قلب مكسور بقلم منال كريم
كانت قاعدة على السرير ،تبص على جوزها اللي وقف يظبط نفسه قدم المرايا،اتكلم زياد و هي يبتسم: أنتي مش هتنزلي معي يا نسمة..
ردت نسمة باستغراب: أنت طبيعي عايزني أنزل معك و أشوفك و انت بتجوز واحد تانية.
مشي لحد عندها و قعد جنبها و قال: هنعيده تاني، مش أنا و انتي عارفين ان مضطر على الجوزة دي.
ردت نسمة بحزن: مش بيان عليك انك مغصوب على الجوزة.
زياد: ايه معني كلامك ده
نسمة: المعني واضح، هو مفيش سبب للجواز ، يبقي ليه عايز تجوز عليا.
زياد: ازاي بتقولي كده ،السبب هما ولاد أخويا
نسمة: ولاد اخوك اللي ١٥ و ١٦ سنة يعني رجالة ما شاء الله عليهم و مرات اخوك عدت ٣٥ سنة يعني مش عيلة صغيرة أنت خايف عليها ، الغريب أن ابوك و امك ضد قرارك ده، و رايهم من رأيه ،أنا خايفة يا زياد تكون متجوز هبة لسبب تاني
زياد: عندك حق في سبب تاني و هو بنت اخويا اللي عندها ٧ سنين لازم تربي في جو طبيعي
نسمة: بلاش تقول مبررات ملهاش لازمة ،مبروك يا زياد.
و قامت نسمة من مكانها و دخلت اوضة ولادها ( يوسف ٧ سنين و يونس ٦ سنين)
أما زياد نزل الدور الارضي في شقة ابوه علشان يكتب كتابه على هبة مرات أخوه الكبير اللي مات من سنة.
//////////
في شقة صالح ابو زياد
كان موجود صالح و مراته نجوي و زياد و هبة و اتنين شهود.
نجوي: أنا مش راضية على اللي بيحصل ده
صالح: و لا انا راضي بظلم بنت اخويا اليتيمة ،بس ابنك دماغه ناشفة
نجوي: انا حاسة أن زياد و هبه ليهم غرض في الجوزة دي
صالح: ده واضح للكل.
تم كتب الكتاب، و مشي الشهود
زياد بابتسامه: مبروك يا هبه
هبه بكسوف: الله يبارك فيك
بص زياد على أبوه و قال: طيب نستاذن احنا
صالح: على فين
زياد: محتاج اتكلم مع هبة بعيد عن البيت
هبه كان بيان عليها الموافقة و كمان قالت: خلي العيال عندكم على ما ارجع يا ماما
نجوي بغيظ: حاضر
خرج زياد مع هبه.
//////(//
عند نسمة ،سمعت صوت عربية زياد،جريت على البلكونة و شافت زياد خارج مع هبه.
دخلت اوضتها و عيطت بانهيار.
//////////////
عدي وقت و زياد و هبة لسه برة
و نسمة طول الليل صاحية
صحت ولادها و قالت: يلا و ولاد علشان ننزل و احضر السحور الفجر قرب.
/////////
خدت ولادها و نزلت ،حضرت السحور و صحت حماتها و حماها.
على السفرة
صالح: يونس ادخل صحي ولاد عمك علشان السحور
يونس: حاضر يا جدو.
و قام يونس يصحيهم.
نسمة: هما نايمين هنا
صالح: أيوة
نجوي: كل ده و لسه زياد و هبة بره
صالح: كفاية كلام ،خلينا ناكل الفجر قرب.
تظاهرت نسمة أنها بتاكل و كلمت نفسها بحزن: هما فين كل الوقت ده، معقول قضوا الليلة في اوتيل، أو كل ده ماشين في الشوراع، انا قولتها شكلوا مبسوط و مش زعلان أو مغصوب و هي كمان مش فارق معها حاجة.
نجوي: نسمة كلي يا حبيبتي
نسمة: الحمد لله انا شبعت
صالح: انتي ماكلتيش حاجة
قامت من على السفرة و قالت: الحمد لله هعمل الشاي.
بصت نجوي عليها بحزن و قالت: منه لله اللي كان السبب في حزنك يا بنتي
اتكلم مازن ١٦ سنة بغضب: قصدك مين يا تيتة
نجوي: انت اتهبلت ياض بتتكلم معايا كده ازاي
مازن: حضرتك تدعي على ماما
نجوي: و انا جيبت سيرتة امك
صالح : و خليها اتكلم على المحروسة امك ،تكلم ستك كده، الصراحة التربية بتاعت امك واضحة اوي
خرجت نسمة بالشاي، و رغم أنها كان سمع صوتهم بس مستالتش خدت ولادها و طلعت شقتها.
و الليلة كانت كلها ليلة حزينة عليها
///////////////
تاني يوم
نزلت نسمة شقة حماتها زي العادة توضب الشقة و تحضر الاكل
نسمة: نعمل فطار ايه النهاردة يا ماما
نجوي: مش عارفة ،الواحد زهق كل يوم في الحيرة دي
ضحكت نسمة و قالت: عندك حق ، المتعب هو التفكير نعمل اكل ايه، بقولك اطلع فرختين و اعمل جنبهم شوية رز و خالص
نجوي: ماشي
قامت نسمة دخلت المطبخ و نجوي كلمت نفسها: ايه يا زياد من امبارح محدش عارف عنك خبر، روحت فينا انت و الشموللة.
