صفقة جواز بقلم منال كريم
قصة كاملة
في بيت بسيط في منطقة شعبية
صحيت ذكرى على صوت خبط جامد على باب اوضتها ، فتحت عيونها و قالت بضيق: استغفر الله العظيم يارب ،الناس تصحى على صوت عصافير ،صوت حد يقولي، صباح الخير يا هانم الفطار جاهز، اما أنا بصحى على صوت كسر الباب، حسبي الله ونعم الوكيل فيكي يا عزيزة..
و خرجت من اوضتها على الحمام علشان تجهز نفسها و تروح شغلها…
في المطبخ
ذكرى بتحضر الفطار ،دخلت مرات ابوها و بتقول: ما تخلصي عايزنا نفطر..
ذكرى بعصبية: طيب ما تحضري الفطار انتي،أنا يادوب اجهز و اروح شغلي
عزيزة: و أنا شغالة عندك انتي و ابوكي
ذكرى بحزن: انتي بتكرهيني ليه.
عزيزة ببرود: اخس عليكي يا كوكي أنا مش بحب غيرك
ذكرى بحزن: تصدقي كان نفسي تكوني بتحبني بجد.
و خرجت ذكرى حطت الفطار على السفرة و خرجت من غير ما تفطر…
/////////
بعد شوية
وصلت ذكرى المدرسة الخاصة اللي هي شغالة فيها و بدأت تشوف شغلها.
///////
في مكان تاني
قصر كبير
كان نايم جاسر الاسيوطي
و قعدت بنت صغيرة جنبه و بتقول و هي بتعيط: بابا ،يا بابا
جاسر: نعم يا سيلا
سيلا بدموع: انا تاخرت على المدرسة
جاسر: مش مشكلة انتي في سنة أولى ابتدائي مش ثانوية عامة
صرخت سيلا: من وقت ما ماما ماتت و انا مبقتش اروح المدرسة بسببك
قام بعصبية و قال: احترمي نفسك يا سيلا ، انتي بتكلمي ابوكي
خرجت سيلا من الاوضة و هو يقول: استني يا سيلا انا لسه مخلصتش كلامي
بس هي كانت خرجت و مشيت على اوضتها
و جاسر بص على صورة مراته اللي ماتت من سنة و قال بعتاب: شايفة أنا حياتي بقت عاملة ازاي من بعدك ، لا أنا عارف اهتم بشغلي و لا سيلا ، حتي الخادمين ملهمش لازمة هنا…
//////////////////////
في اوضة سيلا طلعت تلفيونها و رنت على ذكري مدرستها في المدرسة
ذكرى: سيلا حبيبتي ،ليه مجتيش النهاردة
سيلا بدموع: اتاخرت في النوم و محدش افتكر يقول اصحي سيلا علشان تروح المدرسه
ذكرى بحزن: بلاش تعيطي يا حبيبتي.
سيلا بدموع: انا من بعد ما ماما ماتت محدش يهتم بيا.
ذكرى تاثرت علشان هي حياتها شبه سيلا، لما امها ماتت و هي صغيرة..
ذكرى: سيلا ممكن تهدي و انا بعد المدرسة اجي أشوفك
سيلا: حاضر
قفلت ذكرى معها و دخلت الحصة
///////////
أما سيلا دخل جاسر و قال : يلا علشان الفطار
سيلا : مش عايزة افطر
قفل جاسر الباب و مشي قعد جنبها و قال: زعلانة ليه يا سوسو
مردتش عليه
قال هو: طيب أنا ذنبي ايه انا كمان صحيت على صوتك
سيلا : و انا كمان ذنبي ايه أسقط علشان حضرتك تكون مبسوط..
جاسر: حقك عليا
سيلا: مش المفروض سيرين ترجع مصر
جاسر: يا حبيبتي سيرين سافرت علشان تتعلم و مش هتقدر تنزل مصر قبل الإجازة
سيلا بدموع: يعني أنا ماما ماتت و اختي مسافرة و حضرتك مشغول في الشغل و انا اعمل ايه
صعبت عليه علشان هي اكتر واحدة اتاثرت بموت امها، سيرين انشغلت في الدراسة و هو كمان في الشغل أما سيلا حياتها باظت.
///////////
بعد ما ذكرى خلصت المدرسة قررت تروح ل سيلا..
نزلت من التاكسي و وقفت ذكرى قدم القصر و هي بتص على القصر با أنبهار و قالت: ما شاء الله ايه الجمال ده، يا سلام لو ربنا يرزقني بقصر زي ده.
قرب منها حارس القصر و سأل: انتي وافقة هنا ليه؟.
ذكرى : عايزة ادخل
الحارس: هو الدخول هنا سهل
ذكرى: ما براحة يا عم هو مقر عسكري
الحارس: لازم يكون عندنا خبر
ذكرى: أنا أبلة سيلا ميس ذكرى .
الحارس: استني اسال جاسر باشا
و رن الحارس على جاسر،اللي أمر أنها تتدخل…
دخلت ذكرى و كان جاسر قاعد مع سيلا على السفرة
جريت سيلا على ذكرى و هي فرحانة و بتقول: مس ذكرى شكرا انك جيتي.
ذكرى : حبيبت قلبي وحشتني
سيلا: تعالي اتغدي معانا.
ذكرى: شكرا
قام جاسر و سلم عليها و قال: اتفضلي يا انسة
ذكرى: شكرا
جاسر: انا هدخل اوضة المكتب و انتم خليكم براحتكم
و دخل جاسر و هو شايف ان سيلا انبسطت أول ما شافت ذكرى..
////////
ذكرى: عاملة ايه يا سيلا
سيلا بحزن: انا زعلانة اوي يا ميس.
ذكرى بحزن: معلش يا حبيبتي
سيلا: أنا مش عارفة أعيش بعد وفاة ماما
ذكرى: مامتك ربنا يرحمها ،بس انتي عندك بابا و اختك
سيلا: كلهم مشغولين عني
ذكرى: انتي كمان مشغولة في الدراسة
قالت كنزى بطريقة كوميدية: يا بنتي انتي في سنة أولى و عايزة تركيز..
سيلا: انا بحبك اوي يا ميس.
ذكرى: انا بحبك اكتر يا قلبي..
و بعد شوية مشيت ذكرى و رجعت البيت و اول ما رجعت ،قالت عزيزة بصوت عالي: اتاخرتي ليه كده؟
ذكرى: معلش كنت في مشوار
عزيزة: مشوار ايه يا برنسيسه.
ذكرى: لو سمحتي ممكن ناخد إجازة النهاردة من الخناق.
عزيزة: و ماله بس ادخلي حضري الغداء
كنزى: نفسي اعرف انتي بتعملي ايه طول اليوم غير الفرجة على التلفزيون..
