درس سواقة بقلم منال كريم
قصة كاملة
نزلت جنا من عربيتها بعصبية وهي لبسها بنطلون جينز و تيشيرت و رفعها شعرها لفوق،هيئتها مختلفة عن معظم البنات ، و هي بتقول بصوت عالي: جرا ايه يا غبي أنت، و لما أنت مش بتعرف تسوق بتركب عربيات ليه.
خرج أسر من عربيته و هو لبس بدالة شياك و نظارة شمس ،و قال بغضب : انتي مجنونه ولا ايه انتي اللي خبطاني مش أنا ، سلامة نظرك..
جنا بعصبية: انا اللي خبطتك ،أنت اعمي و مبتشوفش مش انا، يلا بينا على القسم ونشوف مين اللي خبط التاني..
آسر بصوت عالي: يلا هو أنا هخاف منك، العربيه بتاعتي مخبوطه و ده واضح للاعمى مين فينا اللي غلطان..
اتكلم راجل كبير و قال: يا بنتي بلاش مشاكل أنتي اللي غلطانه
رفعت جنا صوتها وكانها بتقول خطاب و قالت: قول كده بقى يا عمو طبعا الراجل لازم يقف مع الراجل ما هو مجتمع ذكوري يا عيني على البنات المظلومه في المجتمع حسبي الله ونعم الوكيل فيك
آسر بعصبية: لا ده انتي حالتك صعبة، اتكلمي بادب واحترام مع الكبار في السن، انتي عايزة اقعدي في مستشفى مجانين حافظا على الناس منك..
جنا بصوت عالي: أنا مجنونه تصدق أنك لازم تبات في الحبس النهارده،عشان تعرف انت بتكلم مين.
أسر بصوت عالي:: هكون بكلم مين يعني واحده مجنونه بلوه من بلاوي الزمن اتحدفت عليا انا عارف هيبقى يوم ملوش ملامح النهاردة.
جنا صرخت بصوت عالي و اتلم الناس عليهم و راحوا القسم..
//(((((((((
في القسم
الضابط: في ايه؟
جنا بعصبية: الاستاذ ده خبطني و كمان غلط فيا…
آسر بعصبية: نعم انا، اول مرة اشوف ظلم كده، الهانم هي اللي خبطت عربيتي و كمان لسانها طويل و عايز قطعه و مش عجبها اني زعلان و تجيب اللوم عليا
زعقت جنا و هي بتقول: انت اللي غلطان بس طبعا لازم تجيب الحق عليا أنا ما هو مجتمع ذكوري
بص أسر عليها بتعجب و قال: على فكرة انتي مش مجنونة بس كمان بتحبي تقولي شعارات، و كانك في مجلس الشعب .
خبط الظابط على المكتب و قال: بس انت و هي ،انا المسؤول اني احقق و اقول مين الغلطان
////////////
بعد التحقيق
الظابط : مين اللي كان ماشي في الطريق المعاكس
جنا تبص على الارض وقالت : الظاهر كده أنا.
الظابط: و العربية اللي اتخبطت بتاعت مين؟
بصت جنا على أسر و قالت : الاستاذ المحترم اللي هناك ده
أسر باستغراب: انا محترم و ده من أمته
جنا:من وقت ما قابلتك و أنا شايفة الاحترام في عينك
الظابط: و بعد كل ده حضرتك لازم تدخلي السجن
جنا يفزع: لا ،لا حرام عليك يا حضرت الظابط انا لسه صغيرة على الغرام
الكل بص عليها باستغراب، فكملت : قصدي صغيرة على السجن، انا مستعدة اصلح عربية الاستاذ المحترم بس بلاش سجن
أسر: خالص يا فندم أنا متنازل عن حقي
الظابط: راجل محترم يا استاذ اسر
أسر: شكرا يا فندم
جنا: شكرا يا استاذ
في الوقت ده وصل ابو جنا و قال: تاني يا جنا
جنا: مكنتش اقصد ، صدقني كانت حادثة بسيطة
محمود: الله يسامحك يا شيخة كل يوم اجيبك من قسم
أسر: شكلك متعودة ديما
بصت جنا عليه بغيظ من غير رد.
خلص ابو جنا المحضر و مشيت مع ابوها.
///(/////////
في البيت
محمود: مش ناوية تشوفي حل
جنا بغباء: حل في ايه ؟
محمود: بلاش غباء ،اختاري ، يا تتعلمي السواقة أو تجيبي سواق
جنا: يا بابا كلامك ده معناه اني مش بعرف اسوق
محمود: و هي دي الحقيقة
جنا: أنا سواقة محترفة
محمود: أنا قولت اللي عندي
و سابها و طلع اوضته و هي قالت: كده مفيش حل غير اشوف مدرسة سواقة علشان خاطر بابا
////////
تاني يوم رحت اشهر مدرسة سواقة مشهورة في القاهرة
و اتفاجات أن صاحب المدرسة هو اسر، قالت بعصبية: أنت
أسر بعصبية: أنتي
جنا بغرور: بص أنا بابا طلب مني اتعلم السواقة مش لاني مش بعرف اسوق، لا علشان اتفادي غباء اللي زيك كده
أسر بغضب: احترمي نفسك
جنا: أنا محترمة غصب عنك..
نفخ أسر بضيق و قال: استغفر الله العظيم يارب، هو أنتي ملقتش مدرسة غير مدرستي
رجعت شعرها لورا بغرور و قالت: أنا جنا محمود ديما بختار الافضل و طلعت مدرستك هي الافضل
أسر: تمام يبقي نهدا كده و نتكلم بعقل زي الناس الكبار..
جنا: اوكي
أسر: تمام أن شاء الله نبدا من بكرة
جنا: اتمني تعرف تعمل حاجه صح
جز على أسنانها ومردش
///////////
في المعطم
كانت جنا تتغدى مع صاحبتها
نور: بقولك بكرة عندك ايه؟
جنا بتريقة: عندي مدرسة
ضحكت نور و قالت: مدرسة ايه؟انتي رجعتي للتعليم تاني.