أما نسمة اللي كانت بتعمل الاكل بدموعها قالت: انا بحاول ابيان قدم الكل اني جامدة و قوية و الموضوع مش فارق معي ،بس مش قادرة اتحمل، ده مش شكل حد مضطر على الجواز ، و اللي وجع قلبي قضوا اول ليلة أكيد في اوتيل معملش كده معي.
/////////(/
عدي اليوم و بعد صلاة التراويح
كان الكل متجمع في شقة صالح، في الوقت ده جاه زياد مع هبه و السعادة بيانه على وشهم
زياد: السلام عليكم ورحمه الله وبركاته
رد الكل عليه، و نسمة عينها على أيد زياد اللي ماسكة أيد هبة.
قعدوا جنب بعض، و سال صالح: كنتوا فين من امبارح
زياد: زي ما قولتك كنا عايزين نتكلم بعيد عن البيت، و لما الوقت اتاخر قولنا نبات في اوتيل و حجزنا سويت سحور و فطار.
هبة: الاكل عندهم كان حلو اوي
محدش رد عليهم الكل ساكت،حاولت نسمة تبيان أنها عادي و تتجاهل زياد، خدت طبق الحلويات و أكلت ولادها الاتنين، و صالح اندمج معها
صالح: يا بنتي قولتك خليهم ياكلوا لوحدهم هما كبروا
نسمة: و حتي لما يبقوا رجالة ب شنابت يفضلوا في نظري عيال صغيرة، مش كده يا ولاد
ضحك يونس و قال: صح يا نسمة
فتحت عينها بصدمة و قالت : نسمة اخس عليك
يوسف: خالص بلاش علشان تزعلي يونس بيقولك يا نسمة، انا بقي هقولك يا نونو
نسمة:عمي شوف العيال دي بيقولوا ايه.
صالح: أنا وخد فريق العيال
نجوي: و انا كمان
قالت نسمة بطريقة طفولية:خاينة عظمة
هبة كانت قاعدة متغاظة ،كانت فاهمة انها تاخد اللقطة ،بس اللي حصل أن نسمة وكلة الجو.
قامت هبة من مكانها، سال زياد: على فين؟
هبه: طالعة شقتي
قام زياد و قال: يلا هاجي معاكي.
طلع زياد و هبة و نسمة قلبها مكسورة
////////////
عدت الايام و التفاهم اللي بين زياد و هبه واضح جدا للكل،و زياد كل اللي شاغل باله هي هبة و ازاي يسعدها و نسي نسمة نهائي.
///////////////////
بعد يومين
كانت نسمة نازلة من شقتها، وافقت مكانها بصدمة لما لقت هبة و زياد وافقين قدم الباب ،و سمعت كلامهم
هبة : زيزو اوعي تتأخر عليا.
زياد: هو أنا اقدر، مسافة السكة اشتري شوية حلويات و فاكهة و ارجع على طول
هبة: اوعي تنسي الطلبات اللي طلباتها منك
زياد: أنا انسي روحي و لا انساك يا جميل
ابتسمت هبه و قال: ربنا يخليك ليا يا حبيبي
زياد بفرحة: انا بجد حبيبك يا هبه
هبه: أيوة طبعا
زياد: عايز اقولك سر
هبه: هتقول سر على السلم
زياد: ما هو مفيش غيري انا و انتي
هبة : طيب قول ايه السر
زياد: السر اني بحبك من قبل ما تكوني مرات اخويا
هبة بصدمة: انت بتقول ايه
زياد بحزن: بقول الحقيقة أنا بحبك يا هبة من و انتي عيلة صغيرة ، انتي ناسية أننا كنا مع بعض في المدرسة و انا اكبر منك بسنة
هبة: أيوة فاكرة
زياد: من و احنا عيال صغيرة و انا بحبك، و كنت بحلم باليوم اللي تكوني ليا، و كانت الصدمة لما سافرت و رجعت لقيتك خطيبة اخويا، كنت بتعذب و انا شايفك مرات اخويا
هبة بصدمة: أنا مش قادرة اصدق الكلام ده
زياد: لا صدقي كل كلمة هي حقيقة ، و علشان اقدر انسي حبك، مكنش فيا قدمي غير بنت عمي اللي معي في نفس البيت صحيح اصغر مني بكتير و كانت لسه بنت ١٨ سنة بس قولت يمكن تقدر تسيني حبك
هبه بدلع: و نسيت
زياد: لو نسيت مكنتش فكرت اتجوزك بعد ما اخويا مات، طب اقول حاجه بتزعلني من نفسي، أنا ساعات بفرح ان اخويا مات علشان تكوني ليا اخيرا، انا حسيت اني عايش معاكي انتي بس، غير كده كنت ميت.
كانت نسمة بتسمع كل حرف من زياد و هي مصدومة و مش قادرة تصدق، و ياريت واقفت على كده، هبة كملت عليها لما قالت: زياد لو قولتك أن حالي كان زي حالك
بص عليها باستغراب و سال: قصدك ايه
هبه: أنا كمان كنت بحب و من أنا عيلة صغيرة
دخلت نسمة شقتها مش هتقدر تسمع اي حاجه تاني كفاية لحد كده، اللي سمعتها يدل أنها اتخدعت سنين .
//////////
في شقة نسمة
رمت نفسها على الأرض و قعدت تعيط على عمرها اللي ضاع و تفكر هتعمل بعد اللي سمعته.