عزيزة ببرود: كتر خيري أني بعمل كده
لقت ذكرى أن الكلام ملوش لازمة مع عزيزة ،دخلت اوضتها غيرت هدومها و خرجت حضرت الغداء
////////////
في بيت أهل مرات جاسر
سلوي ( ام مرات جاسر): انتي فاشلة و مش نفعة في حاجة خالص
نور: يعني اعمل يا ماما اتجوزه بالعافية
سلوى:قولتك قربي من سيلا ،هي دي مفتاح جاسر
نور: مش سيلا بنت اختي بس أنا مش بحبها ،دي بنت بتموت في العياط..
سلوى: حاولي معها تحبك، جاسر عنده فلوس ملهاش عدد ،حرام علينا أن الفلوس دي تضيع مننا.
نور: حاضر يا ماما ،هقومي اغير هدومي و اروح الشركة ل سي جاسر…
///////////
في شركة جاسر
دخلت السكرتيرة و قالت: جاسر باشا الانسة نور برة
نفخ بضيق و قال:: انا زهقت من البنت دي، و هي مش بتفهم.
ابتسمت السكرتيرة و قالت:: ربنا يعينك عليها
جاسر: يارب، خليها تدخل..
خرجت السكرتيرة و دخلت نور اللي قالت بابتسامه: وحشتني يا جاسر
جاسر: عايزة ايه نور
قعدت نور و قالت: بقولك وحشتني
جاسر بعصبية: انتي بالنسبة ليا اخت مراتي الله يرحمها و خالة البنات ، و مفيش حاجة تانية.
نور: انت ليه بتتعامل معي كده
جاسر: ياريت تسالي نفسك السؤال ده، انتي ازاي تعملي كده و أنا جوز اختك .
نور: انا بعمل كده علشان اساعد سيلا.
ضحك جاسر و قال: سيلا مش بتحبك و انتي عارفة..
نور: انا هحاول معها علشان تحبني.
طلع جاسر فلوس و قال: خدي الفلوس دي و امشي علشان عندي شغل.
خدت الفلوس بسعادة و مشيت…
///////////
في بيت ذكرى
عزيزة: انا جبتلك عريس
ذكرى: حلم حياتك أني اتجوز و أسيب البيت.
عزيزة: أنا بفكر في مصلحتك
ذكرى بعصبية: مصلحتي اتجوز عرسان زي اللي انتي بتجبيهم قد ابويا.
عزيزة: ما تكلم يا صلاح
صلاح : أنا مليش دعوة بكلامكم.
ذكرى:نفسي مرة يا بابا تدافع عني قدم مراتك..
صلاح: انتوا مشاكلكم مش بتخلص و انا دماغي بتوجعني.
بصت ذكرى على ابوها بحزن وقامت دخلت الاوضه من غير ما تتكلم او ترد عليه اول ما قفلت الاوضه
رمت نفسها على السرير وانفجرت من العياط ،افتكرت امها وقالت بحزن: انا تعبانه قوي يا ماما من بعد وفاتك ورغم اني بقيت كبيره بس انا مش عارفه اتخطى،خصوصا ان بابا مش بيحسسني بحبه كاني مش بنته بقى كل اهتمامه لمراته،يلا الحمد لله على كل حال ربنا يرحمك يا ماما.
و قرات قران على روحها
///////////((
ثاني يوم الصبح اول ما صحيت ذكرى رنت على سيلا عشان تصحي رددت عليها وقالت: صباح الخير يا مس
ردت ذكرى :صباح النور يا حبيبتي عامله ايه النهارده
سيلا :الحمد لله كويسه
ذكرى :يلا قومي بسرعه تجهزي علشان المدرسه
سيلا :حاضر
وقامت سيلا بنشاط وحماس عشان تجهز و تروح المدرسه , هي عكس معظم باقي الاولاد بتحب المدرسه جدا..
دخلت سيلا اوضه جاسر قعدت جنبه على السرير وقالت:يا بابا ,يا بابا
رد جاسر بعصبية : هو كل يوم ايه رايك تغيبي النهاردة
سيلا: انا لو سبت الموضوع عليك مش هروح المدرسة خالص
ضحك و قال: ماشي يا لمضة ثواني و اكون جاهز
////////
بعد شوية وصلت سيلا المدرسة مع جاسر و سيلا اول ما شافت ذكرى جريت عليها و حضنتها
بص جاسر عليها و كلم نفسه: سيلا بتبقي متخلف معها و بتضحك من قلبها.
//////
تمر الايام و حياة ذكرى زي ما هي مشاكل مع مرات ابوها ديما و ابوها على وضع الصامت
و سيلا حياتها متغلطبة رغم أن جاسر بيحاول يعوضها عن غياب امها
/////////
قدم المدرسة كان وافق جاسر، مستني ه
خروج سيلا
أول ما خرجت سيلا مع ذكرى، قال جاسر: لو سمحتي يا انسة ذكرى تعالي نشرب قهوة في أي مكان
استغربت ذكرى و سالت: ايه المناسبة؟
جاسر: محتاج اتكلم معاكي في موضوع مهم
ذكرى: لا معلش مفيش سبب علشان اقبل و اخرج معك
و كانت هتمشي بس هو قال بسرعة: السبب اني عايز اتجوزك
وقفت مصدومة و سيلا زيها
سيلا: انت بتقول ايه يا بابا
جاسر: ده كلام كبار يا سيلا.
و بص على ذكرى اللي لسه مصدومة و قال برجاء: لو سمحتي مش هاخد من وقتك كتير.
فكرت ذكرى شوية و بعدين قالت: ماشي ،بس مش عايزة اتاخر
جاسر: حاضر .
/////////
بعد شوية وصلوا الكافية
جاسر: سيلا اقعدي هنا و اشربي العصير و احنا على الترابيزة اللي جنبك..
سيلا: حاضر يا بابا
قعد جاسر و ذكرى على الترابيزة اللي قصاد ترابيزة سيلا
ذكرى: اتفضل اتكلم
جاسر: زي ما قولت عايز اتجوزك ،بس الجواز مش هيكون عادي ،هو يكون صفقة
استغربت ذكرى و قالت: صفقة مش فاهمه حاجة
جاسر بهدوء: صفقة جواز ،انا محتاجك في حياتي و انتي كمان محتاج وجودي
ذكرى بعصبية : انا مش محتاجك و لا محتاجة غيرك
جاسر بنفس الهدوء: عايزك تسمعي كلامي للآخر و بعدين اتكلمي براحتك
ذكرى: اتفضل
جاسر: انتي عارفة بعد وفاة مراتي اللي يرحمها حياة سيلا اتغلطبت و رغم اني بعمل اللي اقدر عليه بس برضو مقصر، من وسط كل الناس انا لاحظت ان سيلا بتكون مبسوطة و سعيدة معاكي و انتي تهتمي بيها بصدق، علشان كده فكرة اتجوزك و تكوني ام ل سيلا.