جنا بغيظ : ابدا يا اختي بابا قرار أني لازم أتعلم السواقة من أول و جديد.
ضحكت نور و قالت::احسن تستاهلي علشان تعدلي من سوقتك الوحشة دي..
جنا بعصبية : انتي كمان هتقولي أني بسوق وحش، أنا شاطرة جدا ، بس الآخرين هما اللي اغبياء
نور: ديما عندك مبرر كده
جنا: بقولك أنا زهقت من الكلام في الموضوع ده، يلا نروح علشان عندي مدرسة بدري، تخيلي أن المعاد الساعة التاسعة الصبح ،مش عارفة ابيع لبن و لا ايه.
نور: انا فرحانة فيكي اوي..
قامت جنا و مشيت من غير رد و هي مقتنعة تماما أنها محترفة في السواقة..
///////
تاني يوم
في العربية
مايسة مدربة السواقة :: اظن كلامي واضح
جنا: صدقني أنا مش محتاجة لكل ده أنا اصلا بعرف أسوق.
مايسة: طيب ورني
جنا: صدقني هبهرك
مايسة بشك: اتمني.
بدأت جنا تسوق و اللي مايسة تشرح فيه بقالها ساعة مفهمتش جنا من حاجة.
صرخت مايسة: بس ،بس اومال ايه هبهرك، كاني كنت بشرح لنفسي
جنا بعصبية: أنا مسمحش لحضرتك ترفعي صوتك عليا.، انتي اللي مش عارفة تعلمني صح
مايسة بعدم تصديق: نعم أنا ،يا شيخة حرام عليكي انتي غبية و اللي زيك خطر على الناس لو فكرت تسوق، حسبي الله و نعم الوكيل في كل اللي زيك ، بسببك اللي زيك انتشرت سمعة أن البنات مش بتعرف تسوق..
جزت على أسنانها بغضب و قالت : طيب انا اعرفك أني بعرف اسوق
و ساقت جنا العربية باقصي سرعة و مايسة هتموت حرفيا من الخوف و تصرخ: وقفي العربية يا مجنونة؛ هنموت يا جنا.
بتضحك جنا و قالت: احسن علشان تغلطي فيا تاني
مايسة: خالص اسفة ،وقفي العربية
و قفت جنا العربية و قالت مايسة: انا لا يمكن اكمل دروس مع واحدة زيك
جنا: أنا اللي مش عايزة اصلا
//////
عند أسر
مايسة بعصبية : ده كل اللي حصل
أسر: انا اسف يا مايسة
مايسة: حضرتك مش غلطان ،لكن أنا مش هكمل معها
أسر: حقك طبعا
مشيت مايسة و بص أسر على جنا اللي بتشرب القهوة ببرود, و قالت: هو ايه اسف يا مايسة، حضرتك المفروض هي اللي تعتذر ليا مش أنت تعتذر لها.
أسر : هو انتي مجنونة و لا غبية
زعقت و قالت : انت كمان هتغلط فيا، لا أنا كده اقدم شكوى في مدرستك
أسر: قدمي في أي مكان ،يلا امشي من هنا
رسمت البراءة و سالت : و مش هتعلمني السواقة
أسر: أعلمك ازاي بعد اللي حصل النهاردة.
جنا بحزن مصطنع: أنا بابا مصمم اتعلم السواقة ، و ملقتش مكان احسن من هنا، لو سمحت ساعدني و اوعدك هسمع الكلام و اكون شاطرة
أسر أتأثر من كلامها و قال: تمام اتمني تكوني صادقة و تعرفي فعلا ان عندك مشكلة لو شايفة صعب انك تتعلمي ،يبقي بلاش تسوقي خالص ،علشان حياة الناس مش لعبة
جنا: حاضر ،ممكن تقولي اجي أمت
اسر: بكرة أن شاء الله ،و ياريت تسمعي الكلام
جنا: ثق فيا
أسر: لما نشوف
جنا: هبهرك
/////(((((
بعد أسبوع
جنا زي ما هي ديما صوت عالي و مش بتسمع الكلام و مقتنعة أنها صح ومفيش حد عرف يسيطر عليها و كأنها طفلة صغيرة..
أسر: انا مش عايز اشوف وشك تاني و ده كلام نهائي
جنا بحزن : ليه بس، انا عملت ايه ؟
خبط أسر على المكتب و قال بصوت عالي: قولي معملتيش ايه ، ده مفيش حد من اللي عندي استحملك ،و انا مش مستغني عنهم و انتي ما شاء الله زي ما انتي مفيش تقدم و لا تطور.
جنا: طيب اخر مرة و اوعدك المرة دي هكون شاطرة
أسر: قولت لا و اتفضلي من هنا
جنا بصوت عالي: بابا مش ها يدخلني البيت لو قولته أنك مش عايز تخلني اتدرب عندك ، صدقني دي اخر مرة و المرة دي هبهرك
أسر: لا بلاش كلمة هبهرك دي علشان بعدها بتجي مصيبة
جنا: بلاش هبهرك ، هو مش ممكن تدربني أنت
أسر: أنا توفقت عن التدريب و مسؤولة عن الادراة بس.
جنا: طيب ما ترجع لارض الملاعب تاني علشان خاطر حياة الناس
أخد نفسي و قال: انتي مستفزة و صوتك عالي و أنا مش بتحمل الشخصية اللي فيها الصفات دي.
جنا براءة : انا هكون كيوت و هفعل الصوت الشتوي
ضحك و قال: لما نشوف
فرحت جنا لأنها كانت عايزة أسر اللي يدربها و ده هدفها من البداية.
/////
في بيت جنا
و هي عايشة مع ابوها و امها متوفية
محمود: عاملة ايه في دروس السواقة
جنا: الكل مبهور بيا و قد أنا شاطرة و بتعلم بسرعة
محمود: فعلا
جنا: اومال افرح بقي دي بنتك تشرف اي حد
محمود: فرحان اوي ،ربنا يستر
طلع محمود و قالت جنا: مش عارفة مين وصل لهم فكرة أني مش بعرف اسوق..