//////////
في شقة صالح
صالح: ايه يا استاذ زياد نسيت ابوك
زياد: ليه بتقول كده
صالح: مبقاش حد يشوف وشك من سعت العروسة الجديدة.
زياد: انا موجودة اهو يا بابا
صالح: لما انت موجود قولي اخر مرة طلعت شقتك شوفت نسمة و ودلاد كانت امت، أو اتكلمت مع حد فيهم، و شوفت هما عاملين ايه، محتاجين حاجة أو لا.
زياد بعند: احنا في نفسي البيت و اكيد لو في حاجة كانت نسمة هتقولوا
صالح: بعد كلمتك دي انا كلامي خالص.
زياد: ليه
مردش صالح علشان هو اتاكد أن زياد مش عارف أن نسمة عمرها ما بتطلب حاجة من اي حد.
/////////////
نسمة نائمة على السرير و بتعيط، حست بايد على كتفها، قامت انتفضت من مكانها و كان زياد، سالت: في ايه؟
زياد: مفيش حاجه انتي كويسة
مسحت عينها و قالت: أيوة
قاعد قصادها و قال: كنتي بتعيطي
هزت راسها بالرفض و قالت: لا مفيش حاجه
زياد: مال عينك
قالت من مكانها و هي بتقول : بتوجعني شوية و عندي صداع.
زياد: الف سلامة، طيب أنا خارج مش عايزة حاجة من برة
نسمة: لا.
و خرجت نسمة من الاوضة على اوضة ولادها، كانوا نايمين نامت معهم لحد الصبح من غير ما تحس
و هو خرج من الشقة و مش مستغربة حالة نسمة علشان تفكيره في هبة.
//////////
قلقت نسمة على صوت يونس: ماما يا ماما
فتحت عينها و قالت: نعم يا حبيبي
يونس: مش هتقومي علشان السحور
نسمة: هي الساعة كام
يونس : مش عارف
نسمة: هات التلفيون كده
نسمة بصدمة: يا نهار ابيض الساعة سبعة، انا رحت عليا نومه ازاي
يونس: لو كده يبقي اقضي اليوم نوم بقي علشان مش عايز احس بالجوع.
ضحكت نسمة و قالت: كده كده في اكل من امبارح ،خدني في حضك يا حبيبي و يلا ننام سوا.
//////////
بعد العصر في شقة صالح
نسمة : معلش يا مرات عمي رحت عليا نومه و مقومتش على السحور و كمان طولت في النوم علشان عارفة أن الاكل على التسخين و البيت و المطبخ متروقين من امبارح
نجوي: حصل خير يا نسمة انتي بتتعبي في شغل البيت يا حبيبتي.
نسمة: كنت عايزة اتكلم معاكي في حاجة
نجوي: قولي يا حبيبتي
نسمة: انا من يوم ما أتجوزت و انا كنت بعمل كل شغل البيت لوحدي و ده كنت بعمله من قبل الجواز علشان أنا كنت عايشة هنا قبل الجواز و حسيت أن مفيش حاجه متغيرة و عمري ما طلبت من هبه تعمل حاجه و كنت اقول انها زي اختي الكبيرة ، بس الوضع دلوقتي اتغير
نجوي: عايزة تقسمي الشغل بينكم
نسمة: ايوة علشان مش عدل أنها تنزل تاكل و تشرب على الجاهز، بلاش تزعلي مني
نجوي: انا و عمك رافضين اللي حصل و انتي عارفة انك في كفة و الدنيا كلها في كفة
ابتسمت نسمة و قالت: ربنا يبارك فيكي ،بسببك انتي و عمي عمري ما حسيت اني يتيمة.
حضنتها نجوي و قالت : انتي بنتي.
///////////
اتجمع الكل على السفرة مستنين اذان المغرب
نجوي: هي أمك هتنزل بعد المغرب يا مازن
مازن: هي قالت إنها هتنزل مع عمي
صالح: أنا كان علينا مش عايزين نشوف حد فيهم
نجوي: و ابقي أطلع عارف امك بنقول عليها ايه.