ذكرى: انا كده عرفت انت محتاجني ليه ، انا بقي محتاجة منك ايه
جاسر: انا سالت عنك و عرفت انك من طبقة متوسطة و دي مش المشكلة، المشكلة الحقيقية أن مرات ابوكي بتضغط عليكي علشان موضوع الجواز و مش مشكلتها مين العريس،و من هنا بقولك مصلحتنا واحدة ،انا عايز أم لبنتي و انتي تخلصي من مرات ابوكي
سكتت شوية و مش عارفة تقول ايه
جاسر لاحظ حيرتها و قال:: فكري كويس و ردي عليا
قامت من مكانها و مشيت ناحية سيلا،سلمت عليها و مشيت و هي محتارة و ضايعة
//////////
في بيت ذكرى
من وقت ما رجعت و هي قاعدة في اوضتها و تفكر في كلام جاسر، دخلت مرات ابوها و قالت: المرة دي جايبلك عريس زي الفل.
ذكرى: و مين سعيد الحظ
عزيزة: سامي صاحب الورشة اللي على اول الشارع
ذكرى بغضب: سامي المدمن ،مش فاهمة انا وجودي مضايقك في اي، أنا بشتغل و بعمل كل شغل البيت عايزة ايه تاني علشان تبعدي عني
عزيزة: عايزكي تمشي من البيت علشان اعرف اخد راحتي و يكون في علمك انا قررت أوفق على سامي و انتي عارفة ابوكي ميقدرش يقولي لا
خدت ذكرى نفس و قالت بهدوء: بس أنا عندي عريس احسن من سامي الف مرة
عزيزة : و مين هو بقي؟
ذكرى: راجل اعمال كبير عنده فلوس ملهاش عدد
عزيزة: انتي بتضحكي عليا
ذكري: لا بتكلم بجد ، ابو طالبة عندي و شافني و اعجب بيا.
زغرطت عزيزة و قالت: الف مبروك ،تستاهلي كل خير
ذكرى: بس انا بقولك ابو طالبة،يعني كان متجوز قبل كده و كمان عنده بنت في اولى كلية و بنت في الابتدائي
عزيزة: مش مهم الكلام ده المهم معه فلوس
ذكرى: عندك حق المهم الفلوس و انك تخلصي مني.
و قررت ذكرى توفق على صفقة الجواز ،بس قالت تصبر اسبوع علشان شكلها قدم جاسر
//////(///
اليوم السابع
كانت خارجة ذكرى مع سيلا و مشيوا ناحية جاسر.
وقفت ذكرى قدم جاسر و قالت: انا موافقة على الجواز
ضحك جاسر و قال: لازم نحط شروط الاول
ذكرى: تمام
///////
راحوا نفس الكافية و سيلا على ترابيزة و هما على ترابيزة و قبل ما يبدأ جاسر بالكلام قالت ذكرى: لا استنا سيب الطالعة دي عليا، شوفتها في مسلسلات كتير ، اولا انت لسه بتحب مراتك يعني الجواز هيبقي صوري و دي راي انا كمان ، و انت مش بتحب حد يلمس حاجات و لا أنا ،يبقي لكل واحد فينا اوضة منفصلة ، قدم الكل ها نكونوا عصافير الحب ، بس الحقيقة أننا اغراب عن بعض، انت كل اللي يهمك مصلحة سيلا و انا اهرب من مرات ابويا و كده المصلحة واحدة, و الحل هو صفقة جواز ،انا موافقة، أنت موافق.
جاسر: كل كلامك صح و أنا موافق
و اتفق جاسر و ذكرى على صفقة جواز
//////////
بعد اسبوعين
تم كتب الكتاب من غير فرح و دي كانت رغبة جاسر و ذكرى، لبست ذكرى فستان ابيض بسيط
وصلت ذكرى مع جاسر للقصر اللي اتمنت تعيش فيه.
اول ما دخلت جريت سيلا عليها و قالت: مس ذكرى انا مبسوطة انك هتعيشي معنا على طول
ضحكت ذكرى و قالت: انا مبسوطة اكتر
جاسر: يلا يا سيلا خدي ذكرى تشوف اوضتها
سيلا : حاضر
و طلعت ذكرى مع سيلا و دخل جاسر اوضة المكتب
////////////((((
في بيت نور
صرخت نور و هي بتقول: شوفتي اللي حصل يا ماما
سلوى: خير
نور: جاسر اتجوز
اتصدم سلوى و قالت: بتقولي ايه
نور: خادمة من اللي عنده رنت عليا و عرفتني
سلوى: و اتجوز مين
نور: واحدة شغالة في مدرسة سيلا
سلوى: احنا لا يمكن نسكت ،رني على سيرين و نشوف هي ازاي وفقت على الجوزة دي
رنت نور على سيرين ،اللي فتحت الخط و قالت بسعادة: ازيك يا نور
نور::الحمد لله يا سيرين ،عاملة ايه؟
سيرين: كويسة ، اخبار اللي عندك ايه
نور: انتي مش عارفة اللي حصل
سيرين بخوف: في ايه يا نور ، بابا و سيلا كويسين
نور: كويسين اوي ،لدرجة فرح ابوكي النهاردة
سيرين بصدمة: انتي بتقولي.
نور:بقول الحقيقة ،افرحي يا سيرين بقي عندك ماما جديدة
قفلت سيرين في وشها،و رنت على جاسر
رد جاسر اللي كان لسه قاعد في المكتب و قال: حبيبت بابا ،عاملة ايه؟
سيرين بصوت عالي: بابا انت فعلا اتجوزت
جاسر بهدوء: وطي صوتك و انتي بتكلمي معي
فهمت أنها غلطت و اتكلمت بهدوء: أنا اسفة يا بابا، بس اتصدمت ازاي حضرتك تتجوز من غير ما أعرف.
جاسر: كنت مستني تنزلي إجازة و اعرفك
نزلت دموعها بحزن و سالت: بابا هو أنت نسيت ماما.
جاسر: و لا عمري أقدر انسي ،مريم هي أول حب و اخر حبي في حياتي
سيرين: و طالما لسه بتحبها ، ليه اتجوزت غيرها.
جاسر: علشان خاطر سيلا حياتها باظت من بعد وفاة مريم، انتي مسافرة و أنا مشغول و هي لوحدها.
سيرين: أنا مش موافقة على اللي حضرتك عملته ، عن اذنك يا بابا أنا هفقل…
جاسر : ركزي في دراستك يا سيرين و متزعليش مني..