/////////
في بيت أسر
عايش لوحده
حمزة صاحبه : ايه يا اسر اللي انا سمعته ده
أسر: سمعت ايه
حمزة: سمعت عن بنت اسمها جنا تتدرب عندك و مفيش حد قادر عليها
ضحك أسر و قال: ايوه يا عم دي مجنونة و مقتنعة أنها بتعرف تسوق و مش مهما أن الكل يقولها أنها مش بتعرف تسوق أو كلام المدربين ،كل اللي يفرق معها كلامها هي بس.
حمزة باستغراب: خير اللهم اجعله خير ، أول ما قولت اسمها وشك نور و الضحكة من هنا لهنا ،هو في حاجة أنا مش عارفها
أسر: انت عبيط يا حمزة ،حاجة ايه، انت مجنون بقولك دي مجنونة و عقلها مسافر في مشوار.
حمزة: أنت متأكد ، اصل انا عارف اسم جنا مميز عندك
أسر : أيوة طبعا مفيش حاجة و اسم جنا زي اي أسم ، و يلا نغير الموضوع…
//////////
تاني يوم
في بيت جنا
على غير العادة، كانت تجهز نفسها بعناية كبيرة و بقالها ساعة تختار هتبليس ايه و هتعمل شعرها ازاي و في الاخر معرفتش تكون غير نفسها، قلعت الفستان و لبست بنطلون جينز و تيشيرت و رفعت شعرها ديل حصان و مسحت كل المكيب و قالت: انا مش هعرف اكون غير نفسي و بس
و خرجت من البيت و هي قلبها بيدق أنها هتقابل أسر اللي بتحبه مش من دلوقتي هي بتحبه من وقت زمان ..
//////////
أما أسر اللي طول بيفكر في كلام حمزة و يسأل نفسه: انا فعلا بكون مبسوط لما اشوفه، بس اكيد لا أنا هعرفها من كام يوم بس
و نفض الفكرة من دماغه
/////////
بعد شوية
أسر: أنت كده عرفت كل حاجه ، أهم حاجة التركيز يا جنا، السواقة مش صعبة بس مسؤولية كبيرة علشان انتي مسؤولة عن أرواح كتير ،يبقي التركيز ثم التركيز لو الموضوع صعب يبقي بلاش تسوقي
جنا: أنت كل شوية لو الموضوع صعب، بلاش اسوق ،احسن من كلامك ده علمني
أسر: انا علمتك يا اختي، يلا ورني
جنا بغرور: بقولك هبرك
أسر حط ايده على قلبه و قال : ما قولت بلاش كلمة هبهرك دي ،بتخوفني و بعرف أن بعدها مصائب
جنا: هو مفيش ثقة خالص
أسر: لا مفيش
جنا: طيب غمض ايدك و صلي على رسول الله
أسر: عليه افضل الصلاه والسلام ،بس ليه أغمض عيني،ناوية على ايه
دست بنزين و صرخت و هي بتقول: هبهرك
و ساقت بسرعة كبيرة، بس هو عكس الكل مكنش خايف و قعد بكل ثقة.
وقفت جنا و قالت: ايه رايك بقي
أسر: ابهرتني حقيقي بس تخيلي هنا المكان فاضي، لو في ناس ممكن كان شخص يتعرض للخطر بسببك
جنا: اكيد هكون واخدة بالي اكتر من كده
أسر: لازم تفهمي أن الموضوع مش لعب عيال
نزل من العربية و هي نزلت وراءه و سالت بحزن: قصدك أن كده مش هتعلمني السواقة
أسر: انا مقولتش كده، انا قولت عايزك تاخدي الموضوع بشكل جدي
جنا: حاضر
أسر: يلا كفاية كده النهاردة
جنا: ممكن اعزمك على الغداء
أسر: السبب
جنا بتوتر: أن كل اللي قلبك رفض يكمل معي من أول يوم بس انا استمريت
أسر: موافق طالما على حسابك.
مشي أسر و جنا على مطعم غالي و الاهم أنه المطعم المفضل ل أسر
استغراب أسر و قال: انتي عارفة أن ده مطعمي المفضل
جنا: و مطعمي المفضل أنا كمان
أسر: تاني حاجه متشابهين فيها
جنا: ايه الحاجة الاولى
أسر : حبنا للعربيات و السواقة
جنا: عرفت مين أني بحبهم
أسر: من طريقة تصميمك انك بتعرفي تسوقي
جنا: انا فعلا بحبك العربيات اوي
أسر: انا كمان بحبها
تمنت جنا يجي اليوم اللي يبدل فيه من بحبها ل بحبك و ده هيكون يوم السعد لها…
///////////
الدرس التاني
كان أسر قاعد يسوق و جنا جنبه
أسر: طيب يا جنا ،دلوقتي هنسوق وسط الناس ،هنبدل الإمكان و نبدا بالركنة.
جنا: ايه يا كابتن أسر أنا بركن، من و أنا في بطن أمي.
أسر: تمام ، يلا اركني.
و فعلا جنا عرفت تركن.
أسر: برافو عليكي، يلا قولي بسم الله و دوسي بنزين و امشي براحة
و اللي قالها تمشي براحة كأنها طايرة من على الارض
أسر بعصبية: براحة يا مجنونة دي عربية مش طائرة
جنا: علشان اهبهرك بشطارتي
أسر: ينتقم منك يا بعيد هدي السرعة،بدل ما نموت..
هدت جنا السرعة و قالت: قلبك خايف يا كابتن أسر
بص عليها بغضب و قال: شوفت اغبياء كتير ،بس زيك مشوفتش
ضحكت و قالت: ليه بس، ده انا كيوت و جميلة
أسر: هبطل الشغلانة بسببك يا كيوت..