دخلت هبه و قالت: بتقولي ايه يا حماتي
نجوي : بقول حسيت بضيق نفس لما شوفتك
زياد: ما بلاش الكلام ده يا ماما
قعدوا على السفرة ،بصت هبه و قالت:هو ده الفطار
نجوي: اه ماله الفطار
هبه: ده فطار امبارح و انا مش باكل اكل بيات
ادم ( ١٥ سنة) انا قولت ل تيتة كده أننا مش بنحب الاكل البايت، قالت هو ده الموجود
هبه: ليه كده يا نسمة ، يعني مفيش سحور امبارح و كمان معرفتيش تعملي فطار كويس
نسمة: انتي بتوجهي ليا كلام على اي اساس
زياد: على اساس انك المسؤولة عن شغل البيت
ضحكت نسمة باستهزاء و قالت : كان فيه و خلص
زياد: يعني ايه
قبل ما نسمة ترد ،قالت نجوي: يعني من النهاردة الشغل بتقسم بين نسمة و هبه
هبه بغرور: انا عمري ما عملت حاجه في البيت و مش هعمل
زعقت نسمة: انا كنت بعمل زمان و اقول معلش اصل أنا الصغيرة و هي الكبيرة ،بس خلاص خلصت و من النهاردة انتي يوم و انا يوم في شغل البيت
قامت هبه من مكانه بعصبية و قالت: قصدك ايه بالكبيرة
نسمة ببرود: زي ما سمعتي قصدي أنك كبيرة و انا صغيرة
قامت هبة بعصبية و قالت: ما تلمي نفسك يا نسمة
ضحكت نسمة و قالت: انتي هبلة ،انا عملت حاجه انا قاعدة في حالي و انتي اللي اتكلمتي معي، بس متزعليش الأعراض دي عادية
كلام نسمة و هدوئها جنن هبة اكتر، صرخت و هي بتسال: قصدك ايه
نسمة بنفس البرود: قصدي السن له أحكامه
بصت على زياد و قالت : عجبك كلامك مراتك ليا
زياد: لا طبعا، نسمة اعتذري
صالح: انت واعي لكلامك يا سبع البرومة
زياد: أيوة واعي و نسمة غلطت في هبة
نجوي: يا خيبتي فيك ، انت أعمي و اطرش، نسمة قاعدة ساكتة و كتر خيرها عملت الفطار و مراتك نزلت على الجاهز و بدل ما تقول شكرا، مش عجبها الاكل
هبة : علشان بحب الاكل الطازج
نجوي: يبقي تعملي لنفسك يا حلوة.
نزلت دموع هبه بالكذب و قالت: شايف يا زياد كلهم عليا
و طبعا زياد ميقدرش على زعل هبه، قال بتهديد: نسمة اعتذري ل هبه
نسمة: مش هيحصل
شدها من درعها بقوة و صرخ: قولتك اعتذاري
زعق صالح: نزل ايدك من عليها
و قبل ما صالح يقوم كان زياد ضرب نسمة بالقلم
مسك صالح أيد نسمة و خلها وراء ضهره و من غير تفكير رد نفس القلم ل زياد
و نجوي قالت بكل كراهية: تنقطع ايدك يا أبن بطني.
صالح بغضب: لو فاكر اني اسمحلك تدوس على طرف نسمة يبقي بتحلم ، نسمة عندي في كفة و الباقي في كفة،فاهم يا زياد
زياد بغضب: انا اللي ابنك مش هي
صالح: لا هي اللي بنتي و انت انا معرفكش.
هبة: امرك عجيب يا حمايا تضرب ابنك علشان بنت اخوك
نجوي بعصبية: أخرسي انتي يا خرابة البيوت.
زياد: أنا مش فاهم ايه اللي حصل بين يوم و ليلة كنتوا بتعاملوا هبة بطريقة كويسة قبل كده ايه اللي حصل دلوقتي ،كل ده علشان بقت مراتي
صالح: لا و أنت الصادق كل ده علشان أنت خايب، انت عمرك شوفت هبة تناول حد فينا كوبية مياة، لا هي كانت طول اليوم في شقتها و تنزل على الاكل ، و تتطلع جري على شقتها، أنت فاكر اخوك كان عايش مبسوط معها ، ده الله يرحمه كان يشكي منها مر الشكوى، و كان مستحمل علشان العيال.
بص صالح على نسمة اللي كانت واقفة بكل قوة و مش بيان عليها الزعل، و كمان كانت واقفة بتضحك ضحكة قوية
صالح: حقك عليا يا بنتي
نسمة: مفيش حاجة يا عمي بس انا مش عايزك تزعل مني في اللي جاي.
قبل ما صالح يرد، زعق زياد: ناوية على ايه يا نسمة، أعلى ما خيلك اركبيه.
مردتش عليها و رجعت قعدت على السفرة و قالت: اقعد يا عمي خلينا ناكل لقمة ،احنا صائمين طول النهار
قعد صالح و الكل تجاهل زياد و هبة اللي هيموتوا من الغيظ.
///////////////
بعد شوية
طلعت نسمة شقتها وقعدت تفكر ،انها مش لازم ترد كرامتها و مينفعش تطلع خسرانه بعد كل ده…
و كلمت نفسها: اول حاجه ارفع قضية طلاق لضرر، و كمان تمكين الشقة، و النفقة يا زيزو و كفاية لحد كده على ما افكر اعمل ايه تاني ،انا وراءك و الزمن طويل، هخليك تقضي ايامك في المحاكم علشان تقولي اعلي ما في خيلك اركبيه، و ماله يا حبيبي تعال اعملك ركوبك الخيل على أصوله.
////////////
تاني يوم الصبح
خرجت نسمة مع صالح عند مكتب محامي
في مكتب المحامي
المحامي: اقدر اساعدكم ازاي
صالح: عايزين نرفع قضية طلاق لبنتي
المحامي: ايه أسبابك
نسمة: جوزي اتجوز عليا و أنا مش موافقة على كده، و نفسيتي اتاثرت بسب الموضوع ده.
المحامي: تمام يبقي نرفع طلاق للضرر
نسمة : انا قولت كده.
صالح: قولي نقدر نعمل ايه تاني، علشان الغلبانة دي تاخد حقها و حق عيالها.
المحامي: طالما في اولاد يبقي نطالب بسكن و كمان نفق و هنطالب بكل حقوقك
صالح: انا عايز نتقم منه على اللي عملوا فيه.
المحامي: شكله مزعل بنتك اوي
صالح: صح ، و انا اللي يزعل ببنتي يزعلني
المحامي: متقلقش كل حقوق بنتك هتاخدها و بالقانون.