سيرين: حاضر يا بابا..
////////////////
بص جاسر على صورة مريم و قال: انا اسف يا مريم أني اتجوزت غيرك،انتي عارفة أنا عملت كده علشان مصلحة سيلا
////////
أما عند ذكرى اللي صمتت سيلا تنام معها.
و ذكرى كانت بتص على الاوضة بانبهار و قالت: ما شاء الله الاوضة قد بيتنا كله، صحيح الجواز صفقة بس لازم اتعامل مع سيلا و كمان سيرين حلوة، اللي شوفته من مرات ابويا مش لازم هما يشوفه مني..
و قاطع تفكيرها خبط الباب: مين
رد جاسر و هو برة : أنا ،هي سيلا عندك
و هي كمان ردت و هي مكانها::أيوة هتنام معي
جاسر: تمام
و مشي جاسر على أوضته
////////(((
تاني يوم
صحيت سيلا على صوت ذكرى: سيلا يلا الفطار جاهز
قامت بحماس و قالت: ثواني و اجهز
دخل جاسر اوضة السفرة و ضحك لما شاف ذكرى بتاكل سيلا و هي بيان عليها السعادة و قالت: تعالي يا بابا افطر معانا
جاسر : صباح الخير
ذكرى: صباح النور
جاسر: ممكن افطر معاكم.
ذكرى: طبعا اتفضل.
قعد معاهم على السفرة و فطروا التلاتة مع بعض..
//////////
و عدت الايام و جاسر لاحظ أن البيت بقي اهدي و سيلا حياتها اتظبطت بعد وجود ذكرى
و صحيح هما اغراب بس قدم الكل يتصرفوا كأنهم متجوزين عن حب..
/////////
كانت قاعدة ذكرى و دخلت نور اللي اتكلمت بغرور: انتي بقي مرات جاسر
ذكرى : و انتي مين
نور: انا نور اخت مريم مرات جاسر
ذكرى: اهلا و سهلا اتفضلي
قعدت بغرور و قالت: انتي بتعزمني في بيتي
استغربت ذكرى أنها بتقول بيتها ،بس مردتش عليها.
نور: قومي اعملى كوبية قهوة
ذكرى: مع أن في خادم يعملوا كده بس تمام
كانت ذكرى ماشية ناحية المطبخ ، حطت نور رجلها قدمها ،وقعت على الارض،ضحكت نور و قالت: اه معلش يا كوكي غصب عني.
قامت ذكرى و قالت: حصل خير
و مشيت ناحية المطبخ عملت لها كوبية قهوة ،و قالت: اتفضلي.
اتغظت منها نور و مسكت كوبية القهوة و رمتها على الأرض..
ذكرى: هاتي من الاخر و قولي انك شريرة القصة، كنت عايزة تتجوزي جاسر بس هو سابك و جالي أنا و علشان كده متغاظة
اتعصبت نور و مسكتها من شعرها،و ذكرى مسكت فيها و اتخانقوا مع بعض و بسبب صوتهم اتجمع الخادمين عليهم و حاولوا يبعدوا بينهما و مشيت نور ..
/////////
بليل
كانت ذكرى تمشي في الجنينة جاه جاسر و سأل: ايه اللي حصل النهاردة.
ذكرى: قصدك على نور
جاسر: أيوة
ذكرى حكت له كل اللي حصل.
جاسر: تمام ،أنا بلغتهم نور متجيش هنا تاني..
بصت عليه باستغراب و سالت: ليه عملت كده دي خالة البنات.
جاسر: علشان هي غلطت فيكي و أنتي مراتي كرامتي من كرامتك..
ابتسمت ذكرى و قالت: شكرا
جاسر: العفو انا معملتش حاجة
ذكرى: ممكن أسألك سؤال
جاسر: انا و سيلا مش بنحب نور نهائى و علشان كده عمري ما فكرت تكوني مراتي
ذكرى : ليه دي غلبانة
ضحك و قال: بجد
ذكرى : اه
جاسر: شكرا
ذكرى: على ايه
جاسر: بسبب وجودك و معاملتك مع سيلا هي بقت احسن ،مش هكدب عليكي أنا كنت مرعوب تكوني مرات أب و تبقي الساحرة الشريرة..
ذكرى: أنا مرات أبويا عملتي تروما قد كده، علشان كده خايفة ابقي مرات أب شريرة ، بس الموضوع سهل ،علشان سيلا بتحبني من قبل كده، انا اللي خايفة منها سيرين.
جاسر بنفي: سيرين دي طيبة
ذكرى: أن شاء الله اعمل المستحيل علشان أكسب ثقتها.
جاسر: انا واثق من كده
ذكرى: تصبح على خير
جاسر: و انتي من أهل الخير
ومشيت ذكرى و هي قلبها بيدق جامد و قالت: انا اعجبت بيك من اول يوم دخلت البيت ده و نفسي أنت كمان تحس بيا.
حتي هو كان يبص عليها و مشاعره مختلفة ،صحيح معدش وقت طويل على وجود ذكرى معاهم بس شاف في البيت دفئ و حنان بوجودها
///////(
في بيت نور ،رنت على سيرين و هي بتعيط : شوفتي مرات ابوكي عملت فيا ايه.
سيرين بعصبية: لو سمحتي بلاش مرات ابوكي دي أصل الكلمة تعصبني..
شدت سلوى التلفيون من نور و قالت: ما هي دي الحقيقة يا نور ،هي مرات ابوكي و ابوكي نسي امك و نسي أن عنده ولاد و دلوقتي مش بيعمل حاجه غير اللي هي عايزاه و سيلا يا عيني عليها عايشة في عذاب
زعلت سيرين و قالت بحزن: معقول بابا يعمل كده ،هو كان يعشق ماما و ميقدرش يزعل واحدة فينا
سلوى: كان فعل ماضي
سيرين: الامتحانات قربت تخلص و أنا هرجع و اشوف الموضوع ده
فرحت نور و سلوى علشان سيرين اللي هتقدر تخلصهم من ذكرى.
///////////
و بعد فترة خلصت الامتحانات و سيرين هتنزل القاهرة
///////
في المطبخ
دخل جاسر و سال: انتي بتعملي ايه بليل كده
ذكرى: مش سيرين جاية بكرة أن شاء الله
جاسر::أيوة
ذكرى: انا سألت سيلا ايه الاكلات المفضلة ليها و هعملها كلها.
