ايه؟؟؟

بصت عليه بخوف و قالت: ايه اللي انا شوفته ده، هو أنت مين؟

حربي ببرود: انا حربي جوزك ،و مدرس الالعاب.

صرخت و هي بتقول: كاذب ، انت مجرم

بكل ببرود قال: أيوة، الموضوع في فلوس كتير

قعدت على الأرض و هي مش مستوعبة اي حاجه، و بتقول: قول انك بتهزر، قول يا حربي أنك بتهزر

حربي: لا أنا بتكلم بجد.

قبل ما تتكلم أغمى عليها من الصدمة
////////////
بعد ساعات طويلة
فاقت زينب بس لقت نفسها في مكان غريب

قامت من مكانها و تبص حواليها بصدمة و قالت: هو ايه اللي حصل؟ انا فين؟؟

فتحت باب الاوضة و خرجت برة و لقت مفيش حد، بصت على الشباك كان فيو نهر النيل، حاولت تفتح الشباك بس معرفتش، قالت: شقة على نهر النيل، يعني حربي جبيني هنا، و اللي حصل ده حقيقي، جوزي مجرم.

اتفتح باب الشقة و كان حربي، اللي جريت عليه زينب و قالت: انت مين؟ و جبيتني هنا ازاي، انطق يا مجرم.

قعد على الكنبة ببرود و قال: انا حربي جوزك يا حياتي، مدرس الالعاب،بس في حاجة صغيرة نسيت اقول عليها،انا زعيم عصابة متخصصة في ق\تل الاطفال ، بزود دخلي الموضوع بسيط يعني.

هزت راسها بجنون و قالت: انت مجنون صح، و لا عايز تخلني اتجننن، موضوع ايه اللي بسيط.

بكل ببرود قال : من الاخر يا زينب علشان بكره الكلام الكتير، انا حبيبتك ،و علشان كده بمزاجك أو غصب عنك هتكملي معي.

مسحت دموعها و قالت: انا اتجوزت و حبيت مدرس،كنت فاكر انسان، طلعت مجرم و هبعد عنك باي طريقة.

ضحك و قال ورني يا شاطرة.

و قام دخل الاوضة ،جريت على باب الشقة كان مقفول ، و دورت على طريقة للهروب بس مفيش فايدة.

خرج و هو معه اكل و قال: متحاوليش انك تهربي مني، يلا تعالي كلي.

مردتش عليه و قعدت بعيد عنه،و هو كمل: دي اخر عملية ليا و بعدها هنعيش حياتنا.

زينب بكراهية:بكرهك و هطلق منك غصب عنك

ضحك ببرود من غير رد..
////////////
بعد أيام

حربي كان نايم على الكنبة في الصالة، قربت منه و هي معها س\كينة و ناوية تق\تله،،
رفعت زينب الس\كينه و ضربت حربي في كتفه، بس الخبطة كانت خفيفة، مسك أيدها و خد الس\كينة رمها و قال: انتي مجنونة، عايزة تموتني

حاولت تبعد عنه بس مسك أيدها بقوة ، صرخت و هي بتقول : أيوة هموتك زي ما ق\تلت ناس كتير، و كمان خطفتني و جبتني معك هنا، و انا بكرهك ،مش عايزك،عايزة امشي من هنا..

جز على أسنانه بغيظ و حاول يهدأ و هو بيقول: انا مش عايز اذيكي،بطلي تعملي كده، انا بحبك

صرخت و هي بتقول: حب، انت عارف يعني ايه حب، اللي زيك لازم يتعدم علشان نخلص منه و من شره ، ربنا ينتقم منك، أنا بكرهك ،بكرهك

وقعها على الكنبة و قال بتحذير: للمرة المليون أنا ماسك اعصابي عنك بالعافية،انا لسه بحبك

زينب: أنت مجرم ازي تحب

ضحك ببرود و قال: عادي حتي المجرم عنده قلب يا حلوة ،حتي انتي لسه بتحبني

زينب باشمزاء: انا كنت بحبك، بس خالص رح الحب،و اصل عمري ما احب واحد زيك.

ضحك ببرود و قال: مش مهم تحبني، المهم أنا بحبك ، و لو عملتي اي حركات مجنونة انتي اللي هتدفعي التمن.

و خرج من الشقة ،بعد ما قفل عليها، و هي قامت زي العادة تدور على مكان تهرب منه ،قعدت على الأرض و قالت: انا غبية علشان كل ما يخرج حربى ادور على مكان اهرب منه، و ملقيش مكان،و برضو بحاول تاني ،انا عايشة في سجن و حياتي انتهت…

و ملقتش حاجة تعملها غير العياط..

أما حربي خرج من البيت و هو متعصب و مش عارف يعمل ايه مع زينب

قابل البواب اللي قاله: خلي بالك يا عمى اسماعيل ،ممنوع حد يطلع العمارة نهائي

اسماعيل البواب: حاضر يا باشا.

حربي صاحب العمارة و محدش ساكن فيها غير شقته اللي فيها زينب،و الشقة التانية عايشة فيها أمه و هو مانعها تنزل عند زينب…

//////////
بعد شوية في مكان مجهور

كان واقف حربي مع مجموعة شباب

صرخ حربي و هو بيقول: انا لو مشغل عندي شوية عيال هيبقوا اشطر منكم، اللي حصل ده حصل ازاي.