جنا: خلاص هبقي عاقلة
أسر: انتي و العقل في جملة واحدة طيب تجي ازاي
جنا: ظالمني أنت يا كابتن
أسر: نرجع للمهم ،بصي في المرايا
بصت و قالت: يا نهار ابيض
أسر: في ايه؟
جنا: وشي اصفر اوي ،علشان نزلت من غير ما افطر ،ممكن تاكلني و نرجع نكمل
أسر بعصبية: هو أنا بدرب بنت اختي ،اكبري و اعقلي كده
جنا بحزن: بقولك جعانة ،معندكش بنات اخوات
أسر: لا معنديش و مش بحب البنات بسببك
جنا: شكرا يا كابتن
أسر: العفو يا اختي.
جنا : نعمل ايه دلوقتي
أسر: تعالي نروح ناكل بدل ما تاكلني
ضحكت ضحكة جميلة و قالت بصوت رقيق: شكرا يا اسر
قلبه دق و قال بابتسامة: العفو
و مشيوا على المطعم المفضل ليهم هما الاتنين
و كانوا ياكلوا في صمت لكن النظرات بينهم تقولوا كلام و مشاعر كتير..
أسر: جنا: لو فضلتي كده مش همكل معاكي
زعلت من الجملة و قالت: ممكن تسبني
استغرب الجملة و سال: يعني ايه اسيبك
توترت و قالت: قصدي تبطل تدربني
رغم أنه قلبه بيقول لا يمكن اسيبك ،عقله قال: أيوة لو استمريتي كده مش هعمل في التدريب
زعلت و بطلت اكل و قامت مشيت بصمت و هو قاعد زي ما هو..
و كل اللي عمله أنه بعت رسالة على الواتساب معاد الدرس التالت…
///////////
عدى اسبوعين و يوميا جنا و آسر يتقابلوا في درس السواقة
لكن جنا زي ما هي و مفيش اي تتطور
أسر بعصبية: بقولك ايه انا زهقت منك ، عدى اسبوعين و مفيش اي تتطور ،انتي فاضية و عايزة تلعبي انا لا ،يبقي متضعيش وقتي و العبي بعيد عني يا شاطرة.
جنا بحزن: أنا مش بلعب ،على فكرة أنا حاولت.
أسر بصوت عالي: بس أنا مش شايف منك اي محاولة ،بلاش تضحكي على نفسك ، بقولك يا جنا انا و مدرستي مش عايزينك.
مجرد ما قال الجملة دي وقعت من طولها، انصدم و قعد قصادها و قال بخوف: جنا، جنا مالك ، انا اسفة بس فوقي ، جنا ردي عليا أنا آسف..
لما ملقش رد منها ،شالها و حطها في العربية و طلع بها على المستشفى.
////////
في المستشفى
خرج حمزة صاحب أسر ،جري أسر عليها و قال: طمني يا حمزة ،هي عاملة ايه
حمزة : اهدأ يا عم هي كويسة و بخير…
أسر بقلق : طيب ليه أغمي عليها
حمزة: جالها هبوط مفاجئ اهدأ بس و قول ايه اللي حصل؟
أسر بعصبية: و انت مالك؟
حمزة: أنت نسي أنا هنا مش حمزة صاحبك ،أنا هنا الدكتور حمزة و جنا مريضة عندي و لازم اعرف اللي حصل
حكى أسر ل حمزة على اللي حصل و قال حمزة: هي ديما بتقولك أن ابوها مصمم تتعلم السواقة و أنت بتقول بيان عليها بتحب العربيات و السواقة، يبقي هي خافت أن ابوها يمنعها تسوق تاني و احتمال ده كان السبب.
أسر : تفتكر
حمزة : ايوة، بس تعال هنا أنت مش عارفه مين دي
أسر: مش عارفها ازي و انا اللي جايبها هنا
حمزة : لا مقصدش دلوقتي، افتكر كده
أسر: انا مفيش فيا دماغ ، قول و اخلص
حمزة: دي جنا كانت معانا في المدرسة الإعدادية
أسر حاول يفتكر و أو بالأحرى يمثل على حمزة أنها مش فاكر، فسأل : مش فاكر ،جنا مين
حمزة: جنا بتاعت الجواب
خبط على دماغه و قال: اه افتكرت ، بس، دي شكلها اتغير لدرجة اني معرفتش أنها جنا بتاعت زمان.
حمزة: ما طبيعي وقتها كانت طفلة، بس طفلة غبية شوية، كانت لسة ١٥ سنة و كتبت جواب طويل و مكتوبة فيها بالخط العريض بحبك يا أسر
ضحك أسر و قال: كان مواقف يموت من الضحك
حمزة: غبية من يومها يبقي ازاي تتعلم السواقة
أسر: عندك حق..
في الوقت ده خرجت جنا بعد ما سمعت أن أسر افتكر أنها كانت الطفلة اللي كتبت الجواب و أنهما يضحكوا عليها، اول ما شافوها كتموا الضحكة و قال أسر: جنا عاملة ايه
ردت بهدوء: الحمد لله ،انا اسفة اني عطلتك.
أسر: محصلش حاجه ،انا اللي اسف على كلامي
جنا بحزن: لا عادي انت معك حق أنا مش بفهم و لا يمكن اتعلم السواقة
أسر: متقوليش كده ،هنحاول تاني
جنا: انا خلاص مش هحاول ،خلصت المحاولات
حمزة: بقولك يا جنا انتي مش عارفة احنا مين
جنا : طبعا اعرف ، الاستاذ أسر صاحب مدرسة تعليم السواقة و حضرتك الدكتور
حمزة: لا احنا كنا مع بعض في المدرسة
ضحكت جنا و قالت: مدرسة ، هو أنا فاكرة كلت ايه امبارح علشان تقولي مدرسة ،على العموم اهلا وسهلا
و أنقذها من كلامهم و الإحراج اللي هي فيه، لما رن تلفيونها، ردت و قالت: معلش يا نور اتاخرت عليكي ، دقائق و اكون عندك
و مشيت من قدمهم ،قال أسر: استني اوصلك
بس هي مردتش
حمزة: تفتكرت سمعت كلامنا
أسر: أن شاء الله تكون ما سمعتش.