//////////////
في التاكسي
نسمة: عمي هو أنت مش زعلان مني
صالح: لو زعلان منك، مكنتش جيت معاكي
نسمة: انا مستغربة أن حضرتك جيت معي عند المحامي و موافق اني ارفع قضايا على زياد
صالح: هو غلط و لازم يتحاسب و بعد ما يتحاسب عايزة تسامحي أو لا براحتك.
مردتش على عمهت بس قالت في سرها: مش اقدر هسامح يا عمي، انا اكتشفت اني كنت عايشة معه في وهم كبير، خدعني أنه بيحبني و طلع متجوزني علشان ينسي حب هبه،انا علشان خايفة عليك أنت و مرات عمي مش هقدر اقولكم أن زياد فرحان في موت اخوه، ربنا يسامحك يا زياد.
//////////////
عدى كام يوم و صل لزياد في شغله محضر القضية
رجع على البيت و طلع بسرعة على شقة نسمة، جاه يفتح بالمفتاح مفتحش ،خبط على الباب بقوة و هو يقول: افتحي يا نسمة، افتحي بدل ما أكسر الباب على دماغك
فتحت نسمة الباب بكل هدوء، و سالت: في ايه؟ وطي صوتك العيال نايمة
جز على أسنانه بغضب و قال: ايه البرود اللى انتي فيا ده.
نسمة: مالك متعصب كده ليه.
زياد: انتي رفعة قضية طلاق
نسمة: حصل
زياد: بطلي برود
ضحكت نسمة و قالت بصوت عالي: أنت عايز ايه يا زياد
اتكلم زياد بهدوء: بعد السنين ده كلها هان عليكي الحب
شاورت بايدها و قالت: لا استني لما اعيط شوية، انت عبيط يا زوجي مؤقتا
كان زياد حاسس انه هينفجر من الغضب بس حاول يتكلم بهدوء: ايه زوجي مؤقتا دي
نسمة: على اعتبار أن أن شاء الله ننطلق قريب
زياد بعند: مش هطلق يا نسمة و أعلى ما في خيلك اركبيه
ضحكت نسمة و قالت: تاني يعني يا زيزو، طيب افتكر اني قولت بلاش.
زياد: اللي عندي قولته طلاق مش هطلق.
نسمة: مش بمزاجك يا زيرو
زياد::طيب ليه نسمة عايزة العدل عني.
نسمة : لا ده بجد انت عبيط ، أنت مش عارف انت عملت فيا ايه
زياد: عملت ايه يا نسمة، اتجوزت هبة و انتي كنتي موافقة
نسمة: أنت ضحكت عليا يا زياد، قولت انك مضطر ، بس طلع الموضوع قديم
اتوتر زياد و سال: قصدك ايه
نسمة: قصدي كل سنة و انت طيب يا زياد العيد بكرة، الصراحة كان نفسي العيد يجي و انا مطلقة بس يلا مش مشكلة أتحمل شوية كمان.
و ضحكت بصوت عالي و هي شايفة الخوف ظاهر عليه ، أنها تكون عرفت أنه بيحب هبة من زمن
//////////
تاني يوم
كان أوا ايام عيد الفطر
الشوراع مليان بالونات و الوان مبهجة جميلة.
و الناس متجمعين في صفوف لقضاء صلاة العيد
/////////
و بعد الصلاة
قعد زياد مع صالح و نجوي
زياد: يعني ينفع تسمعوا كلام نسمة على الجنان ده
صالح: ده مش جنان ،ده حقها.
نجوي: مش انت روحت اتجوزت عليها، أشرب بقي
زياد: عمري ما حسيت اني ابنكم ، كأنها هي اللي بنتكم و انا لا
صالح: من يوم موت اخويا و مراته و انا و امك خدنا عهد على نفسنا أن نسمة بنتنا، و الشهادة لله كانت و نعمة البنت
نجوي: عندك حق يا حاج صالح، ربنا يبارك فيها و يحفظها ل ولادها.
زياد: طيب أنا ندمت و مش عايز أطلق خليكم جنبي
صالح: انا عن نفسي جنب نسمة
نجوي : و انا كمان كل اللي يهمني سعادة نسمة و العيال و اي كان اختيارها أنا معها
نزلت هبة في الوقت ده، قالت: كل سنة و انتم طيبين يا جماعة.
نجوي: و انتي طيبة يا ام مازن.
هبه: ايه يا زياد مش هنخرج نتفسح
زياد: ماشي، بس استني اطلع اعرف نسمة.
هبة بغيرة: هي نسمة هتيجي معانا
زياد: ايوة، هي مراتي زيك و علشان أفسح الولاد.
طلع زياد شقة نسمة
////
في شقة نسمة
زياد: اجهزي انتي و العيال هنخرج نتفسح
نسمة: لا معلش مش قادرة
زياد: علشان خاطر العيال يا نسمة
نسمة: قولت مش قادرة ايه مش بتفهم
خرج يوسف و يونس من اوضتهم
قال زياد: تعالوا شوفوا ماما مش راضية نخرج نتفسح
يونس: ليه يا ماما
نسمة: معلش يا ولاد مش قادرة
يوسف: لو انتي مش قادرة خالص
ضحكت نسمة و قالت: خالص و أنت زعلان كده يا يوسف ،يلا حلوين هخرج علشان خاطركم
يونس: احلي ماما في الدنيا
ضحك زياد و قال: كده كده هي احلي ماما و زوجة في الدنيا.