اتكلم واحد منهم بخوف( عمر): احنا اسفين يا باشا

حربي بغضب: و انا اعمل ايه باسفك..

احمد: انا كنت
مراقبهم كويس، مش عارف هربوا مني ازاي

حربي بسخرية: علشان هما اذكياء أما أنت و الباقي اغبياء.

و كمل بتهديد و قال:معاكم اسبوع واحد و عايز الموضوع يخلص، انا زهقت التاخير ده مش في صالحنا..

محمود: تمام يا باشا.

و خرج حربي من المكان.
////////////
وصل حربي العمارة و هو معه حاجات كتير، دخل على شقة امه بالمفتاح و كانت قاعدة على سجادة الصلاة ،قعد جنبها و باس ايديها و قال: تقبل اللي يا ماما

صالحة: منا و منكم يا حبيبي،عامل ايه؟

حربي: الحمد لله

و كمل بصوت عالي: نجلاء

خرجت نجلاء الشغالة و مقيمة مع صالحة طول الوقت ،و قالت: نعم يا فندم

حربي: دخلي الحاجات دي المطبخ

نجلاء: حاضر

و دخلت المطبخ

تنهدت صالحة و قالت: بسمع صراخ مراتك طول الوقت ،ينفع كده.

حربي: معلش يا ماما، شوية بس و الدنيا تهدأ

صالحة: أنت بتحبها اوي كده

حربي بحب: اكتر من نفسي..

و قعد شوية مع أمه و بعدين طلع الشقة.
/////(((
عند زينب، كانت نائمة على الأرض بتعب بعد ما اتاكدت أن مفيش فرصة للهروب من هنا.

اول ما سمعت باب الشقة اتفتح، خافت من حربي،
أسنانها بتخبط في بعض ،الرعشة تنهش فيها ، دخل حربي و لقاها كده،جري عليها ،قعد جنبها و سال بخوف: مالك يا زينب، انتي عاملة كده.

بصت عليه باستغراب و قالت: انت عبيط، هيكون مالي و انا متجوزة مجرم زيك، ربنا ينتقم منك ، و تدوق اللي عملته في الناس

قام من مكانه و قال بجمود: لو خلصتي المحاضرة، ادخلي اعملي أكل

صرخت بعصبية: مش هعمل حاجه ، أن شاء الله عنك ما طفحت،عارف انا عايزة اعمل ايه، احطلك سم و اخلص منك.

من غير ما يرد عليها دخل المطبخ و عمل الاكل، و خرج حط الاكل على السفرة و قال: تعالي علشان تأكلي

مردتش عليه و هو علشان عارف هي بتخاف تعمل اي حاجه حرام ،فقال: انتي عارفة أن الامتناع عن الاكل ، ممكن يخليكي تموتي و كده حرام عليكي يا زوزو

بصت عليه بغضب و قامت من على الارض ،خدت طبق من الاكل و قعدت على الأرض تاني

ضحك بسخرية و قال: طيب ما تأكلي معي ،حتي انا غلبان

زينب: مش عايز أقعد اكل مع واحد زيك..

حربي بحزن : انا بحبك يا زينب و كلامك ده يوجع قلبي..

ردت عليه بعدم فهم: بتحبني ما هو واضح اوي ،أنت مش بتحبني..

صرخ حربي بصوت عالي: شغلانة بقا كل شوية تقولي ،اني مش بحبك ،ازاي قادرة تقولي كده ،انا محبتش غيرك..

خافت من صوته العالي

قام من مكانه و قرب عليها،حط ايه على كتفها و هو بيقول: انا اسف على كل حاجه.

قالت زينب بعصبية : شايل ايدك عني ،ربنا ينتقم منك ، و تولع في نا،ر جهنم،بسبب قت\لك للناس.

كل كلمة قالتها حرقت قلبه، دخل الحمام و لاول مرة نسي التلفيون على السفرة ، قامت بفرحة و حست أن اخيرا هتخلص من حربي، فتحت التلفيون و الغريبة أنه مغيرش رمز التلفيون، و طلبت رقم الشرطة و قالت بصوت واطي: الو الشرطة الحقوني انا مخطوفة جوزي خطفني و هو مجرم و قاتل..

و فجأة الخط اتقطع من غير رد، و صوت ضحك حربي جاه من وراءها و قال: انتي مش هتهربي من هنا مهما عملتي..

وقع منها التلفيون على الأرض، و انهارت و حست أن مفيش اي طريقة للهروب، و دخلت الاوضة بصمت تام..

و هو يبص عليه بحزن، و تلفيون رن ، و اتكلم رئيسه بعصبية: مش تخلي بالك من مراتك ، انا قولتلك بلاش جواز انت رايح علشان الشغل، مش علشان الحب..

حربي: اعمل ايه ؟حبيتها يا باشا.

رد رئيسه بغضب: ده اللي بناخده من الحب، ياريت تسيطر عليها بدل ما كل حاجه تبوظ

حربي: تمام يا فندم…

قفل الخط و بص على اوضتها و قال: انا عارف أنك مظلومة معايا و ملكيش ذنب في كل ده، طلبي ليكي اصبري عليا اخلص من العملية و نرجع نعيش زي زمان.

و خرج من الشقة و المرة دي رح على مديرة أمن القاهرة…