//////////
نور: معاد ايه يا جنا ،احنا بينا معاد
جنا: انتي فين ؟ عايزة أشوفك حالا
نور: في البيت
جنا: انا جاية
نور: تنوري يا حبيبتي صوتك بيان عليها حزين
جنا بحزن: انا زعلانة اوي،لما اجي احكيلك
//////////
بعد شوية
جنا بحزن: أنا لسه بحبه يا نور..
نور: هو مين ؟
جنا: أسر
نور: أسر مين، صاحب مدرسة السواقة
جنا : قبل ما يكون صاحب مدرسة السواقة كان معانا في المدرسة ، انتي مش فاكرة حد بالاسم ده
نور بصدمة : اوعي تكوني قصدك أسر اللي كتبتي له جواب
نزلت دموع جنا و قالت: أيوة هو، و اللي زعلني أنه عرف حمزة بموضوع الجواب.
نور: انتي ايه اللي فاكرك بكل ده.
جنا بحزن : أنا لما شوفت أسر صدفة يوم ما خبطت عربيته ،حسيت أني رجعت الطفلة الصغيرة اللي كتبت الجواب و توقعت أن أسر يعرفني.
و انهارت و هي بتقول : بس هو معرفنيش و لا كاني كنت موجودة يوم في حياته.
نور : انتي عمرك ما كنتي في حياة اسر
جنا بحزن: ده اللي عرفته النهاردة ،عارفة مين اللي عرفني.
نور بحزن عليها: مين؟
جنا: حمزة
نور: و انتي شوفتي حمزة فين هو كمان ؟
جنا: لما أسر بلغني أنه مش هيقدر يعلمني السواقة وقعت من طولي و أسر ودني مستشفى و حمزة كان الدكتور
نور: حمزة حقق الحلم اللي كان طول عمره يحلم بيه..
جنا: أيوة؛ و هو اللي عرفني و كمان عرفت أن أسر حكى له عن الجواب و سمعت الاتنين يضحكوا عليا و يقولوا اني غبية
طبطت نور على أيدها و قالت: أن أسر قال ل حمزة دي عادي علشان حمزة صديقه الانتيم ،اما يضحكوا عليكي ، هما يضحكوا على نفسهم مش عليكي انتي..
جنا: لا يا نور أنا مضحكة ، و المهم أني لازم انسي حب أسر علشان هو حب مستحيل
نور: مكنتش اعرف ان لسه في مشاعر في قلبك ل أسر كنت فاكرة الموضوع لعب عيال
جنا: الموضوع عمره ما كان لعب عيال، و أنا لما شوفت أسر و عرفت أن عنده مدرسة لتعليم السواقة ،فرحت و قولت هتكون فرصة بس هو كان عنده راي تاني.
نور: ناوية على ايه؟
جنا : هنسي الموضوع
نور: و دروس السواقة انتي فعلا محتاجة دروس
جنا بحزن و فقدت شغف كل حاجه ،قالت: مش هسوق تاني ،هطلب من بابا يجيب ليا سواق
حضنتها نور و قالت: ليه حسيت فجأة انك كبرت عشرين سنة فوق عمرك ، عايزكي تفضلي منورة ديما بلاش تنطفئ.
جنا بدموع: انا مش كويسة بس هحاول ابقي كويسة..
نور: و انا هكون معاكي
////////
عند أسر كان قاعد حزين و قال بعصبية: اكيد سمعت كلامنا أنا و أنت
حمزة: و ايه يعني ما هي عارفة الكلام ده من زمان
أسر: أنت غبي يا ابني هي زمان كانت صغيرة بس دلوقتي بقت شابة و كبيرة و اكيد الكلام يفرق معها و يزعلها
حمزة: انت عايز ايه
أسر: اتصل اطمن عليها
حمزة: و عاملة تلف و تدور ليه ،ما تتصل و بلاش وجع دماغ
رن أسر على جنا بس هي مش بترد
أسر: مش بترد
حمزة: يمكن نايمة ،اصبر شوية و بعدين اتصل
أسر كان خايف تكون جنا زعلت منه و كمان عنده احساس أنه مش هيقدر ما يشوفها كل يوم زي الاول..
/////////
عند جنا كانت شايفة التلفيون بيرن بس قررت متردش و كلمت نفسها بحزن: غلطانة يا جنا انك فتحتي موضوع قديم و كان اتفقل ، ليه سعيتي انك تقابلي أسر من جديد، كنتي فاكرة اللي محصلش زمان يحصل دلوقتي و أسر يحس بيا، اهو أسر محسش بيا و لا عبرني، اقفلي الموضوع تاني و انسي يا جنا.
/////////
تاني يوم و تحديدا في نفس المعاد اللي كانت جنا تجي في ،كان أسر قاعد مضايق و مفتقدها ، و لسه يرن عليها و هي مش بترد ،بعت رسالة: جنا ليه مش بتردي عليا، انتي كويسة
شافت الرسالة و مردتش
بعت تاني: ردي عليا يا جنا.
كتبت : أيوة كويسة
فرح أسر أنها ردت و قال: اخير ردتي عليا
بعتت : معلش أنا مش فاضية دلوقتي
و قفلت التلفيون و قالت: أنا لو اتكلمت معه اتعلق بيه اكتر و علشان كده لازم ابعد عنه نهائي و افتكرت زمان و ازاي حبت أسر..
و في نفس الوقت كان أسر هو كمان يفتكر ذكريات الماضي
///////
فلاش باك
كانت جنا منقولة من مدرسة لمدرسة تانية في سنة تانية اعدادي، و الدفعة كلها عارفة بعض علشان كانوا مع بعض من سنة أولى الا هي ، كانت منبوذة و محدش يتكلم معها…
قعدت نور جنبها و قالت: ممكن اقعد جنبك
جنا بسعادة: طبعا اتفضلي
نور: انتي ليه ساكتة ديما
جنا: هتكلم مع مين ، مفيش حد فيكم بيتكلم معي
قرب أسر و قعد على الدسك اللي قصادها و قال:حقك علينا من النهاردة هنكون أصحاب و نتكلم معاكي ديما.
