غيث و أرجوان بقلم منال كريم ١

كل البلد عارفين ان غيث و مراته يوصلوا النهاردة ،الكل كان متحمس يشوف مرات غيث و أتوقعه أنها تكون زي الأجانب، بس المفاجأة أنها لابسه هدوم محتشمة و الحجاب يزيدها جمال

التلاتة البنات وافقين على السلم، قالت غالية : انا اللي مستنية اشوف عروسة المولدة من كتر المكيب،ما شاء الله البنت محجبة و زي القمر من غير مكيب

نسمة بغيرة: هي مش حلوة على فكرة

بصت غالية عليها باستغراب من غير رد

قالت هدير : بذمتك يا نسمة انتي مصدقة نفسك ،البنت ما شاء الله بتنور في الضلمة

كتمت نسمة غيظها من غير رد.

دخل غيث و هو ماسك أيد أرجوان اللي كانت متوترة و قلقانة،والاثنين استغربوا أن محمود كويس.

سلم على أهله،و بعدين قال: ده ابويا يا ارجوان

مدت ايديها و قالت: ازيك حضرتك يا عمو

سلم عليها من غير نفس و قال: اهلا

غيث: و دي ست الكل امي

ارجوان: ازيك حضرتك

نحمده: كويسة

غيث: غسان اخويا الكبير

ارجوان: ازيك

غسان هز رأسه من غير رد

بص غيث على السلم و قال: تعالوا هنا يا بنات

جريت غالية تحضن اخوها، و قالت: انا بقي اعرفك على نفسي، انا غالية أخته الصغيرة

ابتسمت ارجوان و قالت: ازيك يا غالية

غالية: الحمد لله

هدير: و انا هدير مرات غسان

ارجوان: عاملة ايه

هدير: الحمد لله

وقفت نسمة ساكتة، فقالت غالية: دي نسمة بنت عمي

ارجوان: ازيك

ابتسمت من غير نفس، و فجأة سمعوا صوت ضرب نار، صرخت ارجوان و حضنت غيث،طبطب عليها و قال : متخافيش يا حبيبتي دي تحية لينا.

ارجوان بخوف: تحية بالسلاح

محمود بحدة: اتحشمي يا بت و ابعدي عنه

نحمده: دلع ماسه يا حاج

جت أرجوان تبعد عنه بزعل، هو ضمها ليه اكتر و قال : في ايه يا امي ؟ هي مش واخدة على الحاجات دي يعني مش دلع، و حضنت جوزها يا ابويا ،يعني معملتش حاجة غلط

غالية علشان تغير الموضوع: يلا نأكل ،و بلاش كلام دلوقتي

مشيوا كلهم ،قعدوا على السفرة

و فضل غيث و ارجوان اللي سالت ببراءة: انا عملت حاجه غلط

غيث: لا يا حبيبي،يلا نأكل و كبري دماغك

مشيت معه و هي ماسكة في أيده بقوة..

على السفرة

غيث: اخبار صحتك ايه يا ابويا، انا شايف ماشاء الله انت كويس

محمود: كنت عايز تجي تلاقيني ميت علشان تكون مبسوط

غيث: ايه الكلام ده يا ابويا ،بعد الشر عليك انا بطمنن عليك