بص جاسر عليها و هي مشغولة بتحضير الاكل و الحقيقة كانت نظرات اعجاب و حب ،و بعدين قال: احم طيب انا ممكن اساعدك
سالت بفضول:انت شاطر في المطبخ
جاسر: لا طبعا بس هحاول
ذكرى: لا معلش مش عايزة مساعدتك لا تبوظ الدنيا
جاسر: متخافيش أنا شاطر
و بدأ جاسر يساعدها على قده و كان الجو بينهم لطيف و ضحك و هزار و اللي ظاهر أن الاتنين معجبين ببعض.
بعد شوية
ذكرى: الحمد لله كده كله جاهز و بكرة فاضل حاجات بسيطة
من غير تفكير مسك أيدها و قال: تسلم ايدك يا ذكرى
اتوترت بخجل بس اتصدمت اكتر لما لقته يبوس أيدها،شدت أيدها بسرعة و قالت: أنت بتعمل ايه
جاسر بهدوء : بشكرك على تعبك
ذكرى بعصبية: العفو يا سيدي عن اذنك
و طلعت جري على اوضتها و هي قلبها هيقف.
أما هو بص عليها و ضحك و طلع وراءها ، اول ما قعدت على السرير لقت جاسر داخل من غير خبط، زعقت و سالت : أنت بتعمل ايه هنا
قعد جنبها ببرود و قال: عادي حبيت اقعد معاكي شوية
قامت زي اللي لدغها عقرب و قالت: و انا مش عايزة اقعد معك ،انا تعبانة من وافقة المطبخ و عايزة ارتاح.
بص عليها و قال: و المعني
صرخت بحدة: تروح اوضتك علشان أرتاح
جاسر: و فيها لما افضل هنا انتي مراتي
ذكرى : افتكر كويس اللي بينا صفقة جواز و بس
اتجرح من الكلمة و خرج من غير و لا كلمة و اتاكد أن هي مش ممكن تقبل علاقتهم تكون طبيعية.
و مجرد ما خرج من الاوضة،حطت ايديها على قلبها اللي بيدق بسرعة و قالت: هو في ايه؟ انا شكلي كده وقعت في الحب. معقول بالسىرعة دي، احسن حاجه اعملها دلوقتي اني انام و ابطل تفكير.
و هربت ذكرى من التفكير في النوم و جاسر زيها
////
تاني يوم الصبح
كانت ذكرى محضرة سفرة ممتازة علشان خاطر سيرين، و تبص على الباب و تقول: سيلا هو بابا اتاخر
سيلا: لا
ذكرى بتوتر : اومال ليه حاسة أنه اتاخر كل ده يجيب سيرين من المطار
سيلا: بابا متاخرش بس انتي متوترة و مش فاهمة ليه؟
ذكرى: انا متوترة و مرعوبة من سيرين
سيلا: ليه كل ده
ذكرى: خايفة متقبلش وجودي و تشوفني مرات أب شريرة
سيلا: انتي شريرة ،ده انتي قمر
ضحكت ذكرى و قالت: حبيبت قلبي يا سيلا.
و اخيرا وصلت سيرين مع جاسر، جريت سيلا على اختها و ذكرى تبص عليها و شافت قد ايه هي بنت جميلة.
بصت سيرين على ذكرى من غير كلام
قربت ذكرى و قالت: حمد لله على السلامه يا سيرين
سيرين: الله يسلمك
جت ذكرى تحتضنها بس سيرين بعدت عنها و مدت ايديها ،سلمت ذكرى و قالت: زمانك جعانة
سيرين تجاهلت كلامها و قالت: انت عامل ايه يا بابي
جاسر: الحمد لله بس القمر وحشني اوي
سيرين: انتي وحشني اكتر
مسك أيدها و قال: تعالي ناكل
مشيت معه و معاهم سيلا و ذكرى وراهم
على السفرة
سيرين تبص على ذكرى و قالت: ده مكان ماما ،ممكن تقعدي في أي مكان تاني
قامت ذكرى و قالت: اسفة
و قبل ما جاسر يعترض على كلام سيرين، هي قالت بحزن: بابا أنت نسيت ماما
جاسر: ازاي تقولي كده يا حبيبتي ،قولتك قبل كده و بقول تاني مريم الله يرحمها اول و اخر حب في حياتي ، و يلا كلي
بداو ياكلوا، أما ذكرى عرفت أن سيرين مش متقبلة وجودها و أن جاسر عمره ما يشوفها مراته ، جالها احساس اول مرة تحس بيه من وقت ما دخلت البيت ،أن ده مش مكانها.
جاسر لاحظ شرودها و قال: مالك يا ذكرى
ذكرى : مفيش حاجه.
جاسر:طيب كلي حتي انتي اللي عملتي الاكل
بطلت سيرين الاكل و سالت: هي اللي عملت الاكل
جاسر: سهرت طول الليل تعمل في الأكل
سيرين باشمزاء : و انا حاسة أن الاكل فيه حاجة مش حلوة، ياريتك كنتي سبتي الطباخ يعمل الاكل كان هيطلع احسن من كده
و قامت من على الاكل و زعلت ذكرى
سيلا: سيبك من سيرين الاكل جميل جدا
ضحكت ذكرى و قالت: شكرا يا سيلا
جاسر: معلش متزعليش من سيرين
ذكرى: انا مش زعلانة
مد أيده و قال: طيب كلي من ايدي
بصت عليه و هي بتضحك و هو كمان، و الاتنين سرحوا في عيون بعض و سيلا كانت ملاحظة بس كانت مبسوطة..
//////////
أما سيرين كانت واقفة على السلم و هي مولعة من الغيظ و قالت بعصبية: افتكرت بابا هيجي وراءي بس هو قعد مع مراته و كمان يأكلها بايده.
دخلت أوضتها و رنت على نور و قالت: اسمعي يا نور انا لازم اتعامل مع ذكرى كاني متقبلة وجودها.
نور: انتي ناوية على ايه؟
حكت سيرين لها الخطط اللي ناوية عليها..
//////////
بعد شوية ،نزلت سيرين و سالت: بابا و سيلا فين؟
ذكرى: سيلا نامت و جاسر في الشركة
قعدت سيرين و اتكلمت بهدوء: انا اسفة على اللي حصل مني
ذكرى: مفيش حاجه يا حبيبتي
سيرين: ممكن نبقي أصحاب
ضحكت سيرين و كملت: اصل مينفعش تكوني زي ماما
ذكرى: انا مش عايزة اخد مكان مامتك الله يرحمها،انا كمان عايزة نكون اصحاب
سيرين: اتفقنا
ذكرى افتكرت أنها كده كسبت سيرين،اما سيرين كانت تبص عليها بخبث
/////////
بعد يومين
خبطت سيرين على اوضة ذكرى و قالت: ذكرى ممكن ادخل.
ذكرى: اتفضلي يا سيرين.