جنا: شكرا ليك..
أسر: العفو ،من النهاردة احنا الأربعة شلة
جنا: مين الرابع
قرب حمزة و قال: انا الرابع ايه رايك.
ضحكت جنا من غير رد و فرحت أن اخيرا هيكون لها أصحاب.
و قالت نور: بصي يا جوجو انا و حمزة و آسر اصدقاء من ايام اولى ابتدائي ديما مع بعض و دلوقتي انتي هتبقي معانا
جنا: اكيد يشرفني
و من هنا بدات صحوبتي الأربعة و كانوا ديما مع بعض، و جنا بقت تحس بمشاعر ناحية أسر ،و في يوم قررت تعترف بمشاعرها أنها تكتب جواب مكتوب فيه: بحبك يا اسر.
/////////
بعد انتهاء اليوم الدراسي
كانت ماشية جنا مع نور في الشارع و حكت لنور على اللي عملته
نور بعصبية: بتقولي عملتي ايه
جنا: بقولك كتبت جواب ل أسر اني بحبه و حطته في الشنطة
نور : انتي مجنونة يا بنتي ازاي تعملي كده و بعدين حب ايه و انتي لسه صغيرة
جنا: انا مش صغيرة و بحبه بجد
نور: لما نشوف أسر هيعمل ايه بكرة
جنا : اصل انتي مش فاهمة، أسر ده شخصية و كرزيما و تحسي اني قوي مش ضعيف..
نور : عندك حق أسر شخصية قوية
////////////////
في بيت أسر
كان قاعد مع عائلته على الاكل ، و بالغلط وقع منه المعلقة على الأرض ، حس بالخوف و قال: انا اسف
عادل( جوز امه) ضربه قلم قوي على وشه و قال بعصبية::طول عمرك غبي زي ابوك اللي مات و غار في داهية
سناء بحزن: حرام عليك الموضوع مش مستهل
عادل: أخرسي انتي مش عايز اسمع صوتك
أسر بدموع ضعف: أنا اسف مش هعمل كده تاني، بس من فضلك اتعامل مع ماما كويس
خبط عادل على الترابيزة بعصبية و قال: حد قالك انك المحامي عنها ،طيب ايه رايك الليلة دي هتكون نكد عليك و عليها، و اعمل حسابك هطلب نقلك من المدرسة بكرة، و علشان هنسافر ل محافظة تانية.
أسر بحزن: مش عايز أسيب مدرستي و لا اصحابي اللي معاهم من سنين
عادل بغضب: مش بمزاجك ،انت و امك تسمعوا الكلام بالذوق احسن ليكم..
///(((
بعد شوية
كان أسر قاعد على الأرض و هو يرتعش و يعيط زي الطفل الصغير أنه مش قادر يحمي امه و نفسه من جوز امه..
فتح الشنطة و شاف جواب جنا، دق قلبه و قال: أنا كمان بحبك يا جنا، بس أنا ضعيف و مش هقدر احمكي ،انا اسف يا جنا لازم اجرح قلبك علشان تنسي حب المراهقة ده و تركزي في مستقبلك…
/////////(
عند جنا
كانت متوترة و دماغها ترسم مية سيناريو لما أسر يشوف الجواب ،كلمت نفسها: انا بحبك اوي يا اسر، ممكن اكون مش كبيرة للتفكير في الخطوة دي و كمان اتصرفت غلط و حرام عليا بس حسيت اني لازم اعتراف ، بس انا ندمت اني عملت كده ،يارب سامحني..
دخلت امها و قالت: لسه صاحية يا جنا
جنا: خالص انام اهو
و سالت جنا بقلق: ماما أنتي كويسة
رانيا: أيوة الحمد لله بخير ، يلا نامي يا حبيبتي
جنا: حاضر يا ست الكل.
رانيا: تصحبي على خير
جنا: و انتي من أهل الخير.
خرجت رانيا من الاوضة و بيان عليها التعب
و نامت جنا و هي تحلم بأحلام جميلة..
///////////////////
تاني يوم في المدرسة
كانت جنا متوترة من مقابلة أسر و مش عارفة هيكون ردة فعله ايه، و كانت ردة فعله غريبة و مفاجأة لها
في الحصة
سمر: يلا اولاد سلموا على صاحبكم أسر علشان للاسف مش هيكمل معانا السنة و ينقل في مدرسة تانية
اتصدم الكل حتي حمزة و سال: ازاي و ليه؟ و من غير ماعرف، على الأقل كنت استنت لحد الامتحانات
أسر: حصل ظروف يا حمزة.
الكل بدأ يسلم على أسر و هي قاعدة مكانها هو اللي قرب و قال: مع السلامة يا جنا.
بصت عليه و عيونها كلها دموعها و مكنش عندها كلام تقوله ، بس توقعت أن أسر عمل كده بسبب الجواب..
ده كان آخر لقاء بين جنا و آسر لحد يوم ما خبطت عربيته..
/////////
رجع أسر البيت و هو حزين
علشان هو كمان في مشاعر في قلبه ل جنا، بس هو مش من حقه يختار
أسر اللي ظهر قدم الكل بشخصية مستقلة و قوي، الحقيقية هو ضعيف و ملوش راي في حياته و المسؤال عن كل حاجه هو جوز امه.
أسر بحزن::انا مش عايز أسيب مدرستي و لا اصحابي
قالت امه بضعف و قلة حيلة: سامحني يا اسر مفيش في أيدي حاجة ، منه لله عمك بعد وفاة ابوك أتجوزتي غصب علشان ياخد كل ورث ابوك
أسر: هنفضل ساكتين على كده
دخل عمه في الوقت و قال: و عايز تعمل ايه
ظهر على أسر علامات الرعب و يرتعش بخوف
اتكلمت سناء::مش عايز يعمل حاجة احنا بنتكلم في موضوع تأني.