////////
بعد شوية
قدم البيت
ركبت هبة جنب زياد قدم و ولادها التلاتة في العربية من وراء، خرجت نسمة مع ولادها و بصت على. العربية و بعدين على زياد و قالت: و أنا هركب فينا
زياد: مازن خد اختك على رجلك
مازن بزهق: حاضر مع اني مش بحب حد يقعد على رجلي
نسمة : خالص خليك مرتاح ، يلا يا ولاد نركب تاكسي أو بلاش الخروج دي خالص.
زياد: تاكسي ايه، اركبي يا نسمة و خدوا ولادك على رجليك العربية وسعة.
نسمة: انت بترفع صوتك عليا.
نفخ زياد بضيق و قال: استغفر الله العظيم يارب ، يلا يا نسمة الله يهديكي
دخلت نسمة العربية و خدت العيال على رجليها و عينها على هبة اللي قاعدة قدم و ماسكة ايد زياد
علشان نسمة تغيظ هبه قالت: صحيح اللي اختشوا ماتوا
هبه: قصدك ايه
نسمة : قصدي عليكي مش عاملة حساب لحد و لا حساب ولادك الرجالة دول.
هبه: لو سمحتي ملكيش دعوة بيا ممكن يا نونو
نسمة: حاضر يا قلب نونو
زياد: ياريت نعدي اليوم من غير مشاكل
نسمة: أنا مكنتش عايزة اجي اصلا،الجو خنقة.
هبة: و كان ايه اللي جابك ،هنبقي مرتاحين من غيرك
ضحكت نسمة بصوت عالي و قالت: و انا كمان مبسوطة اوي و أنا بعيد عنكم، اصل مين الغيبة اللي تمشي مع واحدة زيك
هبة بعصبية: و أنا مالي يا اختي ،انا احسن منك الف مرة، و علشان كده جوزك اتجوزني عليكي.
ضحكت نسمة ضحكة بدلع و قالت: و انتي الصادقة يا حبيبتي هو اتجوزك علشان شبه بعض
هبة: قصدك ايه
نسمة: انتي و هو فاهمين قصدي ايه ،بلاش لف و دوران عليا.
زياد و هبة حساسين أن نسمة عارفة حاجة عن حبهم من زمان بس مفيش دليل.
/////////
وصلوا الملاهي
و هبة شدت زياد و بقت تعلب كأنها عيلة صغيرة و نسيت ولادها حتي بنتها سابتها لاخواتها.
أما نسمة تعلب مع ولادها و مبسوطة و نسيت زياد و هبة
//////////////
بعد شوية
زياد عرف يهرب من هبة
زياد: بتعملوا ايه
نسمة باستهزاء: أنت شايف ايه بنعلب.
زياد كتم غيظه و قال: نسمة ممكن تتكلمي معي بطريقة كويسة
نسمة بعصبية: أنا مش عايزة اتكلم معك اصلا، و ابعد عني يا زياد و بلاش تتعب نفسك معي علشان مفيش رجوع.
زياد بصوت عالي: انتي شايفة نفسك على ايه يا نسمة
بصت عليه و هي بتضحك من غير رد.
و خدت ولادها و جابت ليهم ايس كريم و كانت متجاهلة زياد خالص.
///////////////////
بعد يوم طويل
رجعوا البيت
في شقة صالح
نجوي: عاملة ايه يا نسمة
نسمة : الحمد لله كويسة
صالح:الولاد انبسطوا
يوسف : اوي ،اوي يا جدو
يونس: العيد فرحة و اجمل فرحة ما
ضحك الكل و زياد قال: ما دي في العيد الكبيرة مع الصغير
هبة كانت حاسة أنها هتنفجر من الغيرة و الغياظ و قالت بغضب مكبوت: يلا ولاد نطلع
و بصت على زياد و قالت: يلا يا زياد
زياد: اطلعي انتي يا هبة
هبة: هتيجي وراءي
زياد: لا أنا عايز اتكلم مع نسمة.
نسمة: و انا مش عايزة اتكلم معك
هبه بغيرة: سمعت يلا يا زياد
زياد بهدوء: قولتلك عايز اتكلم مع نسمة.
طلعت هبه و هي مضايقة و غيرانه.
زياد بهدوء: نسمة عايز اتكلم معاكي في وجود ابويا و أمي
نسمة: مع أن الكلام مش هيفيد بس علشان العشره اللي بينا اتكلم يا زياد.
زياد بحزن: أنا مقدرش اعيش من غيرك، بلاش تبعدي عني.
نسمة: زياد بكل صراحة و من غير كسوف ، أنا بحبك اوي، فتحت عيني عليك، فضلت لمدة سنين طويلة و انا فاكرة انك بتحبني، و بعد كل ده طلعت حياتي معك عبارة عن وهم.
زياد: مش وهم ،أنا بحبك
نسمة: لو بتحبني زي ما بتقول مكنتش قدرت تتجوز عليا اي كان السبب.
زياد: انا اسف اني جرحتك من غير ما حس
نسمة: ياريتك كنت مش حاسس ،بس أنت جرحت قلبي و أنت حاسس.
زياد: و عرفت غلطتي و بطلب منك السماح
نسمة: للاسف يا زياد انت كسرت قلبي و اللي حصل حصل.
قامت نسمة على شقتها و هي حزينة و قلبها مكسورة.
