أحببت زوجة أخي بقلم منال كريم

سها :كلمت علا و هي جاية في الطريق ، الخطة نجحت.

أم حسام( صفاء) :برافو عليكي يا سها ، تجي و تشوفه كده، و تخلي عندها دم و تطلب الطلاق و نخلص منها.

ام العروسة( سماح) : افتكري يا ام حسام انا وافقت على الجواز بشرط أن علا هتتطلق مش هقبل تكون لبنتي ضرة

صفاء: متخافيش هتطلب الطلاق و لو هي مطلتبش احنا هنخليها تتطلب

سها: صح يا ماما ،بما أننا عايشين في بيت عيلة و هي الوحيدة الغريبة اللي بينا يبقي تشوف العذاب على ايدينا…

صفاء: خلينا نفرح بالعيال ،شايفة مبسوطين مع بعض ازاي

بصوا التلاتة على حسام و حور و الحب و السعادة ظاهرين عليهم

مسكت حور أيد حسام و هي بتقول بابتسامة و دلع : مبروك يا حسام.

حسام باس ايديها و قال: الله يبارك فيكي يا قلب حسام.

حور: بفكرك انك وعدتني تتطلق علا ،علشان انا زي الفريك مبحبش شريك

حسام: هيحصل يا حور، بس لازم أكرهه العيشية علشان تخرج بالجلابية اللي عليها من غير قايمة و لا اي مستحقات ،و عايز اشوف شاطرتك علشان
نخليها تدوق العذاب الوان.

حور: من عيني ،و غلاوتك عندي ،هتشوف العذاب الوان و مش بس انا ده كمان امي و مرات عمي و سها

ضحك حسام و قال: لا ده أنا اخاف عليها منكم

حور بدلع: لا يا حبيبي اوعي تخاف غير عليا أنا بس.

جت سها مع صفاء و سماح و شدوا حسام و حور و رقصوا مع بعض بسعادة و كأنهم مش داسين على قلب واحدة تانية.

في الوقت ده وصلت علا اللي مشيت ناحيتهم بكل بهدوء وافقت تتفرج على سعادتهم لحد ما صفاء شافتها، جربت عليها علشان تشمت فيها لما قالت: يا نهار ابيض يا علا ، مين اللي قالك بس، انا مكنتش عايزة حد يعرفك حاجة ،علشان متزعليش،اصل انتي غالية علينا اوي

علا : مش عايزني اعرف ليه يا حماتي خايفة على مشاعري، و كمان انا غالية عليكي اوي، تصدقي صدقت

صفاء: اومال هو أنا عندي اغلي منك يا لولو ،بس انتي عارفة بقي انك معيوبة و مش بتخلفي و لازم ابني يجيب ولي العهد

ضحكت علا بسخرية و قالت: و ولي العهد ده ها يورث منكم ايه، انتوا ناس جعانين و شحاتين

جزت صفاء على أسنانها و قالت بغضب: لمي لسانك يا ارض بؤر و غوري من هنا

علا : لما اشوف جوزي الأول ، و أه بقولك لو بنتك طلعت زي و مقدرتش تخلف هتقدري تشوفيها مكاني