بئر الحرمان بقلم منال كريم

طه بيضرب راقية بنته بكل غل و كأنها مش بنته، و هي ضعيفة قدمه، و حتي سعاد مش قادرة تبعده عنها، لحد ما راقية غابت عن الوعي ،

صرخت سعاد: حرام عليك يا شيخ البنت قطعت النفس.

و لا فرق معه،اللي جريت هي سعاد جابت مياة و قعدت جنبها و رشت عليها، و قالت: فوقي يا راقية.

بصت سعاد على طه و صرخت: حرام عليك يا شيخ، ذنبها ايه الغلبانة دي.

قام طه دخل الاوضة بعصبية،قبل ما يطمن على بنته..

رشت مياة تاني و هي بتعيط: فوقي يا حبيبتي ،حقك عليا أنا

فاقت راقية، و جت تقوم من على الارض مقدرتش، سنتدها سعاد لحد الاوضة، نامت على السرير بتعب و هي بتعيط، و سعاد تطبطب عليها بحنان و قالت بدموع :

_معلش يا راقية حقك عليا أنا يا حبيبتي هو بس تلاقي ابوكي زهقان شويه، بس انتي غلطتي يا ضنايا ،ما كانش لازم تعملي كده وتهربي من البيت مهما كان السبب هو ابوكي برضو.

قالت بدموع: هو مش ابوي و لا هي أمي، هما الاتنين بيكرهوا بعض فطبيعي يكره بنتهم اللي تربط بينهم،أنا متأكدة أنهم دلوقتي يقولوا أني اكبر غلطة في حياتهم هما الاتنين، و نفسهم أموت علشان يخلصوا من بعض…

عيطت سامية عليها و مبقتش عارفة تقول ايه..
////////////////
تاني يوم طلبت ثريا من طه يبعت راقية لها و هو وافق..

كانت راقية تخبط على الباب ،أول ما فتحت ثريا رمت نفسها في حضنها وهي تعيط و قالت:

_شفتي يا ماما بابا عمل في ايه، كل يوم ضرب و إهانة وذل،واتفاجئ امبارح بالصدفه انك اتجوزتي، من غير ما أعرف.

زقتها امها بزهق وقالت:: تعالي ندخل جوه ,و عايزاني استأذن منك قبل ما اتجوز يا ست راقية.

دخلت ثريا ورقيه وراها وهي بتقول: مش قصدي يا ماما أنا قصدي كنت عرفت، هو أنتي و بابا ليه مش بتحبوني.

قعدت امها وقالت :بطلي كلام فارغ يا رقيه جعانه اجيب لك تاكلي.

رغم أن رقية جعانه ، قالت: شكرا مش عايزه أكل.

في الوقت ده رجع صلاح جوز ثريا ، وهو شايل لعب كتير لما عرف أن بنت مراته هتجي زيارة، قرب منها وهو بيضحك و قال :
_ القمر اللي منور عندنا ,ازيك يا كتكوته، شوفتي أنا جبت ليكي ايه.

ضحكت رقيه بسعادة ومدت أيدها تاخد الهدايا و سألت: كل دول ليا

صلاح: ايوه طبعا

راقية: شكرا لحضرتك

صلاح: العفو