دخلت سيرين و قالت: معلش هتعبك معي
ذكري: قولي يا حبيبتي
سيرين: خارجة مع صحابي و متأخرة ،ممكن تساعدني و تكوي فستاني.
ذكرى بسعادة: طبعا يا حبيبتي
ذكرى تكوي الفستان و سيرين قالت:ممكن تجيبي من عندك ادوات مكياج
ذكرى : حاضر
قفلت المكوى و مشيت على اوضتها ،و سيرين فتحت المكوى و حطتها على الفستان و جريت على الحمام.
رجعت ذكرى و انصدمت لما لقت الفستان محروقة، في نفس الوقت اللي خرجت سيرين من الحمام ، صرخت و هي بتقول: انتي عملتي ايه في الفستان
ذكرى بحزن: انا قفلت المكوى قبل ما اخرج من الاوضة
سيرين بصوت عالي: كنتي رفضتي طالما مش عايزة ،بس تعملي كده ده الفستان جديد و انا متاخر اعمل دلوقتي.
ذكرى بحزن: بالعكس يا سيرين أنا انبسطت علشان طلبتي مني اساعدك
سيرين: برة اخرجي برة و مش عايزة اشوف وشك
ذكرى بندم: انا اسفة
سيرين: اعتذار مش مقبول، اطلعي بره ..
خرجت ذكرى و أول ما دخلت اوضتها،انفجرت من العياط، و كلمت نفسها بعتاب: أنا ازاي انسى المكوى شغالة، بس انا متأكدة اني قفلتها ،طيب ده حصل ازاي…
دخلت سيلا عليها و سالت: ذكرى أنا سمعت كل حاجة ، متزعليش
ذكرى مسحت دموعها و قالت: أنا مش زعلانة يا حبيبتي.
سيلا بحزن: أنا متأكدة أنك زعلانة
ذكرى: خالص يا سيلا لو سمحتي عايزة اقعد لوحدي
خرجت سيلا و مشيت على اوضة سيرين
سيلا: انتي ليه عملتي كده.
سيرين بعصبية: ملكيش دعوة و اطلعي برة..
////////
بعد شوية رجع جاسر و قرب من سيلا و قال: انتي قاعدة لوحدك ليه.
عيطت بحزن من غير رد.
قعد جنبها و سأل بخوف: مالك يا حبيبتي
حكت سيلا اللي حصل
جاسر: فين سيرين
سيلا: خرجت مع اصحابها
جاسر: فين ذكرى
سيلا: في اوضتها و مش مبطلة عياط..
قام جاسر و طلع اوضتها.
كانت لسه ذكرى بتعيط ،قعد جنبه و بكل هدوء ضمها لحضنه و قال: أنا اسف.
ذكرى بدموع: أنا مكنش قصدي أعمل كده
جاسر: حصل خير الموضوع بسيط
ذكرى: أنا زعلانة أن سيرين زعلانة مني.
جاسر: سيرين غلطت و أنا بقولك لازم تكوني قاسية معها.
بصت عليه و قالت : اكون قاسية يعني ابقي مرات أب قاسية و شريرة.
مسك أيدها و قال بهدوء:انتي لازم تتعالجي من العقدة اللي عندك من مرات ابوكي
ذكرى: أنا مش عايزة أكون النقطة السودة اللي في حياة سيرين و سيلا….
جاسر: احيانا القسوة بتكون مطلوبة و سيرين غلطت حتي لو انتي حرقتي الفستان كان المفروض يكون رد سيرين باحترام..
ذكرى: أنا مش عايزة أعمل مشكلة مع سيرين،أنا فاهمة سبب حالتها و أن هي زعلانة و غيرانة…
جاسر: و ده مش سبب
و هما يتكلموا ،سمع صوت سيرين ، قام علشان يخرج من الاوضة، مسكت أيده و قالت: لو سمحت مش عايزة مشاكل ، بلاش تتكلم معها انسي الموضوع..
قال بهدوء: لازم اتكلم
و خرج من الاوضة و هي قالت بزعل :أعمل ايه، دلوقتي سيرين تقول اني مرات أب سيئة…
////////////
كانت سيرين طالعة على السلم، قابلها جاسر و قال: حمد لله على السلامه يا حبيبتي
سيرين: الله يسلمك يا بابي.
جاسر: سيلا اطلعي اوضتك
سيلا : حاضر يا بابي
طلعت سيلا و قال جاسر: تعالي نتكلم
اتوترت سيرين و قالت: معلش يا بابا تعبانة و عايزة ارتاح ..
مسك أيدها و قال: الكلام أهم..
نزلت معه و قعدوا قصاد بعض و سال بهدوء: ايه اللي حصل النهاردة
سيرين: محصلش حاجة
جاسر: اللي حصل النهاردة غلط كبير و عارفة الاسوء ايه أنه ضاع تعب مريم في تربيتك، صوت عالى و قلة ادب ايه اللي ناقص تاني..
سيرين بعصبية: و هي بقي اللي قالتلك كده صح..
جاسر: اتكلمي كويس يا سيرين
سيرين بصوت عالي: أنا بتكلم كويس، بس حضرتك صدقت كلام مراتك من غير ما تسمع مني
صرخ بعصبية و قال: هي مقالتش حاجة اللي قالت ليا هي سيلا..
نزلت ذكرى على الصوت و قالت: لو سمحت يا جاسر كفاية كده.
سيرين بغضب: اعملي نفسك طيبة بعد ما انتي اللي عملتي المشكلة
ذكرى: صدقني انا مقولتش حاجة. و معترفة اني غلطانة
جاسر: اظن كفاية كده ،اعتذري حالا.
سيرين: انا مغلطتش
ذكرى: انا اللي غلطانة و أنا اسفة يا سيرين اللي حصل غصب عني، لو سمحت يا جاسر كفاية ..
و طلعت ذكرى الاوضة
بص جاسر على سيلا و قال بعتاب: يا خاسرة يا سيرين
و طلع جاسر وراء ذكرى
أما سيرين قالت بغيظ: و لسه يا ذكرى لازم تخرجي من البيت ده قريب.
دخل جاسر اوضة ذكرى و قرب منها و قال: انا اسف يا ذكري
ذكرى: محصلش حاجه
بص عليها و قال بابتسامه: أنا قررت الغي الصفقة اللي بينا
اتصدمت ذكرى و خافت أنه كده هيطلقها بعد ما وقعت في حبه..
ذكرى بدموع: قصدك ايه
جاسر: قصدي نغلي الصفقة و يبقي الجواز طبيعي علشان أنا بحبك.
اتصدمت للمرة الثانية و قالت: أنت بتقول ايه؟
جاسر: بقول الحقيقة أنا حبيتك يا ذكرى
ذكرى بقت مصدومة و مش عارفة ترد تقول ايه و هو علشان يرفع عنها الحرج، قال : انا مش هضغط عليكي ،خدي وقتك في التفكير..