ضحك ببرود ة قال: بطلي تكدبي ،ابنك غلط و انتي كمان غلطانة، و دلوقتي وقت العقاب، و علشان قلبي طيب هعاقب واحد فيكم بس ،يا تري مين فيكم؟؟
وقف أسر قدم سناء و قال هو يرتعش: عقابني انا و سيب أمي في حالها..
ضحك عادل و قلع الحزام و بكل غل يضرب فيه وقفت سناء زي العادة علشان تفصل بينهم و كانت تتضرب هي كمان..
صرخت سناء و هي بتقول: كفاية بقي حرام عليك بقالك سنة من بعد وفاة اخوك و انت معذبني أنا و ابني
بس مسمعش ليها و كمل ضرب في اسر، و هي مشيت ناحية المطبخ جابت سك..ينة و بكل حقد، ضربت عادل و هي بتقول: بعد وفاة اخوك كان المفروض بعد ربنا تكون سند ليا انا و أبن اخوك بس انت عذبتنا و لازم اخلص منك.
مات عادل في نفس اللحظة ، اتصدم أسر و قال: ماما انتي عملتي ايه
ضحكت من غير واعي و قالت: خلصنا منه يا حبيبي
أسر مبقاش عارف يعمل ايه و هو يعتبر طفل و تفكيره على القد، ملقش حل غير يدفاع عن أمه و قال: أنا اللي قت..لت عادل مش انتي
صرخت و هي بتقول: مش هقبل تتضيع حياتك أنت فاهم..
أسر: أنا تحت السن القانوني و عقوبتي هتكون سجن أما انتي هتكون اعدام و خاسرة تاخدي اعدام في الحقير ده و أنا مش عايز اكون يتيم اب و ام
سناء: أنت لسه صغير على الهم ده
أسر: ماما اسمعني عادل ملوش حد يورثوا غيرنا و بكده حقنا يرجع لنا، و انا بلغت اصحابي اني هنقل محافظة تانية ، انتي خدي كل الفلوس و سافري في محافظة تانية و كده الموضوع هيبقي سر
و دخل أسر و هو لسه طفل السجن في تهمة ق..تل و على ما المدة طلعت كانت أمه ماتت ،و حاول يبدأ من جديد في مكان محدش يعرف عنه حاجة ،حتي حمزة معرفيش حاجة عن الموضوع ده…
/////////
أما جنا رجعت البيت ،لقت ناس كتير و صوت عياط ،جريت على جوة و سالت : في ايه
حضنه ابوها و قال بحزن : امك توفت يا جنا
صرخت جنا و هي بتقول: ماما، يا ماما بلاش تسبيني، مش أقدر أعيش من غيرك
محمود بدموع: اهدي يا حبيبتي
جنا بانهيار: عايزة اشوف ماما
محمود: حاضر ،تعالي معي
دخلت جنا الاوضة و نامت جنب رانيا قالت بحزن: ماما ، ماما أنا محتاجة حضنك اوي، طول الطريق و انا اتمني ارجع علشان تاخدني في حضنك و رجعت لقيتك انتي كمان مشيتي و سبتني هو أنا وحشك اوي كده علشان الكل يسبني و يمشي ،ماما قومي.
شدها محمود و قال: كفاية يا جنا ،حرام عليكي ،ادعليها بالرحمة
جنا بصرخة وجع : ربنا يرحمها و يصبر قلبي.
///////////
عودة عند جنا
مسحت جنا دموعها و هي بتقول: كنت غبية لما فكرتي أنه يتمسك بيكي بعد ما هرب منك زمان، ده كمان عرف صاحبه بموضوع الجواب، انسي يا جنا علشان تعرفي تعيشي, و بلاش تفتحي وجع الماضي ..
//////
عند أسر
حمزة: مالك يا أسر
أسر بحزن: انا زعلت لما عرفت أنها جنا بتاعت الجواب
حمزة: ليه
أسر: علشان افتكرت اني نسيت بس طلعت لسه فاكر.
حمزة: لسه بتحبه
أسر: و كل يوم يزد حبي
حمزة: ردة فعلك كانت غريبة زمان
أسر: كان قرار مفاجئ من عمي و شوفت من الأفضل أن امشي من غير كلام..
حمزة : من رايك جنا لسه فاكرة الماضي
أسر: الواضح لا ،علشان كانت تتكلم معي و كأنها مش عارفني ،الغريب أن لا أنا عرفتها و لا هي عرفتني و جيت أنت عرفتها
حمزة :دي قدرات يا ابني.
أسر: لو قولتك أن في مشاعر في قلبي ل جنا
حمزة: جنا زميلة المدرسة أو جنا اللي كانت تتعلم معك
أسر: مش عارف احدد، لكن ممكن اقول الاتنين هي هتفرق
حمزة: مع جنا هتفرق ، لو هي لسه فاكرة موضوع الجواب ,يبقي هتفرق علشان هتعرف أن كان عندك مشاعر ليها.
فكر أسر شوية و سرح بذكرياتة و افتكر أيام المدرسة و كمان المواقف اللي جمعت بينهم و هما كبار و اتاكد أنه بيحب جنا من زمان و سبب فراقهم اللي حصل…
///////////////
تاني يوم
في بيت جنا
محمود: انتي مش ناوية تكملي في دروس السواقة
جنا: لا مش هكمل انا قفلت من السواقة
محمود: احسن قرار،بقولك جهزي نفسك في عريس جاي بليل
نفخت بضيق و قالت: يا بابا عريس تاني انا مش عايزة اتجوز
محمود: استغفر الله العظيم يارب ،كل عريس يجي ترفضي ،قابلي و ابقي ارفضي بعدين ..
و سابها و مشي ، جزت على أسنانها و قالت بصوت عالي: هرفض العريس كده كده
////////(
بليل كانت نازلة و وشها بيان عليه الغضب، فتحت بوقها بصدمة لما لقت أسر و معه نور و حمزة، لدقائق افتكرت شكلهم لما كانوا في المدرسة و أنهما الوحيدين اللي كانوا معها، فاقت على نفسها و سالت باستغراب: بتعملوا ايه هنا.