قال زياد بندم : و بعدين
صالح: أنا هقف مع نسمة لحد ما تاخد حقها منك
زياد: أنا ليه عمري ما حسيت انك بتحبني
صالح: أنت سامع نفسك بتقول ايه ، جرا لمخك حاجة.
نجوي: احنا هنقف مع نسمة علشان هي مظلومة
//////////
العيد عدى على العيلة دي بحزن مفيش بهجة و لا فرحة.
و صل محاضر على شغل زياد رجع البيت بغضب و طلع على شقة نسمة، خبط على الباب بعصبية و هو بيقول بصوت عالي: نسمة انتي يا هانم
خرجت نسمة من فتحت ببرود و قالت: خير صوتك عالي ليه
بص عليها بغضب و قال: انتي يا مجنونة ايه كل القضايا دي، عايزة مني ايه
نسمة بعصبية: عايزك تطلقني
زياد: ليه كل ده يا نسمة
نسمة بنظرة كراهية: علشان بكرهك ،بكرهك يا زياد.
زياد: انا كنت فاكر انك بتحبني
نسمة: ده في خبر كان،طلقتي احسن ما نقف قصاد بعض في المحاكم ، علشان أنا مش هسكت الا لما اخلص منك..
سال زياد و هو نفسه يسمع نفس الاجابة اللي كان يسمعها زمان: بتحبني يا نسمة.
ضحكت نسمة و قالت: فكرتني بالفيلم بتاع سامو زين لما قال بتحبني يا نسمة ( قالتها بطريقة كوميدية)
و كملت كلامها بنبرة كراهية: لا يا زياد مش بحبك، أنا بكرهك و مش بحبك.
و الجملة دي من وراء قلبها علشان هي بتحبه اكتر من نفسها..
نزلت دمعة من عين زياد و قال: أنتي طالق يا نسمة.
قلب نسمة ارتعش اول ما سمعت الجملة بس تظاهرت أنها قوية قدم زياد.
و زياد قال بندم: انا اسف.
و مشي من قدمها.
و هي دخلت و قفلت الباب
///////////
نزل زياد من شقة نسمة على شقة هبة ،خبط الباب ،فتحت هبه ، قالت : تعال يا حبيبي
زياد: هبه
هبه: نعم
زياد: انتي طالق
بصت عليه بصدمة و سالت : ليه عملت كده
زياد بندم :أنا شخص حقير، فرحت في موت اخويا ،انا كنت فاكر اني بحبك ،بس اكتشفت أن الحب الحقيقي هي نسمة، البنت الجميلة الأصيلة اللي وقفت معي في الحلوة و المرة ،مجرد ما عرفت انها هتضيع مني ،حسيت بالخوف
هبه: طيب و أنا يا زياد
زياد: انتي ماضي كنت موهم انك حب بس انتي تحدي لنفسي انك تكونى ليا,انا اسف يا هبة
نزلت دموع هبة و قالت: بس انا بحبك بجد
زياد: سامحني
و نزل على شقة ابوه.
كانت نسمة بتسمع كلامهم مع بعض
////////////////((((((
في شقة صالح
زياد بحزن: انا طلقت نسمة و كمان هبة انا اسف لو زعلتكم
و قبل ما حد يرد عليه خرج زياد من البيت
عيطيت نجوى على ابنها
و صالح قعد بحزن
////////
بعد شوية نزلت هبة مع ولادها
نجوى: على فين يا هبة
هبة بحزن: على بيت اهلي
صالح: ليه يا بنتي.
هبة: انا مليش مكان هنا بعد الطلاق
صالح: ده بيتك و بيت ولادك
هبة: معلش يا عمي القاعدة هنا بقت صعب و متخافش الولاد هيفضلوا مرتبطين بيكم.
نجوي: اوعي تكوني زعلانة من حد فينا، بس نسمة اتظلمت.
هبة: أنا زعلانة من نفسي ، غلطت في حقك نفسي و حق ولادي و حق المرحوم جوزي.
صالح: البيت ده هيفضل بيتكم طول عمر.
هبة: شكرا يا عمي
و خرجت هبة مع ولادها من البيت
///////////////
أما عند نسمة اللي منهارة من العياط و ذكرياتها مع زياد تمر قدم عينها.
////////////
فلاش باك
في نص رمضان
في شقة صالح
كانوا قاعدين يفطروا وسط هزار من زياد زي العادة
نسمة بابتسامه: دمك خفيف اوي يا زيزو.
زياد بابتسامه: قلب يا زيزو يا ناس
هبة كانت قاعدة و حاسة بالغيرة من معاملة زياد لنسمة و كلمت نفسها: عيني على حظي، جوزي ماتت و سبيني اقعد و اتفرج على رميو و جوليت دول
فاقت هبه على صوت نجوي و هي بتقول: سرحانة في ايه يا هبة
هبة: مفيش حاجه
زياد بص على هبة بنظرات حب و قال : انتي كويسة يا هبه
هبة: الحمد لله.
زياد : لو محتاجة اي حاجه انا موجود
هبة: ربنا يبارك فيك يا زياد
صالح: هي لو محتاجة حاجه تقولي أنا مش أنت،اوعي تكون كبرت عليا.
زياد: أنا اقدر برضو يا حاج
بص زياد على نسمة و قال: نسمة اعملي حسابك بعد مانخلص أكل نروح نشتري لبس العيد ليكي و ل الأولاد.