و خرج جاسر من الاوضة و رغم أن ذكرى كانت عايزة تعترف بحبها بس خافت و سكتت..
///////////
و عدت الليلة على ذكرى و هي فرحانة أن جاسر يحبه و زعلانة على اللي حصل بينها و بين سيرين
أما سيرين كانت هتموت من الغيظ و تفكر أن لازم ذكرى تخرج من البيت..
و جاسر زعلان علشان حس أن ذكرى مش بتحبه.
///////////
بعد كام يوم
خبطت سيرين على اوضة ذكرى و قالت: ذكرى
اتوترت ذكرى و قالت: اتفضلي يا سيرين
دخلت سيرين و على وشها البراءة و قالت بندم: انا مهما اعتذر مش هيكون كفاية
ذكرى : مفيش حاجه يا سيرين ،حصل خير
سيرين: لا ازاي انا لازم اعتذر ،انا اسفة و حقك عليا،انا بس عصبية مش بحس بنفسي لما اتعصب
ذكرى: خالص يا سيرين الموضوع انتهى
سيرين: بجد يعني صافي يا لبن
ذكرى: حليب يا قشطة
سيرين: طالما سامحتني يبقي اطلب منك طلب بقلب جامد
ذكرى: و ايه هو
سيرين: نخرج مع بعض النهاردة
ذكرى: لا معلش معنديش مزاج أخرج
سيرين: يبقي لسه زعلانة مني
ذكرى: مش زعلانة بس مش عايزة أخرج
سيرين مسكت أيدها و قالت بهدوء: بصي يا ذكرى هكون صادقة معاكي أنا مش متقبلة انك تكوني مكان ماما، بس صدقني بحاول و علشان كده عايزة نخرج مع بعض نتكلم برة البيت براحتنا..
فكرت ذكرى و لقت أنها فرصة كويسة و وافقت علشان تقع في فخ سيرين
////////
في محل ملابس
ذكرى : احنا بنعمل ايه هنا
سيرين: عايزة اشتري هدوم
ذكرى: تمام
سيرين: بصي الفستان ده كده
ذكرى: جميل
سيرين: ادخلي جربيه
ذكرى : لا مش عايزة
سيرين: لا ادخلي يلا
دخلت ذكرى و سابت شنطتها مع سيرين اللي خدت فستان من المحل و حطته في الشنطة..
خرجت ذكرى و قالت: مش عجبني، انتي عجبك حاجه
سيرين: لا يلا نشوف مكان تاني.
كانوا خارجين من المحل و الانذار اشتغل قال الأمن: معلش يا فندم هنشوف الشنط
سيرين بعصبية: انت مش عارف احنا مين ؟
الامن: أنا بشوف شغلي
سيرين بصوت عالي: شغل ايه ،أنت اتجنتت
ذكرى بهدوء: و فيها ايه يا سيرين ، خلي الراجل يشوف شغله
سيرين: لا طبعا دي قلة تقدير
ذكرى: ايه علاقة التقدير بللي يحصل
ذكرى أدت الأمن شنتطها بكل ثقة، أما سيرين بتضحك بانتصار
الامن: و ده بيعمل ايه في شنتطك.
اتصدمت ذكرى و بصت على سيرين و قالت: هي وصلت لكده
سيرين: و انا عملت ايه؟
جت صاحبة المحل و قالت: بلغ البوليس
ذكرى بصوت عالي: انا معملتش حاجة ،صدقني مظلومة
صاحبة المحل: مظلومة و الفستان خارج من شنتطك.
ذكرى: بقولك انا معملتش حاجة ،طيب رجعي كاميرات المراقبة
صاحبة المحل: عطلانة
و هنا فهمت ذكرى اللعبة، طلعت موبايلها و رنت على جاسر،و قالت و هي تصرخ: الحقني يا جاسر
جاسر بخوف: في ايه؟
حكت اللي حصل ,و سيرين و صاحبة المحل مرعوبين أن لعبتهم انكشفت
قفلت ذكرى و بصت على سيرين و قالت بغضب: ابوكي جاي يشوف اخر عمايلك السودة
سيرين بعناد: انا معملتش حاجة
ذكرى: هنشوف
//////////////
بعد شوية وصل جاسر المول
دخل المحل و هو يبتسم ،جريت ذكرى عليه مش علشان هي خايفة،علشان تغيظ سيرين،و هو ضمها بحنان و قال: متخافيش انا معاكي
بعدت عنه و قالت: انا معملتش حاجة
قعد و هي جنبه و قال: انا عارف اللي عمل هما سيرين و سلوى و نور ،و طبعا الكاميرات بايظة و كده تثبت التهمة على ذكرى و تدخل السجن بتهمة زور علشان تخلصي منها صح
سيرين: بابا انا
جاسر بغضب: أخرسي مش عايزة اسمع صوتك، الباقي فين،يخرجوا حالا قبل ما أطلب البوليس بنفسي.
خرجت سلوى و نور و قالت سلوى بخوف: احنا اسفين
جاسر: وصل الحقد بيكم لكده ، لعبتوا في دماغ سيرين علشان تنفذ خططكم
نور بغضب: علشان المفروض تجوزني انا مش دي على الأقل انا خالة البنات
جاسر: خالة البنات اللي مش بتحب البنات و كل تفكييرك في مصلحتك و بس
نور: لا يا جاسر أنا بحبك
ضربها بالقلم و قال:: قصدك بتحبي فلوسي ،اخر تحذير ليكم ابعدوا عن مراتي علشان هي مش بس مراتي دي حبيبتي و مش هسمح لحد يزعلها
و بص على ذكرى و قال: انا اسف و ممكن تزعلي مني علشان سكت على اللي عملوه بس انا عملت كده علشان مريم.
ذكرى: عملت الصح.
بص جاسر على سيرين و قال: حسابك في البيت
سيرين بعناد: بس انا معملتش حاجة
ذكرى فقدت أعصابها و قالت بغضب :بعد ما وفقت على رجلي طول الليل اعملك الاكل اللي تحبيه مهانش عليكي تقولي تسلم ايدك ، حرقتي الفستان و قولتي انا اللي حرقته ، وصلت معاكي أنك تدبري ليا تهمة سرقة،لا انتي كده مريضة و عايزة تتعالجي ،روحي اتعالجي
صرخت سيرين و قالت: أخرسي مش عايزة أسمع صوتك ،انا بكرهك ،بكرهك، انتي أتجوزتي بابا علشان انتي طمعانة في فلوسه ، انتي كنتي مجرد شحاتة قبل ما بابا يقبل يتجوزك
ضربتها ذكرى بالقلم و قالت: انتي قليلة الاداب و محدش عرف يريبكي، انا مش عايزة أكمل فى الجوزة دي ،طلقني يا جاسر .