محمود: تعالي اقعدي الاول يا جوجو
قعدت جنب ابوها و سالت : خير يا بابا
محمود: اكيد عارفة نور.
جنا: طبعا
محمود: و دول أسر و حمزة بيقولوا انهم كانوا اصحابكم من أيام المدرسة و أسر هو العريس
جنا بصدمة: أسر العريس ،ازاي و ليه ،انا مش فاهمة حاجة
أسر : بعد اذنك يا عمي ،ممكن اتكلم مع جنا على انفراد.
محمود: اتفضلوا في الجنينة
مشي أسر مع جنا و قرر يحكي لها كل حاجه عنه..
همس حمزة لنور و قال: بقولك ايه رايك احنا كمان
نور: احنا كمان ايه
حمزة: نتجوز يا نونو
نور: ايه الهبل ده لا طبعا
حمزة: فكري بس انا عريس مناسب
ضحكت نور من غير رد و الظاهر أن الصنارة غمزت بينهما..
/////////(
كان أسر حكى لجنا كل حاجه عن السجن و جر..يمة القت..ل و أنه كمان بيحبها زمان
جنا بدموع: كل ده حصلك و كلنا بنقول انك شخصية قيادية و بيان عليك القوة و اكيد متربي في بيئة صحية و تطلع حياتك صعبة بالشكل ده
أسر بحزن: امسحي دموعك يا جنا، و انا اسف على هروبي زمان من غير رد، و اسف على كلامي مع حمزة في المستشفى عليكي، و اسف اني معرفتيكش على طول.
قررت جنا تخبي علشان كرامتها قدمه و قالت: عادي انا كمان معرفتيكش.
أسر بحب: جنا انا حبيتك تلاتة مرات ، مرة ايام المدرسة و مرة لما عرفت انك جنا زمليتي و المرة الأحلى بينهم هي درس السواقة، كان احلى درس في حياتي، و مقدرتش اهرب أو اضيعك من ايدي تاني علشان كده قولت الخير بر عاجلاً.
ضحكت جنا و قالت:بس انا محبتكش و لا مرة حتي ايام المدرسة كان لعب عيال و اتاكدت من كده علشان أول ما اختفيت نسيتك تماما، فلو سمحت اديني وقتي افكر
قال بحزن: حقك طبعا، و فكري كويس الاول أنا قاتل و رد سجون
جنا: بس أنت مش قاتل ، انت اتحملت العقاب بدل مامتك الله يرحمها.
أسر بحزن:الله يرحمها ،بس أنا قصاد القانون و في الورق الرسمي قاتل و دخلت الأحداث ،لو تقبلي تكملي مع واحد زيه هكون أسعد انسان في الدنيا
جنا نفسها تصرخ و تقول بحبك من زمان و موافقة، بس كعادة حواء تخبي حبها علشان كرامتها ،علشان كده قالت بهدوء: هفكر و ارد عليك، بس تاكد ان موضوع السجن ده سر بيني و بينك و كمان مش هياثر على قرار جوزي منك
أسر: عارفة أنك اول واحدة تعرفي السر ده
جنا: و مكنتش خايف و أنت بتقول ليا
أسر: حد يخاف من نفسه،انتي نفسي
جنا باستغراب : غريبة يا اسر هو الحب ده كان فين
أسر: من اول يوم بس مكنتش فاهم أنه حب، و لما عرفت انك جنا حب الطفولة ،حبيتك اكتر ، اكيد مفيش مصلحة اتجوزك علشانها غير الحب
جنا بهزر: لا في طبعا أني سائقة محترفة.
أسر: لا دي الحاجة الوحيدة اللي لازم تبطليها بعد الجواز
ضحكت جنا و كأنها طفلة صغيرة و أسر كمان،كانهم رجعوا لاجمل أيام في عمرهم
///////
بعد عشر شهور
بترقص جنا و هي في قمة سعادتها أنها حصلت على حب الطفولة اخيرا و أسر كمان نفس مشاعرها
اللي قال بحب : اوعدك اني اعمل المستحيل علشان تكوني اسعدة واحدة في الدنيا
جنا: أنا سعيدة معك تحت اي ظرف
أسر: شكرا انك قبلتي الماضي بتاعي
جنا: حبيبي لو سمحت بلاش نتكلم عن أي زعل و فراق خلينا نتكلم بس عن الحب
أسر بحب: طيب بحبك يا اجمل جنا في الدنيا
جنا بسعادة: و انا بحبك اكتر من نفسي.
عند نور تبص على جنا و هي مبسوطة، جاه حمزة و قال: قولتي ايه
نفخت بضيق و قالت؛ حمزة فككك مني
حمزة: بيحبك يا نور و دورت عليكي كتير و فص ملح و دب
نور: لا وانت الصادق انت اللي بعدت
حمزة بندم: طيب اسف، أتجوزتي بقي
مشيت نور و هي بتقول : سابني أفكر
حمزة بص عليها و بص على أسر و جنا و قال: رجعت الشلة تاني و رجعنا احنا الأربعة أصحاب بعد سنين فراق بسبب درس سواقة..
و تمت و ليس للحديث بقية
رايكم يا حلوين
#درس_سواقة
#قصة_ كاملة
#روايات_بقلم_منال_كريم
❤️❤️❤️❤️❤️❤️❤️❤️❤️❤️❤️❤️❤️
سبحان الله وبحمده سبحان الله العظيم
استغفر الله العظيم و اتوب اليه
لا إله إلا الله وحده لا شريك له له الملك وله الحمد وهو على كل شيء قدير
اللهم صل وسلم وبارك على سيدنا محمد
لا حول ولا قوه الا بالله العلي العظيم
حسبي الله ونعم الوكيل
اللهم انك عفو كريم تحب العفو فاعف عنا
اللهم احفظ مصر واهلها من كل شر
اللهم احفظ اولادنا وبناتنا من كل شر
❤️❤️❤️❤️❤️❤️❤️❤️❤️❤️❤️❤️❤️❤️❤️❤️