ابتسمت نسمة و قالت: حاضر يا حبيبي ،اعتبرني جاهزة من دلوقتي.
/////////////////
بعد شوية
خرج زياد و نسمة و الولاد علشان يشتروا لبس العيد
زياد: شوفي بقي انتي محتاجة ايه هاتيها.
نسمة: أنا بحب أخرج في الأجواء دي، فوانيس رمضان و الزينة حاجة تفرح القلب.
زياد: ربنا يفرح قلبك يا نسمة، بتحبني يا نسمة
نسمة: بحبك اوي يا زياد
زياد: و انا كمان بحبك، و خليكي متأكدة من كده.
نسمة: أنا متأكدة.
//////////
بعد ما رجعوا من بره
نسمة بذهول: أنت بتقول ايه
زياد: افهمني يا نسمة ، انا بعمل كده علشان خاطر ولاد أخويا.
نسمة بانهيار: أنت عايز تتجوز عليا يا زياد.
زياد بهدوء: افهمني يا نسمة انا بحبك و انتي عارفة كده صح ،الجوزة دي لمصلحة ولاد اخواتي
نسمة: ولاد اخواتك مش صغيرين
زياد: انا مش عايز اعمل حاجه غصب عنك انا بحبك، و انتي الأهم عندي، اقفي معي علشان مصلحة ولاد اخواتي.
////////
عدى اسبوع و عرف زياد يقنع نسمة أنها توقف.
////////
عودة
مسحت دموعها و قامت توضا و تصلي علشان ربنا يهون على قلبها.
////////////
أما زياد بقي ماشي في الشوراع مش عارف يعمل ايه، في يوم و ليلة خسر كل حاجة…
///(/((//////(//////////////
بعد الطلاق بشهرين
كان زياد مش بيجي البيت و مش بيرد على تلفيونات ابوه، و نسمة بتحاول تكون قوية و كويسة قدم الكل
و هبة بتجي زيارة ليهم ديما.
/////(/((//((((((((((
قبل انتهاء العدة با اسبوع
كانت في المطبخ سمعت صوت زياد برة، خرجت بسرعة، لقت زياد نايم على رجل نجوي و بيعيط زي الطفل الصغير، وبيقولها :
أنا بحبها يا ماما ومش عايز غيرها، هموت لو فضلت بعيدة عني، كلمي نسمة خلها تسامحني ،انا غلطت و ندمان.
نسمة وقفت مصدومة، مش قادرة تصدق إنه بيحبها للدرجة دي، لما شفته بالحالة دي،صعب زياد عليه،هو كان معها كويس جدا قبل جوزه من هبه.
هي دلوقتي في صدمة وحيرة و مش عارفة تعمل ايه ،ترجع أو لا.
نجوي بحزن على ابنه ،قالت بدموع: ما هي كانت في ايدك يا حبيبي ، و أنت ضيعتها من ايدك ،ضحيت بمراتك و ام ولادك
زياد بدموع: غلطت و ندمت و مش قادر على البعد ، اتكلمي معها يا ماما علشان خاطري
طبطت نجوي على رأسه و قالت : انا قلبي يتقطع عليك، و سوء انا أو ابوك اتكلمنا مع نسمة ،بس هي قلبها شايل منك.
كلم زياد نفسه: أنا متأكد أن نسمة عرفت حقيقة مشاعري ل هبة و علشان كده هي حزنها زيادة، هي صحيح كانت رافضة الجوزة، بس مش للدرجة دي، اتحولت معي ١٨٠ درجة،لو تتكلمي يا نسمة و تقولي سمعتي حاجة من كلامي مع هبة عن حبي ليها.
دخلت نسمة المطبخ و هي بتعيط بحزن على زياد و قالت: انا محتارة مش عارفة اسامح أو لا
دخل في الوقت ده زياد و قال: ازيك يا نسمة
انتفضت من مكانها و ردت بتوتر: الحمد لله
زياد: فاضل اسبوع و العدة تخلص ،في أمل للرجوع
نسمة بغناء: لو جاي في رجوع انسياني.
ابتسم زياد ابتسامة مكسورة و قال: لو سمحتي يا نسمة لو مش علشان خاطري ،يبقي علشان خاطر ولادنا.
نسمة: توعدني أنك هتكون مخلص ليا طول عمرك
زياد: اوعدك
نسمة: انا هرجع ليك بس علشان خاطر الولاد.
زياد: و انا هعمل المستحيل علشان تسامحني و تنسي اللي فاتت، بحبك يا نسمة
ضحكت نسمة من غير رد
و دخلت نجوى في الوقت ده و زغرطتت.
و الحقيقة نسمة رجعت علشان لسه بتحب زياد و قررت تسامح
و تمت و ليس للحديث بقية
و انتم رايكم ايه مع نسمة أنها سامحت أو المفروض مكنتش تسامح
#قلب_مكسور
#روايات_بقلم_منال_كريم
♥️♥️♥️♥️♥️♥️♥️♥️♥️♥️♥️♥️♥️
سبحان الله وبحمده سبحان الله العظيم
استغفر الله العظيم و اتوب اليه
لا حول ولا قوه الا بالله العلي العظيم
لا اله الا انت سبحانك اني كنت من الظالمين
اللهم صل وسلم وبارك على سيدنا محمد
♥️♥️♥️♥️♥️♥️♥️♥️♥️♥️