دقيقة صمت و ذكرى مشيت من المحل، جري جاسر وراءه و قال: ذكرى انتي عندك حق أنا بنتي مش متربية، بس بلاش تمشي
شدت ايديها و مشيت بعصبية و هو دخل المحل ،خد سيرين و رجع البيت.
/////////////
وصلت ذكرى بيت ابوها
عزيزة: ايه اللي رجعك تاني
ذكرى بدموع: معنديش مكان اروح فيه،ممكن تخلني هنا
عزيزة: مالك يا ذكرى
انفجرت من العياط و قالت: انتي السبب في كل اللي أنا فيها، اتجوزت علشان اهرب منك، و علشان خوفي اكون زيك بقيت اتستاهل مع بنت جوزي و ده خلها تتطاول عليا ، انا عندي ندبة كبيرة في قلبي بسببك و ملهاش علاج
اول مرة تصعب على عزيزة و قعدت جنبها و قالت: انا كنت شريرة اوي
ذكرى: أيوة و ياريتني عرفت اكون زيك
عزيزة بحزن: انتي احسن مني الف مرة، يمكن اكون قاسية معاكي بس مش شريرة
مسحت دموعها و قالت: و المفروض اسامحك بعد السنين دي
عزيزة: انا معنديش شك انك هتسامحني علشان قلبك طيب.
ضحكت كنزي بحزن
/////////
في بيت جاسر
جاسر: ايه اللي حصل
سيرين: يا بابا ذكرى بتكذب
ضربها بالقلم و قال: انا بكرهك ، و مكسوف اني عندي بنت زيك.
اتصدمت سيرين و سالت: بتكرهني
جاسر بغضب: علشان انتي أنانية،و سرقتي حياة اختك.
شاورت على نفسها بصدمة و قالت: انا
صرخت بصوت عالي: أيوة انتي
خرجت سيلا من اوضتها على الصوت و واقفت على السلم
و كمل جاسر: من بعد وفاة مريم و سيلا بقت تعبانة مفيش اكل مفيش نوم تقصير في الدراسة و حضرتك علشان أنانية لما طلبت منك ترجعي و تدخلي الجامعة هنا، فكرتي في مصلحتك و رفضتي،و انا كنت بين شغلي و هي و طبعا كنت مقصر معها،و سلوى و نور محدش فيهم فكر يسأل عليها ، حياة اختك اتغيرت لما ذكرى دخلت البيت و البيت بقي دافئ و له طعم ،بس حضرتك مش عايزة كده ،و اتفقتي مع اللي مش عايزين حاجة غير فلوسي و بس.
عيطت سيرين بصوت عالي يمكن اول مرة تشوف الحقيقية.
سال جاسر: قولي يا سيرين ،هتعرفي تخلي بالك من اختك بعد ما ذكرى مشيت
سيلا بصدمة: بابا ذكرى مشيت فين
بص جاسر عليها و قال: اهدي يا سيلا
صرخت سيلا و قالت: ذكرى مشيت بسببك صح ،انا بكرهك، بكرهك يا سيرين.
و نزلت تجري على السلم و هي بتقول: انا هروح لذكرى
و هي نازلة وقعت على السلم، جري جاسر و سيرين عليها و هي كانت تتالم فخدها سليم و رح المستشفى و سيرين معه..
////////////
في المستشفي وصلت ذكرى مع عزيزة بعد جاسر ما طلب منها تجي
ذكرى: سيلا عاملة ايه؟
جاسر::الدكتور بيجبس أيدها ،رفضت ادخل معها ممكن تدخلي انتي
كانت ماشية و قال جاسر: ذكرى
ذكرى: نعم
جاسر: سيلا و هي تتالم من الوجع كانت بتقول عايزة ماما، انا افتكرت أن قصدها مريم و قولتها ماما في الجنة بس هي قالت عايزة ماما ذكرى
اتصدمت ذكرى و حست أن الكلمة دي مسؤولية كبيرة و مش عارفة هتعرف تكون ام ل سيلا أو لا
دخلت ذكرى عند سيلا
و بعد شوية خرجت بصت على سيرين اللي كانت منهارة ،صعبت عليها و افتكرت كام مرة كان نفسها حد يحضنها و كلمت نفسها: صحيح حياتي مش زي حياة سيرين و جاسر مش زي بابا و لا انا زي عزيزة، بس امها ماتت و ابوها اتجوز واحدة تانية اكيد موجوعة.
قعدت جنبها و من غير كلامه ،خدتها في حضنها و اول ما ذكرى عملت ده، انفجرت سيرين من العياط و هي تصرخ: انا اسفة، انا عارفة اني وحشة و مش حد بيحبني..
ذكرى::مين قال كده. انا بحبك و بابا و سيلا
سيرين: بابا قال انا بكرهك و كمان سيلا
ذكرى :دي كلمة وقت غضب و الحقيقية أنهما بيحبوكي
سيرين: هتسامحني
عزيزة: اه هتسامحك علشان هي قلبها طيب ،دي حتي سامحتني انا.
ذكرى : انا قلبي طيب و مش بعرف ازعل من حد.
جاسر: هترجعي البيت
ذكرى: اه
و كانت دي بداية حياة جديدة لأسرة سعيدة
///////
بعد سنة و نص
في المستشفي
في الاوضة
جاسر: حمد لله على السلامه يا كوكي
ذكرى: الله يسلمك
سيلا: هتسمي البيبي ايه يا ماما.
ذكرى: انا قررت أسيب المهمة دي لاختكم الكبيرة
سيرين: انا
ذكرى: أيوة يا حبيبتي ، خدي شيلي اخوكي و خلي بالك منه
شالت سيرين الطفل و بصت عليه و قالت : ايه رايكم في اسم سليم
ضحكت ذكرى و قالت: و كده كملت امبراطورية س.
جاسر بحب: كملت بوجودك فيها يا حبيبتي
ذكرى: انت كنت احلى صفقة في الدنيا
#صفقة_جواز
#روايات_بقلم_منال_كريم
❤️❤️❤️❤️❤️❤️❤️
سبحان الله وبحمده سبحان الله العظيم
استغفر الله العظيم و اتوب اليه
لا اله الا الله وحده لا شريك له له الملك وله الحمد وهو على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
لا اله الا انت سبحانك اني كنت من الظالمين
اللهم احفظ مصر واهلها من كل سوء
اللهم انصر اخواننا في فلسطين و السودان و النصر لجميع البلاد العربية و الإسلامية
❤️❤️❤️❤️❤️❤️❤️❤️